2014年12月27日星期六

平安夜有錢執

平安夜香港上演類似寒戰情節 (或者更久遠一點的富貴逼人 ^^),街上竟然有大量銀紙可以執。但明知是不明來歷的錢,很多人仍是去搶住執。有位年青人執完錢,仲要影相放上 facebook 晒命,除了道德有問題外,連智商也有嚴重缺憾,睇新聞他好似已經被警察拉了 ^^'''。

我一直提出中國人是愛貪小便宜,完全無錯的,但 "中國人" 的範圍也包括我們,在港澳出生的人。不要告訴我今次搶住執錢的,全部都是自由行吧?我們罵自由行愛貪小便宜、無道德的同時,其實我們應該自我反醒,我們的教育水平比他們高,但我們的道德水平也不見得高到哪裡,反正在外國人眼中,除了本護照不同外,我們和他們沒有多大分別。


2014年12月23日星期二

預祝聖誕快樂

在此預祝各位聖誕快樂!

近日好忙,沒有時間出文及睇股市,好彩選擇提前收爐。最近女兒生病,喉嚨發炎,夜晚完全唔食奶唔飲水,但天氣噪氣,夜晚肚餓又口乾,所以瞓得不好,筆者都變成熊貓眼。真係兩個夠晒數,現在叫我再生多一件,真係殺咗我好過   >_<

港股和美股是升是跌,升甚麼板塊,筆者完全不知道,但希望年尾有點時間的話,可以自己寫返今年操作的一些檢討,以及來年的資金分配計劃。


2014年12月16日星期二

提前收爐

本來想寫有關 IB 功能的文章,但近日太忙始終無時間,先出一篇短文。近年尾,股市並沒有出現傳說中的大牛市,相反是半死不活。國內股市的確是強,但港股卻完全跑輸,又滬港通又阿爺減息,恒指就是升不上,反而跌穿 23000 點。

今日筆者在留言區提過,滬港通開通後,再沒有出現大量 「北水南下」,反而是「南水北上」。在中國經濟、市場、以及人民幣逐步開通,走向國際化時,港澳特區對中央的重要性只會越來越低。最近佔中、公民抗命一大堆問題出現,我不敢講誰對誰錯,但我好肯定可以用一個詞,就是「內耗」。一個城市如果內耗不斷,經濟一定不會好到那裡。可以參考幾年前的台灣。

而我們還要面對美國未來加息這個炸彈,美國大印銀紙,攪出來的熱錢風暴,這幾年席捲亞洲及新興市場,但風暴始終有完結的一天,熱錢風暴退下,也將捲走之前所引起的泡沫。到時社會上好多事情都會現形,包括炒到離譜的天價資產,以及在極低失業率時所養懶的一班低競爭力的人,甚至是不愁衣食的學生哥......

2014年12月10日星期三

淺談風險管理 (3) - 補充

前文重溫:
http://terrychao2000.blogspot.com/2014/11/1.html
http://terrychao2000.blogspot.com/2014/11/2-r.html

先要明白技術分析不同基本分析,以及做交易 (即炒股) 不同價值投資,用技術分析去交易,止蝕機制是絕對、絕對的必要。前文也簡單解釋了 R 系統,以及對整個組合設定一個風險上限的防護網。這篇就再作一些其他事項的補充。

一、 命中率

一般散戶可能覺得交易命中率是最重要的,人之常情,炒股當然想買甚麼升甚麼,買十隻至少想七八隻股都升,但事實上就算成功的炒股老手,其交易命中率都好難超過 6、7 成,有些更加只是微微超過 5 成而已。

那麼底命中率如何賺錢呢?答案就在於:盡量減少虧損的部位、盡量增加賺錢交易的利潤。假設一個人做了 100 筆交易,他之前的 99 筆交易都蝕錢,但每筆只微蝕 $1,到第 100 筆交易他成功賺了 $100,如果不計及手續費,他仍有 $1 利潤,但他命中率只有 1%。

所以活用 R 系統,盡量把止蝕的部位 keep 在 1R,而賺錢的部位如果超過 1R 的話,即使命中率不算太高,長期的利潤也頗豐富的。

二、盡量不要超出 1R 虧損

上文講到交易的每股風險是 1R,即 R = 買入價 - 預設止蝕價。那麼如何保住虧損不會超出 1R,就是關鍵的任務。超出 1R 虧損的可能性有幾個:

A. 沒有用預設止蝕盤功能,有時不可能每天坐在電腦前 check 股價,股價一下子跌穿預設止蝕價都不知道
B. 有用預設止蝕功能,但股價一開市就裂口跳空下跌
C. 隨時向下調低止蝕價

C 點是最要不得的習慣,預設止蝕位是不能向下調整,只能向上調整,這一點無論 Van Tharp 和 Alexander Elder 都是非常堅持的,一個成功的交易者必須講求紀律,不可以輕易去打破紀律。

而 A 點則可以尋找一間有預設止蝕功能的證券行。B 點則好難避免,因為突然有壞消息公佈,股價就會裂口低開,這是交易的一部分,必定會遇到的。較佳辦法是盡量避開老千股,如果炒美股則盡量避開業績日。

能夠盡量把每一筆交易的每股虧損都 keep 在 1R,這樣才能有效地控制風險。

三、靈活的買入點

William O'Neil 主張買在最正確的形態的突破點,即買入價不可超過突破點的 5% 以外,否則就是高追,而硬性規定 -8% 作止蝕的話,過份高追也好容易被日常波幅洗走。假設 #A 股票的杯柄突破點 = $9.5,即最多只可以買在 $10 的範圍內,若果買在 $10.5,則股價就算被震盤震回 $9.6,並未跌穿突破點,但以 -8% 止蝕的話,一樣會被震出場外。

Van Tharp 的 R 系統則可解決此問題,他主張若果是玩上升趨勢的突破買入法,則買入位置可以較靈活,只要用預設止蝕價去計算出 R (每股風險),再計算出買入的 size (股數) 即可。簡單來說就是:止蝕放寬了,則買入股數 (注碼) 相對減少,但無那麼容易被震出場外

例子:#B 股票  杯柄突破點  = $8.50,我設定的預設止蝕價 = $8.00

如果我能以 $8.8 買入當然最好,因為買在突破 up 5% 的範圍內,而 R = $8.8 - $8.00 = $0.8
若果組合淨值 $1,000,000,我拿出 1% 出來作風險,即我可買入 = 12,500 股

但若果當天一支大陽燭 + 巨量成交升穿 $9.00 呢?我要硬性等回調才買?否則就要超出突破點 5% 的範圍了。活用 R 系統配合,其實我可以在 $9.20 都買入的,預設止蝕價不變 = $8.00,R = $9.20 - $8.00 = $1.20

每股風險變成 $1.20,一筆交易可能虧損 13% 哦!?沒關係的!活用 R 系統:

我照樣拿出組合淨值的 1%出來作風險,即我可買入 = $10,000 / $1.20 = 8333 股 
(美股可以一股一股的買,若果港股則要配合一手的股數)

這樣若果我強烈睇好這隻突破的 #A 股票,我照樣可以高追在 $9.20,只不過我是壓縮了注碼,而整筆交易的總風險仍然是 $10,000 不變的。

------------------------------------------------------------------------------

一篇講太多又會太悶,其他補充留待一篇 ^_^


2014年12月4日星期四

千億成交

港股最近連續爆出千億成交,大市 chok 下 chok 下,講真指數暫時並唔算差,只係 50 天線附近上落,但好多二三線股都跌獲金,近排是內保、內房、內券強勢,其他股真係幾難炒。筆者未睇清應該點操作,唯有先撤退,港股倉已 full cash。因為近排花精神但完全無得着,得個做字,情願清了倉,打下芒亨 (Monster Hunter 4G) 好過 ^^

美股倉目前有:PTX、TGTX、AGN、UA、AERI 五隻股。早前因為決定唔敢博業績,於績前沽了一半 PANW,於業績當天再升 4% 時沽清,可能沽早了點,但真的不敢博業績,因為事前係完全無得估。

事實也有唔少股票,出業績當天插到返艇,所以情願錯失有可能業績日出現的上升裂口,也要先減持或沽出避免大跌,如果業績開市後兩個小時都未見大跌,反而可以博一博炒短線。

2014年11月29日星期六

淺談風險管理 (2) - R 系統

昨天很忙沒空睇大市以及上留言區,今天才有空出文,繼續寫有關風險管理的文章。上文說了止蝕對交易的重要性**,今天開始淺談 Van Tharp 的 R 系統。

**交易和長線投資是不同的,以基本分析為基礎的長線投資可以不用設定止蝕

R 系統

Van Tharp 認為做股票交易,最重要的不是買入價,而是以沽出價為基礎去計算的風險管理系統。一開始決定買入一隻股票時,假設買入價 = B,預設止蝕價 = S,那麼你買入這隻股票時,每一股所承擔的風險就是 R。

B - S = R
**由於 R 等於一個正數,所以採用 B - S 而不是 S - B,總之是取兩者之間的差額值

用 R 乘以你要買入的總股數,就等於這筆交易的風險的總金額了,我假設這個總金額為 T。這個 R 系統計算法非常簡單,但卻非常實用!

T = R x 買入股數

Van Tharp 的 R 系統,是假設交易者每一次只做一筆交易,所以他建議交易者把一筆交易的總風險金額,設定為組合淨值的 1%。如果你的組合淨值有 100 萬港元,那麼 1% 就是 $10000 港元。即是你每做一次交易,就等於拿出 $10000 港元去博,你的總風險好大可能就是這 $10000。

假設你想買一隻股票 #ABC,買入價 B= $10,預設止蝕 S = $9,R = $1。以此方式反計算出來,即你可以買入 10000 股 #ABC 的股票,因為每股風險是 $1,你買入 10000 股,你交易的總風險是 $10000,等於組合淨值的 1%。

R 系統與防護網

說到這裡,可能好多讀者有疑問,有沒可能每次只做一筆交易呀?對於經常滿倉操作的炒股人,甚至習慣同時間持有 >20 隻股票的人,可能覺得不可思議,但真正的投機交易者,其實好少把注碼分得太散,他們情願把雞蛋集中在一個籃子內,而去很小心的盯緊這個籃。

但每次只交易一隻股票,如果不幸買錯股票,或者這隻股票在買入後, 股價一直停留在 B 與S 之間,沒有撞中止蝕位,一直悶足兩三個月,那麼也浪費好大的機會成本。所以筆者就採用 Alexander Elder 的防護網方法。

Alexander Elder 建議每一筆交易的風險,只佔組合淨值的 2%,這和 R 系統相似,上述的建議是 1%。而 Elder 卻明白交易人會同時做不只一筆交易,所以他也建議運用 6% 的準則作整個組合的風險上限值,即是為組合設下一個防護網。

筆者由於倉位不算細,6% 對筆者來說過多了點,所以筆者為自己組合設下的防護網,是等於組合淨值的 4%,而每一筆交易的風險則佔組合的 0.5%-1% 之間。假設每筆交易佔組合的 1% 的話,即每次同時只可以持有 4 隻股票,做 4 筆交易。直至其中一筆交易成功沽出獲利,才有 quota 再買入一隻新的股票。

-----------------------------------------------------------------------
筆者不想在一篇文中寫得過長,很多細節我留待下一篇文中才交待。現在再簡單重溫一下整套系統:

1. 假設組合淨值是 $1,000,000
2. 每月組合的防護網是淨值的 4% = $40,000
3. 每筆交易的總風險是淨值的 1% = T = $10,000
4. 買入一隻股票前,計算好 B - S = R, 而 T / R = 可買入股數
5. 當同時做了 4 筆交易,即持有 4 隻股票時,已經用盡了防護網的 $40,000,在未有一隻股票成功沽出獲利前,不可再加入新股票
6. 若果最壞情況發生,4 筆交易全部中止蝕沽出,即一下子實現虧損 $40,000 時,這個月是暫停不要再交易

2014年11月24日星期一

減息

昨日家有喜事,筆者做大舅爺,所以好忙沒空寫第二篇風險管理文章,唯有出篇短文應付下先。

人行上週五突然宣佈減息,相信令唔少人嘩然,因為真係唔知因咩原因要減息。近月日本、歐洲都量寬,印象中好似澳洲都是?總之不少貨幣對美元相對貶值,現時連中國都減息,是因為人民幣走向市場化,怕人仔升值太快而降一降溫嗎?今早港股大升,但仍有不少股票逆市跌,筆者倉位五隻股都連中四隻紅色,今早升得較靚的是一眾高負債的基建、內房等股票。

筆者已在考慮年底前把港股倉拆了,把資金搬埋過去 IB,組成單一個大倉。除了可減輕手續費,令交易轉身可以更快更靈活外,也因為 IB 有一個可維持長期的到價止蝕/買入的操作功能,不用每天都重新 set 多一次。另外可以隨時調整港股和美股的比重,美股強時買重一點美股,港股強時可把資金快速轉入港股市場。

不過由於 IB 沒有 office 設在澳門,甚至我連 IB 在香港的 office 都未上過去,一切就是在網上操作或者打電話過去,好似有點隔山打牛 feel,以及有點不太穩陣的感覺 >_<。

2014年11月20日星期四

淺談風險管理 (1) - 先談止蝕

之前都寫過有關風險管理的文章,現時再寫一篇,希望和那些未有睇過筆者之前文章的讀者分享一下。對於炒股的方法是五花八門,有基本分析、技術指標分析、技術走勢分析 (圖表),或者是幾種混合的炒法都有,正所謂條條大路通羅馬,總之能賺錢就是好方法。另外方法要適合自己的性格,所以不能完全 copy 別人的方法,別人用這個炒法成功,不代表你照 copy 就可以成功。

筆者在這裡分享的風險管理方法也一樣,未必一定適合各位讀者,不過知多一種方法也是無壞的。這篇文要分開兩篇來寫,今次先談止蝕的必要性,下一篇再談風險管理。因為如果讀者是買股堅拒不作止蝕的一族,就沒有必要再讀下一篇。

筆者目前組合用的風險管理系統,基本上源自於兩個人的理論:Dr. Van K. Tharp 和 Dr. Alexander Elder。

前者的著作:《交易 - 創造自己的聖杯》(英文:Trade Your Way to Financial Freedom)
後者的著作:《走進我的交易室》(英文:Come Into My Trading Room)

兩者和筆者的風格相似,都是把投資股票當作 『交易』,即美其名是投資,實質叫做 『炒股』^^。這樣可以免除了和股價談戀愛,以及過份運用主觀的視點,去美化一隻股票,催眠自己去長線持有,甚至是股價越跌越加注。

視每次買賣股票為一筆 『交易』,和自己開服裝店賣衫無分別,著名的華爾街黃衫與紅衫的比喻都有講,假設你買入一批黃色衫和一批紅色衫,紅色衫大賣清貨,黃色衫賣不出去,代表潮流是偏向於紅色衫,這時你會死守那一批黃色衫的貨,甚至再加大本錢去買多一批嗎?聰明的生意人會把黃色衫減價出售,套現去入多一批紅色衫吧?

這和股價的止蝕原理一樣,如果把止蝕視為洪水猛獸,要你蝕錢去沽一隻股票,好似割咗你一塊肉咁,那麼你就等於死守黃色衫的商人一樣。除非你有非常精確的大局觀,你清楚知道下一輪潮流必定興黃色衫,你目前死守甚至加碼買入,不久的將來必定會大賺而特賺啦。但這已是基本分析或者宏觀經濟的高手級別,如果自問未到這個級別,還是先跟風,跟隨潮流去作交易吧 ^^。

交易的成功,止蝕和紀律佔了很大部分,Van K. Tharp  甚至認為,買入價並不重要,止蝕價和買入後怎樣去處理那隻股票才是最重要的。下一篇會正式講他們的風險管理系統。

P.S. 爛 gag:黃衫和紅衫比喻,與筆者的政見無關 ^^


2014年11月15日星期六

場合

我好奇怪某大學校長竟然最終忍唔住,畢業生在台上撐黃雨傘,於是決定拒發畢業證書給該畢業生,又拒絕和他握手。其實你哋都忍咗咁耐啦,點解唔忍埋落去呢?有今時今日的局面,你哋校長都好有責任,早早有政府官員係台上比畢業生打交叉手勢時,你哋無公開發聲指責該行為,反而一直忍讓,咁不如就一直忍落去啦 ^^

今次我係睇好你最終要為事件道歉的,因為大學已是一間店舖,學生是顧客,顧客永遠是對的。而未來也是屬於學生的,所以校長你就認了吧? ^^

我自己已大學畢業了超過十年,我的思想已經 out 喇,但可能我鬼仔性格啦,我始終接受唔到某些大學的觀點 ^^''':

某些大學生觀點:畢業典禮是屬於畢業生的,畢業生才是主角 (咁即係做咩都得?)

我老餅的觀點:如果畢業典禮只屬於畢業生,咁要主禮和觀禮嘉賓做乜,不如台上得一個校長,台下得一眾畢業生已經攪掂啦

某些大學生觀點:上到台就是個人時間,個人表達意見又怎影響到其他人?

我老餅的觀點:如果上台只屬於你個人,即係上台時對其他人可以用不理會,而下台後你又可以不理其他人,咁其他人一早坐係度觀禮做咩,不如係場外食下嘢、吹下水,到誰該上台時先叫名入場,咁得唔得?

某些大學生觀點:學生有權表達自己的意見

我老餅的觀點:表達意見是否不需要分場合?如果將來所屬的公司開會討論業務問題,你又係會上表達自己的政見?你去參加醫學研討會,有權在會上講政治?人哋開會講經濟問題,你又可以表達你的政治高見?
 
某些大學生觀點:學生完全有自由係台上撐黃傘,校長連一把傘都容不下,是自己沒有器量

我老餅的觀點:就算在自稱全球最自由的西方國家,出席喪禮的人都要清一色穿黑衣服,你可唔可以穿一件黃色衫去?連穿衣服都無自由?連一件黃色衫都容不下?無錯,你就係無自由亂咁黎,但你有自由選擇唔出席

最後我祝福大學生們有一個光明的前景,因為未來是你們的,可能我有朝一日會見到畢業生去見工時,都撐起黃色雨傘,創造歷史,敢於向未來老闆挑戰,勇氣可嘉,諗起都令人興奮 ^^

2014年11月14日星期五

圖表分享

很久沒有 post 過圖表,不知有沒有從前老師般的 「貼圖」效應呢? ^^

其實圖表來來去去都得幾個走勢,不外是三角形、杯柄、長方形區間、頭肩底等等,主要都是看突破線 (原阻力位) 和 成交量。股票要展開一輪明顯升浪時,幾乎都不約而同出現大成交陽燭,代表有資金追入才有得升。以下網頁是之前網友分享給筆者的,可以用來尋找每天的成交異動股:

http://www.analystz.hk/stock/turnover-filter.php?dn=20&diff=200&istolim=1&tolim=20000000&filter_ud=0&o=GREATER

以上的 link 是筆者個人的設定,把成交金額設定成至少 2 千萬港元,以及只列出成交額大於 20 天平均成交的 200% 的股票,大家可以按自己喜好來自行設定。





以上幾幅是港股突破股的圖表,圖中的藍色箭咀顯示出突破時的成交放量,而當股價從固有的形態中突破而上之後,好多時都會再次做出一個調整位置,上圖多數是以一個 U 型作調整,調整時只要成交量不大的話,是沒有問題的。

大多數強勢股票先做 「形態突破」,再做出一個小 U 型調整,然後又再破頂而上。#2382 則是一個杯柄突破。



美股其實也大同小異,筆者的美股倉這個月的回報,都是靠以上兩隻的突破股,PTX 大成交突破三角形,然後出現兩週的調整,調整時成交不大,調整完畢在業績後上升。

TGTX 有點奇怪,是在杯柄的柄部高最做出大量成交,再突破時成交反而不是放大量,但形態上算是不錯的。

2014年11月11日星期二

令人失望的港股

希望今日的標題也有反效果。港股實在今人失望,在滬港通終於可以開通的消息下,恒指曾一度升超過 400 點,下午升幅急降,全日只升 194 點,圖表上出現一支大陰燭。即日圖表港股就由開市高位急墮,但國內股市相反,全日是急升,上證綜指急升 2.30%。

本來今早大市急升時筆者也跑輸大市,其後更加無乜肉食,#750 中止蝕沽出,倉內只得 #1918 升得叫做較靚仔,其他股票都沒有表現。AH 折讓股應該是今天表現最強的股票,但我一隻都無 T__T。

相反美股連日創新高,這幾天升幅不算多,是微升格局,但股仔卻表現不錯,由大市袋鼠尾見底筆者開始審慎買貨,結果之後 6 筆交易暫時全是正回報,有部分持股已經能夠把止蝕位推高了,維持整筆交易風險不變之下,可以按比例加注。目前持股仍是:PANW、PTX、TGTX、GMCR、AGN、ZTS。

因為怕美股業績波動,筆者盡量選有一段時間才公佈業績的,或者在績後有好表現才買入。ZTS、AGN 都是績後才買的,PTX 買時未有公佈業績日期,其後公佈是今天出 Q3 業績,績後暫時有好表現 ^^。 

2014年11月7日星期五

美股破頂

夜晚湊女無覺好訓,今早出一篇短文偷下懶算數 ^^。美股話咁快已由低位回升及破頂,美股強時,港女弱,這是真理就不再多解釋了。

這一輪港股反彈,如果能及早在反彈初期入貨,追入比大市更早回升的突破股,應該都搵到啖食。但好多時大市反彈初期情況未明朗,入貨都係好審慎 (如筆者),到大市逐步轉好才加倉的話,到現時可能得返個 "桔"。

這一輪的確較難搵食,一些上升趨勢的股,可以突然有壞消息插到反肚,如 #598、#2688 等,也有炒高配股的,最近也有些單日做出假突破,然後又跌返落去的。總之選股就如買六合彩,真係睇運氣,無論技術分析和基本分析,這一浪短線都較難操作。

筆者有些股都仍在坐貨中,不過對一些仍保持上升趨勢的股,止蝕位一早放寬了,入市的注碼減少了,就宜保持耐性,等趨勢真正逆轉才止蝕。筆者目前港股倉的風險是組合的 3%,仍持有 76% 現金。

2014年11月1日星期六

反彈而已?

近排偷懶少出文,其實連股市都較少睇,沒有更新 watch list,因為忙於......芒亨 ^^'''

今日篇文標題係呃人的,因為筆者的標題旺旺有反效應,所以不敢說明:其實筆者認為大市一早已見底,今次好可能是一輪新升浪的開始 ^^。港股早前的絕對低點當天出現大成交單日轉向已有跡象,而美股低點是大成交袋鼠尾,再配合之後的 follow through day,力度比港股更加強。

目前在環球經濟的角度去睇,我覺得無乜重要嘢需要擔心,睇新聞美國的經濟數據一時好一時壞,其實只是在乎於 「高於預期 」和 「低於預期」,預期這個詞,其實是為升跌市的事後解釋而已,根本無參考價值。可以咁講,睇美國股市就知,其經濟過去幾年一直都向好,未壞過。

不過當大牛市升到一定程度,就自然會出現轉折點,但當時經濟數據可以仍然好強勁,但股市已靜雞雞轉勢回落。所以股市的走勢有重大參考價值,我個人覺得睇住走勢,遠強於自己對經濟勉強作一些解讀,因為我們不是經濟學家,對經濟分析永遠強過不經濟學家,但經濟學家不是股市炒家,他們好多時炒股都損手爛腳 ^^'''。炒股和經濟有時是完全兩回事。

現時最大隱憂可能是伊波拉病毒,不知何時會在歐美爆發開去,甚至傳到來亞洲地區。不過驚這些未發生的事是沒用的,最緊要自己控制好組合的風險。

目前筆者港股組合持股:#460、#750、#2342、#2010、#570

美股組合持股:PANW、PTX、GMCR、AGN、TGTX

分別持有五隻股票,風險均是組合的 2.5% 而已,因為近排忙不敢太進取,等持股有明顯利潤,證明自己看對後,才慢慢加大注碼吧。但筆者有個缺點,就是甚少有興趣玩一些貼市的股票,所以當升市時經常跑輸大市 >_<



2014年10月27日星期一

劃線

李小加稱暫時未有開通滬港通的時間表,這應該也是大家預料之中的事,佔領行動一日未結束,滬港通開通的可能性都微。美股最近強力反彈,輪到港股弱勢。

本來不想多講政治,但睇完周同學上講清講楚的節目後,筆者又忍唔住抽一抽水,我諗唔止我一個咁諗,周同學成篇訪問完全無 point,都唔知佢想表達 D 咩。星期日早上剛好又睇到中文副大授沈旭暉先生上講清講楚的節目,筆者雖然只睇了上半場,但終於明白為何佔領行動得不到大多數市民的支持。另外也很欣賞沈先生作出中肯、理性的分析。

沈先生講出公民抗命,最重要係 「劃線」清晰,他舉了兩個例子,一是有色人種抗議巴士公司種族歧視,不讓有色人種和白人同車,於是有黑人做出不合作運動,特登坐白人的車,但劃線清晰,是為了針對這一條不平等的巴士公司制度而做的。另一個例子是印度國父甘地,為抗議英國政府不合理的鹽稅,於是自己走私鹽。劃線清晰,針對這條鹽稅法,所以走私鹽,但不會走私其他貨品。

佔領行動由最初的 「佔中」、「佔鐘」,變成差一點就遍地開花,最終出現 「佔旺」、「佔銅」。我諗周同學,你都解釋唔到佔領旺角和爭取民主有甚麼關係吧?由於劃線變得模糊,由最初的對抗中央政府,展變成嚴重影響一般市民的日常生活,這是我理解的其一。

其二是 「公民提名」這個選舉法,本身也是焦點不太清晰,因為就算有公民提名,最終都必須有篩選機制,這個機制點樣定?誰人能夠掌控篩選的方法、權力?周同學,你又能夠答得出嗎?

因為一般市民都唔理解佔領行動是爭取緊甚麼,但就影響到日常生活甚至民生,又點樣令大家支持呢?其實講真這個世上邊個唔想自由、民主?如果民主能夠令民生更好,大家爭住舉腳支持啦。

依小弟愚見,其實民主派或者佔中的主辦單位,不如盡快搵一個想做、又有能力做特首、立場又較中立的 "他" 出來,睇睇普遍市民接唔接受 "他" 入閘。如果普遍市民對 "他" 比任何一個親中派更有信心,認為 "他" 做特首不錯的話,主辦單位就可以劃清條線,好簡單!行動目的只需要爭取 "他" 能夠入閘就可以了。立場會變得更清晰,更易令市民接受。

P.S. 點解 "他" 要立場中立?沈先生講的 「現實與理想」的問題講得好啱,空有理想主義但無現實支持唔 work 的,打正反共旗號的人能入閘做特首嗎?真心想參選特首的人,都唔會一早大大聲講我係反共啦,傻架咩!如果係咁,同長毛有咩分別?即係未入大陸境已攞晒反平 64 標語出黎一樣

2014年10月23日星期四

Follow Through Day?

技術上美股出現 follow through day,William O'Neil 的定義為:

1. 大市由低位回升第一天開始計算,follow through day 是在第四至第七天期間出現
2. follow through day 未出現之前,指數不能再跌穿前低點,否則要重新計算
3. 回升的第四至第七天期間,出現一日升幅 >1%,而當天成交量高過前一天的成交量

以上 3 點都滿足,技術上就是 follow through day,大市見底的機會增加。不過近年只可以作為參考,還是睇返其他指標作引證。

美股大市自出現尾巴回升當天計算,剛好第四天出現 follow through day,但當天的成交量雖然高於前一天,但並沒有大幅放量,反而比早幾天的成交量還要低,老實講單以成交量睇上衝力度可能不足。

昨天港股也出現指數上升 >1%,而成交量高於前一天,但自見底回升的第一天開始計算,已是第十四天,根據 O'Neil 所講,又是力度不足的。現時 50天線仍是向下彎,代表長期走勢的 50週線也開始向下,出現 follow through day 不代表要瞓身入市,宜等指數走勢逐步回升才逐漸加倉。

某些股票受大市下跌影響,筆者覺得選股仍要以強勢為主,大市早前大跌,但某些個股仍守得住前突破點,又守在 50 天線之上未失守過的,當大市回升也大市早一步再破頂的,是為強勢股。

有些強股早前可能受大市下跌影響,短暫失守上升軌或重要支持點,但其後好快又回返其上的,也是不錯選擇。

如早於大市開始轉弱,比大市更快失守 50 天線及支持位的,而在這一輪大市反彈又無力回升的,則是弱勢股,暫不宜沾手。

2014年10月18日星期六

美股反彈

昨晚美股反彈,道指曾一度上升超過 300 點,標指和道指的袋鼠尾基本上已成立,兩者早前失守的前重要調整低點 (可以稱為頸線),昨晚已經反彈到此點附近,下週能否再一舉突破其上?如果是這樣,不排除是一次假向下突破,有望仍保住長期上升趨勢。

前晚只小注買入 PANW,昨晚 watch list 中未有心水股票可以買入,暫時仍是審慎的輕倉出擊。由於已到業績期,我選股之前會先看其公佈業績的日子,盡量買一些未到公佈日子、而日子較遠的那些,因為業績當天的股價可能大幅波動,而事前是沒有任何先兆的,一開市可以大裂口上升或下跌,對於有預設止蝕位的炒家來講,是很難控制風險的。另外也可以吼一些已經出了業績,而績後市場反應正面的股票,如果當天是大裂口上升,可以等待之後出一個小型調整低點才買入。

港股倉目前持有 #123、#750、#460 三隻,留待下週如果市況是好轉,會再加倉買股。

我本來已不想再講政治話題,但香港的佔領行動繼續攪落去,好多佔領行動已經變晒質,我就不明白為何要執着於佔領旺角那一帶,有甚麼意義?如果大家心水清,會發現當初高叫 「我要真普選」的口號,已經好少人再叫。取而代之是特首下台、警察可恥、打倒黑警等的口號。究竟對民主進程有甚麼幫助?大家真的相信這樣能爭取到真普選?還是想尋找一個敵人,然後藉着和敵人全力對抗,從而令自己的怨氣得到發洩?

Sorry 今次又離題了,希望大家的答案留在自己心中,不用在留言區表達,每人應該有言論自由、思想自由,但言論自由已經不太適合於公開平台,以免引起罵戰和不愉快的爭論,讓我們保留自己的思想自由,把個人看法記在心中吧。

留言區歡迎繼續討論股票,講股票永遠是更愉快的話題  ^_^

2014年10月16日星期四

過山車

今日港股微升,大市成交淡靜,指數仍受制 10 天線,遲遲未有出現 follow through day,今日雖然不少二三線股表現強勁,但筆者始終想把風險保持在低水平,所以沒有加倉買股,目前組合最大風險大約 1.5%。

美股今晚一開市就大裂口下跌,但短短時間內跌幅大為收窄,以為是一個大奇蹟日。但之後指數又再大跌,執筆時兩點鐘左右,道指大跌 400 點,納指跌 >2%,走勢好似過山車。今晚歐洲主要股市都跌得好誇張。

有朋友問我,美股點解會如此大跌,認為百思不得其解,R 晒頭、無理由。我就話股市要升要跌是不需要理由,解釋只會在事後出現,仲要係強行為跌市自圓其說果隻。好似美國之前先話失業率創幾年新低,經濟增長不錯。現時又吹風擔心全球經濟增長?真係信佢一成雙目失明。

股市如此大跌,只因大戶在沽貨 (或者一早已派了好多貨出街),近日連散戶都開始恐懼性沽,所以無謂解釋。大戶沽貨可能有兩個原因:1. 有一場我們未知的金融風暴形成緊,當然大戶比我們早一步知道;2. 和以往美股調整一樣,是中期調整,大戶高位沽完貨,在調整低位買回。

如果是 2,當然調整完就無事,股市會繼續創新高,目前的跌市反而是低吸機會。但若果是 1,則有可能是熊市來臨,目前是低處未算低,太快撈貨坐到破產都未返家鄉 。而這些永遠是事後我們才會知道,現階段估黎都無用 >_<

2014年10月14日星期二

港股有沽壓

經歷美股大跌,港股今日開局表現算不錯,跌幅比預期細,其後甚至倒升 200 點,但午後走勢又逆轉,恒指出現一條長長的上影線,陰燭收市,受制前日的下跌裂口。自見那天單日轉向、成交千億回升的那天計起,今日已是第八個交易日,仍然未見 follow through day 出現,反彈力亦比預期弱。筆者本來認為指數在嚴重超賣後反彈,有機會短期反彈到 50 天線附近的。港股倉今日沽出 #13 微利。

美股經過一輪血洗,今晚大市暫時靠穩,不過開市早段藥股和生物科技股都重跌,執筆時跌幅已大為收窄,莫非做尾巴?十一月將會踏入業績高峰期,預計股價會大幅波動,不過最近動力股大跌,如果之後業績有驚喜反而又會裂口上升,所以近日的危機是否正是低吸的好機會?

2014年10月11日星期六

血洗美股




美股昨晚跌勢認真誇張,其實道指開市後一久曾一度回升,整晚也只跌 0.69%,不過道指近年的代表性已經不足。參考標指和納指和走勢,認真不妙。納指昨晚暴跌 2.33%,比週四晚更加誇張,大成交跌穿前低點。標指剛好跌到前低點支持位,但睇形勢都是危。

最近筆者整理的 watch list,偏重於三個較強板塊:health care、consumer goods、technology,所列出的 20 隻股票的觀察名單,昨晚有 18 隻下跌,其中 3 隻跌超過 10%,5 隻跌超過 7%,認真誇張!

筆者的兩隻股票也同時中止蝕沽出,組合虧損 1%。而港股倉昨天也由正數變負數,是筆者太過樂觀了嗎?操作基本上沒有大問題,一直都是審慎下注,但是 #13 反彈到 20 天線時沒有中目標價沽出,因為目標價 set 了是 $100,可能是 set 得太死板了,有需要隨着 20 天線的轉變而改價沽出。假設能夠鎖定 #13 的利潤,回報就不會變負數了 >_<

下星期港股真的要睇阿爺,但見美股跌成咁,情況都不太樂觀。這個星期政治風險未除,香港佔中未解決,西方國家和伊斯蘭國的戰爭睇怕會是長期戰,老實講就算西方國家今次滅了伊斯蘭國,將來也不斷會有新的恐怖組織出現。

美國在全球散播仇恨,不斷侵略和干預其他國家的內政,復仇只會整造更多仇恨、更多反抗,電影 「猿人爭霸戰」所講的道理,正是現實國際問題的寫照,電影中的猿人 「谷巴」,由人類中學會了仇恨,相反主角 「凱撒」則從人類中學會了愛、和平。結果 「谷巴」一心想向人類報仇,引發猿人和人類的大戰,從而又製做出更多仇恨。一旦人類和猿人相互有了仇恨,就會睇對方不順眼,對方有任何一個小動作,都會首先認為對方是想向自己攻擊,在未攻擊之前就反擊,鬥爭就因此而起。

今天社會上 「包容」這個字眼好敏感,講出黎分分鐘鐘比人笑、比人批鬥,好大的一條道理就是:「我包容佢哋,咁邊個包容我哋?」人性本應如此?

2014年10月10日星期五

美股 chok chok chok

昨晚美股成交放量地大升,筆者一心以為今日正是港股出現 follow through day 的時機,早上心急買入了 #750,結果一買即坐,#460 曾因好消息大升,但其後急轉直下,全日出現大成交 + 上影線 +陰燭,走勢不太妙。港股組合目前持有:#13、#123、#460、#750,今日完全跑輸大市。目前風險是組合的 2%。

昨晚美股不知是否算 follow through day,但筆者計劃如果今晚美股再升,就會加大美股倉位,怎料今晚美股大跌,執筆時跌幅比昨晚的升幅更大,這幾天美股走勢真是 chok 到暈。目前美股只持有:WWAV、CEQP 兩隻,只敢拿組合的 1% 出來作風險,兩隻都正在坐貨中 >_<

明天港股的走勢難料,之前也試過美股大跌後,港股卻有不錯的抗跌力。我自己先假設上星期五的低點已是短期底部,因為當時是單日反轉 + 成交過千億的陽燭,只要上週五低點沒有跌穿,有可能在中間位置做多一個小調整,然後有機會再反彈過。

2014年10月5日星期日

遠離政治

這幾天真是心灰意冷,講真筆者持有滿手現金,零負債,本應社會越亂、樓價股市越跌,我應該越開心。但事實卻非如此,筆者雖然不是香港人,但自小到大去過香港無數次,我的大學最 friend 的同學、朋友大多是香港人,眼見我由細見到大的熟識、繁榮的香港,變成這個亂局,我真的心痛。

早前自己勉強還叫做努力去作理性分析,嘗試去理解事件,分出誰對誰錯,分析事件怎樣解決。但這幾天見到大量短片流出,單睇短片是一回事,其後有更多更完整的短片流出,睇清楚一點卻又完全是另一回事。網上言論多數分兩個極端,大家互相引用所謂的 「證據」去指證對方的不是,一有人拍到片上傳,就 「拿拿拿!仲話唔係暴力?」「拿拿拿!咁叫和平?」「拿拿拿!仲唔係老屈?」筆者偶有發現一些作中肯評論的文章,就如獲至寶般開心。但最後也不禁問自己一句:其實我又是否中肯?我有沒有偏見?

一定有,任何人或多或少都有偏見,自認中肯的人可能未必中肯。正如自以為自己是正義一方,要去爭取公義的人,卻原來是做緊不公義的事,或者是傷害緊別人。我們不是聖人,根本就難分對與錯,政治更加不是非黑即白,而是有大量灰色地帶的。對與錯?要留待之後的歷史評論家去判斷了。

這個 weekend (即這兩天) 筆者是克意避開有關佔中新聞以及網上評論,只是間中友人會用手機通傳消息,這兩天盡量令自己心境平靜一些。筆者也決定以後盡量避開政治議題,把心力集中於股票操作之上,講真如果全民政治冷感就好有問題,但太多市民關心政治,把過多時間虛耗在政治運動上,也不見是好事。

講返股市,先不談政治風險,上星期五港股由大跌 300 多點變成下午倒升,整體成交略遜,不夠 1000 億, 但不少個股都有明顯的成交支持,好多都出現大成交 + 長下影線,似是尾巴。上週五晚美股道指也大升 200 點。如果明天港股能夠開出大成交陽燭收市,那麼可能真的會有一輪較強力反彈。

以上單論股市走勢,而沒有計算政治風險,政治風險是無得計算以及預測,但做風險管理卻是必要。在政治風險未除之前,不宜太進取。筆者週五只用了組合的 1% 風險去搏,一注拆開買入兩隻:#13、#123。

###上一篇的部分新留言筆者未有時間睇,有空閒睇返才回覆,見諒

2014年10月2日星期四

淡風

美國有第一宗本土確診伊波拉病毒個案,昨晚美股大跌,今晚繼續調整。今日中港股市休假,但日本股市則大跌,聽聞歐洲那邊經濟數據很差,今晚歐洲股市續跌。一下子好似全球股市吹淡風。

明天港股復市,但佔中持續,主導團體的目的已變質,由最初的要求有公民提名的真普選,變成現時的要求特首落台,由最初的要求特首和學生對話,變成現時的和特首沒有對話空間。而佔領的地方也越來越多,主導團體話要遍地開花,但受影響市民何時作出大規模的反彈,可能只是時間問題。到時就算沒有警方的武力清場,都會演變成市民與市民之間的衝突,長遠對經濟影響好大。

筆者仍然維持 full cash,雖然港股現時十分超賣,但暫時對撈底博反彈沒有把握。

2014年9月30日星期二

留言版 2014-9-30

留言區破 200,為方便留言重新開版,仍然不便為佔中事件作任何預測,世事難料,只希望最終以和平收場。可能有網友會問股市如何,或者對某股票有甚麼睇法等。老實講現在是一個難以估計的市況,任何風吹草動股市都會有大波動,這已經不是個股分析的問題,而是整個大市、整個經濟有着頗高險。總之要適量保持現金,自己對之有信心的股票不妨持有,如果是單以技術分析而論,則任何股票到價就止蝕,自動波基本唔洗煩。

目前股市是有三大風險:
1. 演變暴力清場、流血事件
2. 中央突然取消自由行
3. 中央無限期 hold 住滬港通

第 1 點相信無人想見到,第 2 點和 第 3 點則最有可能發生,長遠對股市都是有非常不利的影響的

2014年9月29日星期一

留言版 2014-9-29

事件演變得太快,我連到下午訓醒晏覺都未知咩事,要到晚上睇新聞才知咁大件事。本來不想出文,但留言版明天可能破 200,就先開一版新的,筆者仍未完全清楚發生咩事,事件未完之前作出評論是不公平的。總之辛苦了中立的醫護人員,麻煩你們留守醫院及到前線去救助傷者了,辛苦晒!

2014年9月26日星期五

搵錯對象

港股今日下跌,恒指、國指自失守 50 天線後無力重上,50 天線都開始向下彎。今晚美股暫時大跌,道指跌 250 點,納指更跌近 2%,如果明天阿爺唔識升,港股應該都無運行。黃金周前相關受惠股唔識升,有些更跌獲金,睇黎大家對這個黃金周都無乜期望。

學生們繼續罷課,筆者不敢討論對與錯問題,因為政治不是非黑即白,誰對誰錯,相信世上無一個人能夠有正確答案,包括你的父母、教師,罷課純是個人自由選擇,我們應該尊重。

問題是行動好似找錯對象。學生們一直要求和特首對話,今晚又集結在禮賓府前,要求特首出來回應。如果想找一個人出氣,要佢出黎認罪、謝罪、公審佢,咁樣無問題。但如果係想通過對話去爭取公民提名,現時仲搵特首?有用咩!是否浪費時間?

我舉一個比喻,一個家庭,父親是一家之主,掌握財政大權,家中大事一定由父親話事。母親只是照顧小孩的日常生活以及做好家務。有一天小孩們想父親大幅增加佢地零用錢,佢地首先向母親投訴零用錢太少,由母親做傳聲筒向父親表達訴求。

但經多次傳話,父親仍然唔批准。小孩於是決定把行動升級,向照顧日常生活的母親抗爭,罷食、罷訓、罷學,以求達到增加零用錢的目的。佢地又知唔知,母親話唔到事,無論佢哋點噪,母親都係要向父親請示,父親唔准就是唔准,母親只是一個傳聲筒。點解唔直接和父親對話呢?

現實中誰是母親、誰是父親,相信大家都明。到了這一步,中央已經落閘,再要求和特首對話真係無用,特首能夠答應比你公民提名?公民提名是違反基本法,相信這一點不用再討論,要求中央批准公民提名,其實等同要中央更改基本法 (或者破例一次),咁大件事特首完全話唔到事,仲搵佢傾咩呢?而且到 2017 年普選,無論以任何形式進行的選舉,CY 九成九都無得參選,咁其實關佢咩事呢?

要直接挑戰父親大人,當然先要有籌碼係手啦,要做一些足以令父親頭痛的事,或者是足夠的威脅。所以才會有早前的佔中行動,佔領中環癱瘓全港經濟,問中央怕未?可惜吹了又吹,吹足年半都未攪得成,現在好似話改係 10月1日飲宴?攪咩呀?其實轉移視線唔想攪佔中,但又想搵個下台階吧。假期流流就算真係佔中都無用啦!事實班大人已經縮晒沙,學生們又能做甚麼去改變局面呢?

2014年9月24日星期三

i 瘋跌價

今日國內股市回勇,港股也跟隨反彈,今晚美股暫時也回升。今個星期開始檢視所有港股板塊,以整理 watch list,備戰十月重出江湖 ^^。

最近都市話題不離:1. 罷課;2. iPhone

我一直對智能手機無乜研究,以前用過 i瘋 1 及 2,只是貪新鮮,touch screen 做得好流暢,以及貪型!但用過後發現真的唔適應,必須經 iTunes 以同步的方式去抄 files,即使只係簡簡單單想由電腦過一張相落手機,都要同步,仲要跟 account 跟死一部電腦,所以怕怕了。

以及轉用 Note 因為貪佢夠大部,睇漫畫一流,自用慣了大 mon 機後就返唔到轉頭,從此不能再用返細 mon >_<,而 Anroid 是真心方便的,以及可以自己隨時換電,我叉定兩舊電隨身帶住,就唔先驚無電,又唔洗帶屎袋 ^^。不過三星機硬件軟件真心流,我部 Note 3 剛用無幾耐,個中文手寫軟件竟然經常 "停止運作" (hand 咗),要等幾分鐘先用得返,激死人。但都係返唔到轉頭,叫我用返 i瘋真係唔慣。

聽聞 i瘋 6 收機價已下跌咗好多,有傳早前以高價收機的大陸炒家,蝕到入晒肉,有些稱入了重貨一獲蝕數十萬人仔。其實高價收手機,真的屬極高風險,比短炒股票更難,因為要以極快速度尋找一批傻仔以更高價接貨,如果拖得慢個價就越跌。

我就從未見過電子產品會保值,手機貨源只會越來越多,回收價只會越來越跌,高價收機來炒,如果仲要吊高黎賣,註定蝕錢啦。

-----------------------------------------------------------------------------------

Update:


Capmo 大哥短炒愛股 #3899。之前我也有研究把下降通道 + RSI 底背馳列入系統,正如圖中的玩法,但是早前用過在 #1112 身上結果止蝕收場,發現買入點和撤退掌握得唔夠好,於是把這個玩法暫時剔出系統,短線博反彈專心玩袋鼠尾算數。

但之後有時間可以再研究多些,好多高手炒家都有玩底背馳的 ^^

2014年9月22日星期一

爸爸上市

先講大市,相信大家一早已對阿里爸爸上市有戒心,因為唔少股評家都認為,阿里爸爸在美國正式上市,就是科技股大跌之時。今晚暫時睇,美國科技以及動力股又真係跌唔少,納指是三個主要指數中最差,暫跌 1%。筆者早前測試交易平台而小注買入的 TSLA,今晚暫跌 5%,可能今晚隨時會中止蝕 >_<。

今日港股恒指雖然跌 350 點,但暫時未見到個股有洗倉潮出現,反而今晚美股動力股跌幅真有點嚇人。如果今晚美股收市下跌,聽日阿爺又唔升,港股都應該無乜運行 ^^'''。
不過要講返阿里爸爸,主席馬雲就是一個活生生的奇蹟,佢開始創業只不過是廿幾年前的事,當時佢可能仲窮過我和你,一般人可能供樓都供足廿幾年,但馬雲廿幾年間發展到一間咁龐大的公司,佢為人係點我就唔多清楚,但好佩服佢的生意頭腦,當然最重要是食正中國經濟 + 網路科技的高速發展這兩條水。聽聞馬雲都試過多次碰壁,之前搵投資者支持都個個 say no,現時佢公司市值已超越唔少美國科技大企。

現時成日聽到年青一代怨買樓難、政府衰、前途灰暗等等,其實話就話事勢做英雄,但點解英雄永遠只是少數?因為大部分人都只懂得怨,正如英哥所講,從未聽過一個人怨就可以發達的。


2014年9月19日星期五

獨立公投

留言又快破 200,出一篇吹水短文頂一頂。先說股市,前日反彈,昨日又跌回,但恒指的支持位仍有效。美聯儲局一如預期按計劃減買債,但未有加息,美股回升。筆者的新資金基本上已到位,下個月重新開兩個大倉:港股和美股,又要開始努力搵食 ^^。

蘇格蘭獨立公投的投票已完成,現在應該在點票階段,結果可能於日內公佈。歷史上蘇格蘭和英格蘭有着千絲萬縷的關係,面對英格蘭的侵略,蘇格蘭曾經發起過兩次獨位戰爭,第一次是我最愛的電影 《Brave Heart》中,由英雄 William Wallace 所帶領。其後也試過一個國王同時管治英格蘭和蘇格蘭兩個獨立的國家。而近代蘇格蘭其實有一定的自主性,聽聞蘇格蘭有自己議會。

今次如果真正獨立,我唔清楚對蘇格蘭人民是好是壞,但大英帝國的國力就一定是減弱了不少。開始有人討論中國西藏、新彊等地是否應該獨立,我個人雖然意願是保持國家國土的完整性,但對中國來講,西藏獨立可能真是影響不大,反而如果獨立,對西藏本地的經濟打擊可能好大。

至於香港也應否獨立呢?呵呵,我就不便多言,稍為頭腦清晰的人士,都應該識得揀 ^^

2014年9月16日星期二

打風半日市



昨晚澳門零晨 1:30 才掛八號風球,今日大家休息了一個朝早,相信中午就要出門返工了。港股中午開市,剛開市時我 check 只微跌,但忙完收市後再睇,竟又跌 200 點。睇一睇圖表,應該已跌到支持位附近,上年十二月前頂的位置,之前以大成交突破的突破線,相信有一定支持力。若果再調深一點,真要見 50 週線了。

昨晚和朋友飯局,好多朋友都不相信澳門樓市會怎樣下跌,話最多跌一兩成已經好甘,因為澳門有賭場撐住,好多朋友認為澳門前景比香港好。筆者睇法有點不同,雖然未至於睇得好灰,但澳門經濟太過單一化,亦太過依靠單一資金來源 (就是國內),其實風險是頗高的。一旦自國內流入的水源大減,當對澳門造成好大衝擊。

剛開始炒股時,有前輩高手教路,如果想對大陸以及香港經濟收風,最好和一些廠家佬多吹水,他們對經濟動向好有前瞻性。而澳門廠家佬近日多了套現行動,可能暗示澳門經濟已走到一個暫時的頂鋒,未來幾年好有機會回落。

濠賭股今日繼續下跌,金沙 #1928 RSI(9) 跌穿了 10,真的殘到無朋友,令筆者也有點心動是否出手撈一撈 。不過週線仍未到非常超賣,撈中線反彈可能未到位,而短線反彈則難捕捉。

昨晚美股納指跌 1%,有些科技動力股紅海一遍,TSLA 大跌 9%。筆者已好耐無睇過美股,今晚要開始做返份 watch list,睇睇有無好的交易機會,順便學下用 IB 的交易平台 ^_^


2014年9月10日星期三

轟天猛將 (劇透)

近日筆者的 「港股強勢」標題一出,大市又回軟,今朝無睇市去了做物理治療 (打波傷了背肌),回來一看已跌 400 點,自己暫時唔知咩事大跌,唯有歸咎於我的標題有反作用力 ^^

尋日假期 family day,其實也不是全日看護兒女,只是早上和老婆仔女去街,下午兒子去了外婆家,只是看顧小女一個下午,但尋晚自己已覺得身心疲累 + 頭痛,由 11 點訓到今朝都唔知醒,累過炒股十倍。難為外婆 (即我岳母大人) 每天要照顧四個孫,真的要向她致敬!



八月十五去了睇龍哥的 《轟天猛將 3》,觀光塔下午場有優惠 $40 飛,真係抵睇過老翻啦 ^^。一如既往張海報份演員名單水蛇春咁長,不過今集的陣容之鼎盛,絕對是三集之冠,我睇完前兩集都話,以集合過去動作片名星來講,《轟》片還欠一個 Wesley Snipes,他和上集的尚格雲頓相似,都是 B、C 級的動作片王之一,拍了大量動作片,不過電影界名氣卻不只屬 B 級,成名作是 《刀鋒戰士》糸列。

但令我驚喜的是,龍哥竟然請得動巨星級別的 夏里遜福 (福伯) 和 米路吉遜,兩人都是筆者童年偶像之一,福伯成名作唔洗講一定係 《奪寶奇兵》系列,米路吉遜則是 《轟天炮》系列,但我最喜歡米路吉遜的戲是 《Brave Heart》,真的睇完又睇,好睇到喊,睇到識背 ^^

今集也加入了,和龍哥以前做過對手戲的 Antonio Banderas,變咗一個識打的 Mr. Bean,成日搞爛 gag 煩死人 ^^'''。Kelsey Grammer 我是睇變形金剛 3 才認識的老演員,今集只是閒角。另外加入了四個新丁,我只識其中兩人,做 《大力戰神》的大隻佬  Kellan Lutz,以及 MMA 女格鬥家 Ronda Rousey,其他兩個真係唔識。本來話今集有成龍,連個人造型的海報都出了,但最後又無咗佢,唔知點解?

今集最後大佬係米路吉遜,但老問題:龍哥陣營太強,米路吉遜的反派陣營太弱 (和上一集尚格雲頓一樣),雖然反派人數眾多,但大部分都是出來送死的。戲中講述米路吉遜原本是轟隊的元老級成員,但最後和龍哥反目,龍哥憎到佢出汁,但戲中只是輕輕以幾句對白來交代,好似描寫得不夠。而福伯所屬的另一隊 CIA 組織,又交代得唔清唔楚。不過這類動作大片,也無謂深究劇情,總之動作場面拍得精彩,一邊食爆谷一邊睇得過癮就 OK 了 ^^。

今集龍哥大玩 「新舊交替」,想搵來一班新丁頂替舊的戰友,但新丁經驗不足比人捉晒,又要出動舊的一班去拯救,最後一場大戰,新舊兩代一起 team work,對決人哋整支軍隊,最後一戰的群戲拍得確實精彩。

在群戲當中必然也加插了不少個人show off 場面,每一集都會比 Jason Statham 和敵人隻 dup 以表演身手,但問題是今集敵人更弱,反派不知名的大隻佬,我原本以為是米路吉遜的左右手,點知和 Jason Statham 隻 dup,頂唔到幾下就比人狂打,單純做人肉沙包 ^^'''。Wesley Snipes 雖無個人隻 dup 但有唔少表演身手和刀法的戲份。其實如果可以把 Wesley Snipes 變做反派,和 Jason Statham 隻 dup 會精彩好多!

格鬥女王 Ronda Rousey 當然也有唔少表演綜合格鬥技的戲份。連口水佬 Antonio Banderas 都竟然有唔少動作戲,但李連傑卻完全無表演機會,和 「州長」兩人在直升機上,一人一支重機槍屈敵人機,重機是「州長」的標誌,但既然請得李連傑,點解連一點格鬥戲份都無?福伯太老真唔期望有動作戲份,渣直升機就最啱佢 ^^。

最後睇見米路吉遜孤立無緩,我真心有點同情佢,全部手下都幫唔到手,最後要自己親自出馬。但本身講到佢冷血無情,為咗勝利根本唔會顧道義,咁點解佢用槍指住龍哥時,竟然自己放低槍要求隻 dup?米路吉遜雖然也是動作明星,但論肌肉論打架技巧,點及洛奇化身的龍哥?最後又慘變洛奇練拳的沙包 >_<

過去兩集 《轟天猛將》在全球狂掃數十億票房,此系列絕對是龍哥老年最成功的投資之一,預計將會長拍長有,聽聞第二集本來想去中國取景,但不獲當局批準,希望下一集能夠在中國或香港拍攝,順便加入成龍、宇宙最強以及洪金寶等明星,希望可以還我等七十、八十後的動作片迷的一個心願。

P.S.雖然有大量香港人極之討厭成龍,其實也歸咎於佢時不時幫中央說話,又話中國人是要管的等等言論吧。但以事論事,作為過去的國際動作巨星,成龍入圍 《轟》片是理所當然的

2014年9月4日星期四

股市強勢突破

近排甚少發表對股市的睇法,以及對個股的圖表分析,因為太忙沒有睇市,但筆者並不是完全唔理股票,只不過是沒有留意當前的市況,筆者是忙於整理一套較完整的交易系統。另外也忙於處理部分公司旗下的資產,我早兩年沽售了一個私人工廈單位,由 06 年以一百萬左右買入,七年後以八位數字沽出,賺了八倍左右,當時工廈尺價大約千餘,我朋友話會唔會太早沽出,唔驚仲有得升?我話佢夠胆就升到五千蚊一尺,我再賣賣賣!然後全家都可以退休!

當時只是戲言,因為連我都唔信工廈尺價會升到 5 千大元,但今年竟然實現了!超過三十年樓齡的工廈,竟然可以升到 5 千蚊一尺,我除咗 O 咀之外都唔知講咩好!唯有又套現啦,退休就未喇,仲有排崖世界 >_<

昨日港股強勢突破,成交千億。但我標題一向好反效果,唔知今次會唔會又連累大家? ^^'''

2014年9月1日星期一

開學大日子

明天就是開學大日子,兒子升 K2,筆者又要過返每天晨咁早起床,帶兒子去搭校車的日子。現在幼稚園英文程度都好深,又好多功課做,更加有好多課外活動以及勞作,唔止小朋友辛苦,家長都要做埋一份,認真攞命 >_<

明天股市估計沒有大變動,因為佔中完全無咗影,變成一次集會,仲要只得五千人。佔中發起人唔係一早已經知道中央會落閘?依家仲要部署?洗唔洗比兩年時間你哋部署點樣攪?^^

睇新聞初步知道中央已 ban 死公民提名,由四大界別 1200 人組成的提名委會員負責提名,超過半數人認為 OK 才可以入閘做候選人,但特首候選人數只限 2-3 人,又好似少咗 D?其實有無公民提名唔係最重要,最重要係提名委員會的提名,會唔會一面倒全部揀親中人士入閘,還是以個人的政治、管治能力去考量。其實作為一個小市民,只希望選到一個做得嘢的特首,能夠解決好多民生問題,而唔係一味選親中、或者反中人士。

網上新聞有些留言好攪笑,網民 A 話:如果三個人係張融、吳X北、譚X宗,咁點樣揀?網民 B 立即神回答:咁如果三個人係長毛、陳X君、肥佬黎,咁一樣點揀先?更加有人提出三人可能係:董怕伯、煲呔、CY,又點揀?但竟然唔少人回答:一定會揀董伯伯!可見當年董伯伯的 8 萬 5 其實係好心,但當年比人鬧到狗血淋頭,依家才有人記掛董伯伯的好。如果這三人真係重新比大家揀一次,大家又會揀邊個呢?

有得揀總好過無得揀。今日澳門特首吹先生就成功連任,因為候選人只得佢一個,真真正正係無得揀!其實特首這個位唔係人人都可以做,也唔係人人都願意做,在澳門你無勢力真係做條毛咩,除非得中央力撐,否則無權無勢點樣同 D 大商家、大賭企咬手瓜?比人玩都玩死啦。香港特首這個位更加係豬頭骨中最難梗的一塊,邊個做親都係千古罪人。

我真心想泛民有人入到閘,選唔選就後話,若果真係選到,又睇下佢係咪做得咁好。定係插人就天下無敵,自己做就......

2014年8月28日星期四

落閘

近日真係好少留意股市,忙於自己工作,以及在重寫一套交易系統,雖然話 「重寫」,其實大部分都是整理,保留了以前的追勢系統如突破買入法,以及反向系統如袋鼠尾等,也加入一些新系統,如袋鼠尾反彈過後的後續處理,以及一旦錯過了突破點,股價已經急升,要等回調到哪一個水平才可以買入等等問題。所以今個月仍然少做交易,較少留意當前股市。

筆者一度認為已胎死腹中的 「佔中行動」,近日又再興起,仲要講到今個星期日立即行動咁快手。主要是中央好似想落閘,一刀切 ban 死 「公民提名」。筆者個人睇法,與其話中央驚 「公民提名」,不如話中央沒有把佔中三子放在眼內。在 2017 年普選之前,其實仍有大把時間可以玩落去,但中央現時有機會一刀切,迫你班友仔行動,其實驚的不是中央,反而是佔中的領頭人以及泛民成員,現在佢地應該好頭痕 ^^。

點解佔中可以一拖再拖?有人以此次事件搵食,有人靠這個威脅來換取政治本錢,不同人有不同目的,但領頭人是否真的為了民主呢?我就笑而不語了。當大家以為有排玩,點知中央突然落閘,真係唔方唔頭都痕。領頭人真是為了 「公民抗命」甘願付上一切代價嗎?泛民真的有決心連議員都無得做,不惜一切去參加佔中?就等我睇睇佢地的氣量吧!

其實我個人覺得 「公民提名」未必是必要的,大家先不要罵我做五毛,原因不是共產黨,而是選舉的問題,無理由提命一些完全沒有政治經驗的人去參與特首吧?另外就算公民提名都一定要有一個預先的篩選過程,否則有一萬人受提命,一萬人都可以參與?選到何年何月先選到?

若果沒有公民提命,那麼入閘的篩選條件才是重點,如果入閘條件不是一面倒偏向親中人士,可以給反對派也入閘,那麼「公民提名」未必就是必需的,正如美國總統選舉,都只是政黨提名,而非公民提名。如果泛民能夠入閘參選,那麼佢地還會參與佔中嗎?仍要堅持公民提名嗎?其實入到閘已算是公平,只要最終是香港公民一人一票選的,那怕泛民只有一兩個人入閘,只要大部分香港人 buy 你做特首,始終都會選到你的。

目前反對派好似講到,沒有公民提名就是假普選,反對佔中就是五毛亂黨一樣,其實一個民主社會,大家有不同政見是非常合理的現象,如果七百萬人都持相同政見,我諗只有洗腦先可以做得到。唔支持佔中其實未必代表親共,有些人只是不想社會動盪,以及想保住自己飯碗而已。

P.S. 我自己其實好想睇到佔中攪得成的 ^^

2014年8月26日星期二

玩大咗的超能煞姬 (嚴重劇透)

 近日好忙沒有時間睇股市,所以也沒有甚麼關於股市的可以寫,唯有用我的一篇影評來頂頂先 ^^ 

P.S. 以下內容劇透,未看過電影的請不要看,直接在下方的留言區吹水吧! ^^


《LUCY:超能煞姬》本以為是一套半科幻動作片,我入場其實是想看 Scarlett Johansson 以 「黑寡婦」的身手向黑社會復仇,但原來電影中 Scarlett Johansson 只有一場簡單的動作,其餘都唔洗打,套片科幻過科幻片。

先講導演洛比桑,佢執導的電影我好少睇,只係睇過《這個殺手不太冷》、《第五元素》等三兩套,但佢做編劇寫的電影就睇唔少,因為我是動作片的超級痴迷。佢慣咗寫到主角 Tony Jaa 上身,以極誇張的動作一個打幾十個,另外洛比桑應該非常不滿法國警察,佢寫的電影中,清一色法國警察好鬼廢,廢到無朋友果隻 ^^''

如 《換命快遞》系列,法國警車永遠追唔到主角部寶馬,永遠都係炒晒車,或者比人甩九條街。又如 《猛龍戰警》李連傑隻身走入警局,一個打五十幾個,把警局全部人都 KO 完畢,然後全身而退仲可以獲好市民獎果隻 ^^'''。

這套 LUCY 不例外,台灣幫韓國佬 (好矛盾囉!) 走去法國控制成間醫院,殺晒警察後仍然可以輕鬆走人,之後警察 call back up 十幾架警車保護間大學,台灣幫韓國佬竟然係警車面前攞晒機關槍出黎都無事,洛比桑分配比法國警察的只係手槍仔,韓國佬就有重火力機槍以及火箭炮,點打呀大佬!韓國佬連大批軍火都運到入境,其實點解運幾個包毒都叫其條 「蛋散」幫手?

講返這套科幻電影主線,電影一開波就講主角 Lucy 無辜被捲入毒品事件,導演用獵豹捕食的紀錄片穿插,帶出 Lucy 成為
獵物,逐步跌進陷阱之中,拍攝手法幾新鮮。其後台灣幫韓國佬 (真心唔白點解唔索性搵過台灣人?或者索性在韓國取景?) 威嚇 Lucy 帶佢運毒,劇情就開始失控。

Lucy 都未運毒過景,班黑社會就想 「攪」佢?對佢又打又踢,唔 make sense。Lucy 其後毒品爆肚而變異,但變得超級誇張。勁過 LEVEL 5 的變種特攻 (實力在磁力王之上)。黑幫基本上完全無還手之力。之後 Lucy 找到 Morgan Freeman 飾演的腦部進化的權威教授,我開始當部戲係 Cult 片來睇。導演是否有心搵 Morgan Freeman 來做?因為有衰鬼上帝 feel?Lucy 確實和 Freeman 的衰鬼上帝調轉身份,LUCY 做咗上帝,能力可以穿越時空,存在於天地之間,無處不在,永生不滅。導演係咪飲大咗呀?洗唔洗玩到咁大呀? Marvel 系統的英雄,無一個係 Lucy 敵手 wor! -__-"""

講返 D 學術性問題,這套電影其實用返老掉牙的 「人腦未用盡 100% 論」,其他好多電影以及漫畫都有過 (包括北斗之拳),但人腦用盡到 100% 就等於神,我又真係未聽過。有理論講我們現今人類只是用了大腦的一小部分功力,那麼就要講返 「神造物論」以及 「進化論」兩大流派,我自己係有神論者,但我的主見是介於兩者之間。以人類只用得大腦的小部分的理論,其實只適合「神造物論」。

聖經講神以自己的表像去創造人類,那麼本來人類就應該很接近神,之後犯了原罪被貶落人間,神把人的大腦設定了一個限制也不出奇,即本來有好多種強大能力,都被封鎖起來了,當然聖經無提及過,只是我個人亂 up 24,但以前聖經人物可以活幾百歲,其後的人壽命越來越短,是否大腦的某功力其實在衰退?


但如果把以上論點,和達爾文的 「進化論」比較,則是非常矛盾,兩隻是完全背離的。進化論講的是物競天擇、適者生存。由於生存環境不斷改變,生物也要因應環境而進化,未有進化而跟不上環境轉變的生物,將會滅絕。所以理論應該是,生物本身已開發出自己的 100% 最大能力,而隨着環境轉變,生物才再進一步配合環境再有突破性的進化。如果人類一早已進化到大腦的 100% 超神力,而卻只是使用得當中的 10%,與進化論是相互矛盾的。

簡單地講,只是有需要才會進化,生物基本上不會進化到超出環境所需的技能,不會進化出一些根本「用不着」的技能。人腦的未用盡 100% 論,和龍珠中的菲利變身卻出奇相似,菲利本來就是完全體的第四變身,即第四變身那個才是真正的他,但因為他能力太強,在宇宙間根本找不到對手,所以他才變身來封鎖部分能力,因為這些能力根本用不着。直至遇到超級撤亞人悟空,他才能所有能力釋放。


我們人類會是菲利這種情況嗎?

2014年8月21日星期四

國指跑輸


由早前的小調整後回升,今次國指升幅明顯跑輸恒指,恒指已經破頂而國指卻是雙頂調整中。不過恒指日線圖中睇到,最近已有三日陰燭但成交量比上一日增大,這是 O'Neil 所指的派貨日?O'Neil 認為如果集合了五至七個派貨日,大市就好快反轉。筆者自己就好少用派貨日去判斷大市,不知準繩度高不高,始終恒指一日仍是上升趨勢,都不宜過早看淡。

有時炒股年資耐,都會犯一個錯誤,就是經常想發掘一些落後二三線股,經常夢想自己能買中升幅遠超大市的細價股,卻好易忽略了一些貼市的大價股,原來簡單就是最好。以下半年開始這個升浪計,與其花精神尋找有潛力的二三線股,其實簡簡單單買入貼市的中移動 #941、港交所 #388,或者吼一兩隻本港地產股,利潤已經非常不錯。筆者有個朋友剛開始學炒股,之前不敢亂買只買了中移動 #941,由於倉位細,一隻中移動已經令回報非常不錯,筆者輸咗九條街 ^^'''

自己經常犯這個錯,獨愛中資二三線股,這個壞習慣好多年都改不了 >.<

筆者這個月和股市非常疏離,少做功課少留意股票,寫文章也少了。因為屋企小朋友以及大人都輪住病,筆者自己雖然無發燒無睇過醫生,但精神也欠佳。另外由於有資產出售,九至十月可能做一次資金重組,到時倉位也會比現時更大,八、九月的策略可能都是少做少錯,多點休息。

2014年8月19日星期二

毒品害人

有傳男神柯震東在北京因吸毒被捕,一眾女 fans 當然在網上瘋傳消息啦,但較少人提及原來房祖名都有份,有傳間屋係房祖名既,公安仲搵到超出「服食份量」的毒品,隨時可以告佢販毒罪,死邢都有份。不過這只是傳聞,大陸 D 新聞又真係信唔過,要等進一步的消息確認。以成龍和中央交情,死邢就未必,不過可能真係要坐監了。

甚麼「毒品害人 」、「遠離毒品」等標語,我聽都聽咗廿幾三十年,但情況未有改善過,只會越來越嚴重。記得之前反國教事件,我就曾經寫過文,家長們對國教過份敏感,卻嚴重忽略了青少年吸毒的問題。

講真人的腦無咁易被人洗到,一科國教唔會將一個本來好憎共產黨既人,洗到變咗愛國愛黨。但人腦卻好易被引誘、好易變壞,青少年吸毒問題遠遠比一科國教更加嚴重。我年少時睇政府的禁毒宣傳廣告,用的演員都是至少十七、八歲的青年,現在的廣告呢?演員的年齡我看只有十三、四歲甚至更小吧?

時不時都傳出有小學生吸毒的新聞,吸毒絕對是有年輕化的趨勢,家長真係要正視問題。尤其是現今社會太多負面訊息,大人尚且覺得香港 this city is dying,中共霸權、政府無能、樓價高、大陸人落黎搶飯碗等等,講到好似無晒希望咁,會唔會間接影響到新一代?覺得橫掂都無希望,不如及時行樂,不顧後果?

中共就算幾霸,政府就算幾無能,只要自己潔身自愛,積極向上,有手有腳更加有腦,點會餓死人?相反連自己都唔愛惜自己,一 take 嘢就咁害咗自己一世,就真係神仙都救你唔到

P.S. 有些毒品會對腦部做成永久損傷,到時就算無大陸人落黎搶資源,自己也已成為廢人,可能食飯都要人餵,可悲  >_<

2014年8月15日星期五

無覺好訓

近日有點無心股市,夜晚要同女兒訓,基本上完全沒有參與美股,應該有唔少業績好的美股,在績後有買入價值的,但筆者沒時間研究了。加上小女近日唔舒服,食了藥,可能因此夜晚訓得唔好,成晚轉身,攪到筆者都無覺好訓,昨晚我只睡了一個小時左右。

今早基本上都在補眠,下午醒來才知 #384 被中石化配股,今日股價跌近 4%。其餘持股近日都似被點穴,完全唔識升。在未到預設止蝕位之前,唯有耐心持有。

8 月17日香港有反佔中遊行,筆者有預感到時必定有人來踩場,分分鐘開大片? 佔中攪來攪去都未佔得成,泛民又爆黑金風波,一直自認佔盡道德高地的佢哋,突然光環盡失,反佔中勢力就借勢火速狀大。有佔、有反佔,我又踩場唔比你反佔,攪來攪去,「依壇嘢」真係好鬼悶......

2014年8月12日星期二

標題明燈

有時睇返自己過去的文章標題,很有明燈效應,網友 Eric 兄也提過,筆者有類似 「港股強勢?」之類的標題時,港股就無力回吐,詳見:


近日「調整」的標題一出,中、港、美股市好似已經調整完畢又再開車?哈哈。美股是否已經調整完畢就唔敢講,港股目前仍然很強勢,主要是有資金流入炒起大市,網友 Ivan 兄及一些高手的意見是,今次是中資股 (以及股市) 的價值重估,因為過去估值太低殘,一旦有資金重新投入這些低殘股,相關板塊就有機會大返身。

筆者不敢買一些過於低殘而又負債過高的週期股,只敢對一些較貼市的板塊有興趣,如內銀、內房、內保等,而當中對內保又最有興趣,之前短炒過 #1339,短期內有可能沽出一些表現不好的持股,換馬至一隻內保。

港交所、證券股等就受惠於大市成交回升,不過筆者已錯過了最佳買入點,不敢胡亂高追,但也要密切留意其走勢,因為是大市的指標之一。至於美股,近日筆者真的很懶,夜晚起唔到身,日間也忙於其他事情,好似和美股脫了節,只持有兩隻持股最近也表現不佳。

近日又有資產套現計劃,因為澳門資產升到好瘋癲,簡直可以用 「痴線了」來形容,香港人認為香港資產升到大家接受唔到,其實今個浪澳門資產的升幅遠遠超過香港,雖然工資也急速上升,但工資升幅仍然拍馬都追唔上去資產升值速度,如果無資產係手,靠份糧真係好難頂。

如果和最低谷時比較,有些實物資產的升幅已經超過 20-30 倍 ^^'''

2014年8月8日星期五

調整

近日環球股市唱淡風,美股的標指和納指都已跌穿 50 天線,但跌幅仍未好深,筆者也沒發覺個股有集體洗倉的現象,這是一個跌浪開始?還是只是一個小調整的尾聲?永遠在事後才知。納指過往的重大調整,最終會跌穿 20 週線,直跌到 50 週線的附近,現時仍在 20 週線的上方,悲觀點講如果今次是重大調整,仍然有頗大的下跌空間。當然更有人開始懷疑是熊市來臨的前夕啦,但對於做明年甚至未來幾年的大市走勢的預測,我個人是很反對,今日唔知聽日事,仲要預測咁遠的事?預測十之八九都會出錯。

港股近日也開始調整,恒指今日跌近 200 點,個人認為若非大牛市,指數應該沿住 50 天線上升較健康,若果今次最終一試 50 天線的話,仍有數百點的下跌空間。但若股市真的很牛,也可以一直 keep 住在 10-20 天線上反覆上升的。

總之事前無謂預測,以技術走勢決定去留,有了止蝕機制,遇上重大調整時,最多全部持股一次過止蝕,風險仍然在掌握之內。難題在於,股票被迫止蝕後,究竟如何判斷大市是小調整還是大調整?是要一直離場觀望?還是止蝕完遇上交易機會又立即重新入市?

我想當初 08 年大熊市的初段,必定有大量散戶走鬼咁走,好多能夠在蝕不深的情況下退出市場的,但唔少人在熊二反彈時以為大市跌完,又再入市,結果第二浪殺到時再傷多一次。又或者在恒指跌到 20000 點樓下時,以為大市跌浪已近尾聲,開始大手分段撈底,結果越撈越低,原來 20000 點仍可以再斬半。

筆者於判斷大市的功力自問嘛嘛,與其傷神去做通常是錯的判斷,不如堅持採用 Alexander 的風險管理方法,每月設定組合的最大風險上限,輸晒這個 quota 這個月就被迫忍手不交易,直到下個月才可重新交易。

當然筆者未試過連續兩個月都輸爆 quota,如果發生這樣的事,一是大市可能好差,二是自己操作心態出現大問題,總之兩者都不是好事,更加應該離場作檢討。假設每個月上限是組合的 4%,連續兩個月輸爆 quota 都是 -10% 以內,是很重傷但仍可以承受。若果放任自己組合單年出現 20-30% 的虧損,真是恨錯難返了 =.= 

2014年8月4日星期一

7 月結 - 美股篇

本月港股倉跑輸大市九條街,美股倉則微微跑贏大市,收得正回報。不過回報卻未能理想,月初大市開始調整之時,有 3 筆交易虧損,下半月命中率有所提高,但衰在自己因為對大市無信心,每筆交易沒有用足風險上限的 quota (每筆交易風險上限應是組合淨值的 1%),自己主動減少買入注碼,所以雖然月尾買中兩隻急升股,但注碼相對較少,未能對組合有太大作用。

P.S. 筆者大致採用 Van K. Tharp 的風險管理和下注方法:
先計算每股風險 = 買入價 - 起始止蝕價
然後再計算可以買幾多股 = 組合淨值的 1% / 每股風險

由於筆者在月尾的交易中,都沒有用盡組合淨值的 1% quota,直接等於減低了下的注碼 (所買股數),這樣風險是下降了,但事實我連續買對了股票,卻壓低了利潤。

今個月已完成的交易 (即買入及已沽出):
1. THRM      賺錢    R 系數:+1.65R    (追勢系統)  
2. #UTEK     賺錢    R 系數:+1.09R    (反向系統袋鼠尾)
3. #RLD       虧損    R 系數:-0.72R     (追勢系統)
4. #NGVC    虧損    R 系數:-0.44R   (反向系統)
5. #AYI         虧損   R 系數:-0.54R    (反向系統袋鼠尾)
6. #PFL        賺錢    R 系數:+0.35R  (追勢系統)
7. #BIIB       虧損   R 系數:-1.06R  (追勢系統)
8. #GILD      賺錢    R 系數:+0.96R  (追勢系統)
9. #RUBI      賺錢    R 系數:+1.62R   (反向系統袋鼠尾
10. #BMA      賺錢    R 系數:+1.95R   (追勢系統)

#RLD 在上月尾買入,到七月才完成交易,#THRM 和 #UTEK 則在上月買入並已沽出一半,餘下的一半本月沽出,其餘的都是即月買入即月沽出的短炒,本月完成的交易共 9 筆 (把 THRM 和 UTEK 合計一筆吧),虧損的有 4 筆而賺錢的有 5 筆,命中率剛過 5 成,和港股倉命中率一樣,但 PFL 只是微賺 0.35R,不過當中已除淨的股息,則未有計算在內 (因為美股未試過收息,都未知 D 稅點扣法 >_<)

#BIIB 是輕微地超出 1R 虧損,其餘都控制在風險範圍內,由於今個月大市調整以及業績期,筆者對於下注是非常審慎,甚至但求少做少錯,因為業績真是無得估,動不動就會大升裂口或大跌裂口,今個月買中績後急升的 RUBI 只是好彩而已。

美股倉 7 月回報:+1.60%
同期標指變幅:-1.53%
同期納指變幅:-0.66% 

2014年8月1日星期五

7 月結 - 港股篇

今早成朝係度整理返 D 交易,為每筆交易計返個 R 系數,以及為交易評級及作檢討,暫時只做了港股倉,美股倉遲些再 post。

上個月港股只作了三筆交易:買入 #371、#1661、#6881,前兩者已止蝕,今個月 #1661 也止蝕,是全敗收場,上月回報 -1%,因為 #371 和 #6881 都在未到止蝕位時,就提早決定沽出,事後當然是錯啦,所以組合虧損比預設風險的 3% 為低,但其實可以三筆交易都全勝的。最錯當然是 #6881,今個月升到痴咗線。

今個月已完成的交易 (即買入及已沽出):
1. #6881     虧損    R 系數:-0.12R    (追勢系統)
2. #861       賺錢    R 系數:+0.68R   (反向系統袋鼠尾)
3. #1446 和 #6136 兩隻抽新股,所以沒有 R 系數    賺錢
4. #1112     虧損    R 系數:-0.66R   (反向系統下行通道底部)
5. #10        虧損    R 系數:-0.11R   (追勢系統)
6. #20        賺錢    R 系數:+1.64R  (追勢系統)
7. #2202    賺錢    R 系數:+1.73R  (追勢系統)
8. #2618    賺錢    R 系數:+0.17R  (追勢系統)
9. #6136    虧損    R 系數:-0.79R  (這次無跟系統作撈底動作,抵死!>_<)
10. #1345   虧損   R 系數:-0.03R  (追勢系統)
11. #1339   賺錢   R 系數:+0.72R  (追勢系統)

以上 11 筆已經完成的交易,當中 6 筆交易賺錢,5 筆虧損,命中率只是剛超過 5 成。另外有三筆交易未完成,分別是 #687、#1888、#268,至今仍然持有,#268 是坐緊貨。

7 月港股倉回報:+2.67%

恒指上月收報:23190      本月收報:24756     變幅:+6.75%
國指上月收報:10335      本月收報:11130      變幅:+7.7%

組合回報是跑輸了大市幾條街 >_<!主要是當大市上升時,自己未能夠對準升市焦點,買入內券板塊股票,而本月回報最高位有 +5%,但這兩三天內回報斬了近半,因為 #2618 和 #1345 未有在高位減持或食糊,這兩天股價大跌,後者更比震走變成虧損。

總結今個月其實並唔難炒,只不過自己衰在懶,月初至月中太不上心,沒有密切地監察大市,以至錯過了內券的正確買入點,發現時已經升了很多,不敢高追,但之後再升多一大段 >_<

2014年7月30日星期三

2014-7-30

今日全日外出無睇市,也沒空回覆留言區的留言,敬請見諒 ^^。收市後才回到公司,#1345 跌到嘔,尋日剛入的 #268 也逆市插,本來也預咗大市急得咁急,隨時會回吐,而自己早前已沽出部分持股鎖定利潤,留下幾隻早前大成交突破較強勢的股票,希望大市回吐都能守住上升趨勢。但估唔到  #1345 可單日插 8%   >_<

港股倉回報今日縮水,好彩美股今晚連中兩隻急升股:RUBI、BMA。BMA 尋晚才買入的 ^^


前一期自己 watch list keep 住三間外國銀行:BMA、BFR、GGAL,當時錯過了買入點,尋晚竟然用 screener 尋找成交異動股比我搵返出黎,三隻同時入圍,證明有料到,都是在 50EMA 附近有頗強支持。今晚其實我暫時都未知佢哋升乜,只知三隻都一齊升  ^^

RUBI 就是上週用 screener 找出來的袋鼠尾,日線圖連續兩天出現長下影線,第二支還是倒升的 hammer,成交爆大量,以跌穿下影線底部作止蝕,買入是有一定的值博率。但筆者竟然睇錯了公佈業績時間,我一直寫住是 8月5日才公佈的。因為我自己對業績有點怕怕,如果知道今晚公佈,可能尋晚會先沽出,咁就揼爆心喇 ^^'''

多得 Capmo 大大提醒我這兩隻股 pre-market 已急升,我也急急於開市後先食糊。BMA 暫時出現好長上影線,RUBI 則在我沽出後再升。但兩者都已達標,莫要太貪心  ^_^

尋晚也趁 CTRP 績前先沽出,因為真係怕怕了,今晚暫時又無事,無裂口 ^^


2014年7月29日星期二

突破

港股氣勢磅礡,短線已連升 5 天,日日兩三百點地上升,中線亦已成功突破上年 12 月高位,近日成交持續放量。筆者今個月未能食正整個升浪,港股倉回報雖有近 5%,但與恒指日日升兩三百點相比,跑輸了九條街,主要是未能對準升市焦點,這一輪升得最勁是中資股,內房、內券、內保都升得不錯,但尤以內券升得最勁,偏偏筆者一隻都無,上月本來入了 #6881 跟炒 A 股返身,但失守 50 天線時沽出了,事後也沒有回補。

美股近日升勢不及港股,而早前跑輸港股的 A 股,今日都追落後,大升 >2%。港股短線確實升得有點急,如果放在一個上落市,RSI(9) 升到 84 是超買的,但如果放在一個大牛三則很平常,究竟現時是大牛市開始,還是短暫興奮然後又回落,keep 住上落市呢?我諗真係要問阿爺!

阿爺意思當然是睇國內股市,A 股落後於港股,今日開始追落後,如果港股短線開始要呌呌,又到 A 股接力向上,兩者都 confirm 是 uptrend拍住上的話,真有可能今個下半年度是一個強勁的上升趨勢。

網上也有陰謀論,話美國佬推動佔中,未佔之前先推高股市,外資搵一筆真銀,然後再由佔中推倒股市及經濟,外資再撤回美國云云。先不論陰謀論是否成真,但美國減債、加息的時間表清晰,而中港股市也的確便宜,在未加息之前先推動股市,大戶賺一轉也是正常不過。不用花心機去研究是否有一浪長達幾年的大牛市 (我認為基本上都無乜可能),單食一浪維持 3-5 個月的上升趨勢,回報已可以好和味。

我自問對選股的功力一般,不過今日有朋友問筆者意見,問了幾隻成交低以及近日跑輸大市的股票,這些股票技術走勢不算太差,起碼不是下降趨勢,但問題是大市如此興奮時,它們沒有成交放量地上升,成交維續低水平,股價有點被點穴 feel。筆者的意見是,當大市出現上升趨勢時,宜用回突破買入法,股票有強買強,買一些剛剛大成交突破技術位的股票,出錯機會較低。

現時才選一些落後、成交低迷、似被點穴的股票,市大升時它們不升,到市回跌時它們可能又跟跌,除非是以基本因素入手,了解公司的價值才去買,否則以一般散戶,可能跟隨成交量、技術走勢去買,勝算較高。又或者技術和基本因素都一概不睇,索性跟買貼大市、貼主題的股票,如今個月買貼 A 股的內券、買貼港股的 #388,回報亦已非常不錯。

今個月環保類股票好似明顯跑輸 >_<

2014年7月25日星期五

港股強勢?

今日恒指再升 169 點,連續三日成交地升市,但短線已升得過急,筆者不敢亂估今次是超級強勢的升浪開始,還是一如以往升升下就無力而大幅調整。近日升市較集中在中資股,尤其是內房、內保、內券三大板塊,清能環保股完全跑輸大市。

美股進入業績期,大市表現不如港股,公佈業績的股票一定會好波動,而事前也無法估計市場對業績的反應如何,動不動就裂口急升或大跌,難玩!如本身持股過早在業績前沽出,一公佈業績就爆升,必定會後悔。但若果持有的股票績後大裂口下跌,又會後悔當初點解唔提早沽出。所以筆者選擇放棄炒業績股,今個月美股的交易縮減,因為無乜心水股票,好彩港股表現理想,今個月炒港股相對是較易搵食。

近日負面新聞好多:

1. M 記證實有進口福喜的肉,近排都是少去 M 記開餐為妙。這間上海工廠用過期肉,新聞一出大家當然鬧爆中國食品唔安全,這是事實的一半,另一半是這間其實是美資公司,是否它們管理也出了問題呢?

2. 泛民黑金風波,多名議員涉嫌收受生果報老闆的政治黑金,所以我話自從英國佬開始改口風反撐中國中央開始,明顯睇到一波中央的反擊攻勢。這當然絕對是有心人選擇在這個時機發放黑材料啦,但睇到一些時事評論員 (包括今日左右紅藍綠那位),急忙為泛民洗地,話這是中央故意末黑,是白色恐怖咁話 wor。咁事實係有收過定無收過先?如果事實係有收過,又無申報,又無列明筆錢用咗去邊,咁唔係黑金係咩?泛民就不嬲有兩把尺度人,但如果連時事評論員都雙重標準,這個社會就真係好難攪。如果今次係建制收黑錢,你估佢哋話點樣插法、會攪到件事幾大呢?

3. 繼馬航之後,台灣又有飛機失事,轉過頭非洲再黎一單。筆者講句 RIP,願死者安息之餘,也擔心現時飛機的安全性問題。首先世界各地好多地方戰亂,有時搭長途機飛過或飛近這些地方在所難免,真的頗危險。其次是目前廉價航空盛行,航空業的競爭好大,雖然無證據話廉價航空會導致航空公司的質素下降,但可能多少有點影響?

4. 壹仔老細涉嫌派黑金,東字頭的報章周刊當然大字標題啦,但壹仔意圖淡化事件,轉移讀者視線,今期就搵了替死鬼馬小姐咯。我覺得馬小姐係好慘,講真依 D 純是私人、私隱嘢,佢又唔係公眾地方行為不檢,在酒店房內係私人地方啦,咁樣比人拍片仲要流出,真係好過份 >_<!!

2014年7月22日星期二

反攻

今晚約了友人打波,今朝又跑輸大市,無乜心水股票,趁早出一篇短文吹水。七一遊行後,佔中團體講到似層層,好似已經 ready 好隨時開波,更有傳話八月就真係黎料,再加上中央在最敏感的時刻發白皮書,我心諗,今次堅黎料喇掛!

點知情況急轉直下,先有陳太、李大狀在英國聽證會,比當地議員質返轉頭,話白皮書無問題 wor、香港言論自由無被打壓 wor、中央叫你地愛國無問題 wor、你哋作為中國公民要守基本法架 wor!根住有英國權威智庫又出黎話白皮書真係無問題,再有一個唔知咩前聯合國的鬼佬出黎話,國際標準唔等於有公民提名。繼而香港出現反佔中簽名運動,又有多名藝員開聲反對佔中等等。

點解時間甲得咁啱?鬼佬一反常態撐返中國中央政府後,反佔中聲勢突然變得好浩大,好似一浪接一浪咁,連港股都急升來贈慶?陰謀論去睇,會唔會一直在背後推動反中央的勢力,暗中和中央傾掂數,開始倒轉槍頭?這兩天又爆出肥佬黎向某某黨派送黑金之醜聞。

睇個勢佔中又好似唔會咁快攪得成,我一直對佔中持中立意見,只不過覺得攪手太無吉士,如果理據係你哋個邊,點解一直得個講字,講咗咁耐都無行動?而反對派一早就行錯了路,依靠鬼佬幫我哋爭取自由?點解鬼佬要關心我哋?如果咁有心,點解英國佬、葡國佬殖民地時代時,又唔比我哋有普選?

話唔定我哋已經成為他們的外交籌碼,比人擺咗上枱都不自知 -_-'''

2014年7月19日星期六

市底唔差? x 2

週四晚美股插水,自己 watch list 上的股票真是一遍血海,好彩只餘下一隻和大市完全無關的 PFL 在手,但當晚點都不敢動手撈貨,昨晚美股又回升,watch list 完全唔同光景,竟是一遍綠油油,而且個別股票升得唔錯,昨晚買了 GILD 試一試。

前晚美股插水,本以為昨日 (週五) 港股會大跌,但恒指跌近 200 點後跌幅收窄,再次證明港股市底唔差?二三線股一隻又一隻起動,下半年如果無重大突發事件,睇黎向上機會大於向下?

筆者近月花在港股研究的時間好少,未有時間頗全面地 check 一次眾板塊,但也留意到唔少股票已出現利好的形態,而且成功突破了:








前三者:#1345、#460、#2618 是一個上升趨勢中間整固的 cup with handle,cup with handle 突破後就是上升趨勢的延續。

後三者:#1336、#20、#1888 是疑似見底回升後出現的 turnaround 形態,頭肩底及上升三角形。

當然股票有強買強,前三者是首選,後三者是次選,但如果上升突破時的成交明顯放大量,則突破的力度足夠,值博率也不錯。

如果大家有時間 check 多些圖表,應該會發現更多出現利好形態的股票,如果某一板塊或某一類股票集體出現利好形態,則可信性更高,有資金湧入把整個板塊或類別炒起。

---------------------------------------------------------------

昨日在留言區問了大家,對最近李超人推出的蚊型上車盤有甚麼意見,有網友認為可以租到 7 千蚊出去,那麼回報率好高?也有網友話如要優先認購,要買三房的大單位?當然身為非香港居民的筆者,由於印花稅的關係是無法入市了,但作為一個 case study,都想和大家討論下。

這個細得可憐的蚊型上車盤,道出香港人居住的質素急遽下降,但我個人認為,某些單身而有工作的人士,一個大單位買不起租不起,與其住劏房,不如租或買這類的蚊型盤,起碼自由出入方便些,叫做有一個自己的空間 (雖然空間係好細 ^^''')。

真係咁都比李超人諗到,我諗這個只是試驗盤,若結果是大受歡迎,未來有可能有更多這類樓盤推出。我不是說李超人是好人,佢由頭到腳都是一個精明生意人,推這類盤只為賺到盡,但香港人 buy 唔 buy 這類蚊型盤,真是事後才知。但我佩服佢咁都諗得到,起碼有一個嘗試,如果是 work,可能解決到唔少單身一族的居住問題,總好過那些垃圾議員日鬧夜鬧,對社會毫無建樹以餘,仲要阻止政府搵地起樓啦   >_<

以一百多萬可以換取自己一個私人空間,其實香港人可能幸福過澳門人?因為在澳門,一個車位都要 > 200 萬,以上蚊型盤起碼都叫做有地磚、有厠所、有天花板啦,在澳門 200 幾萬買一個車位,得塊水泥地比你,仲要係爛既 >_<

2014年7月16日星期三

市底唔差?

之前以為美股會開始調整,但暫時仍好似跌不下去,港股也是如此,今晚歐洲暫時升得唔錯。近日大市雖然較牛皮,但唔少二三線股近日都有異動急升,筆者由於和港股已脫節,因為好耐無認真做功課,唔知咩原因升。但睇新聞好似話中國一批企業改革名單,相關股票被炒起,當然之前炒 A-H 差價的股票也已一早破頂。

二三線股相繼異動,初步睇市底好似不差?下半年大市有望展開新上升趨勢嗎?筆者不敢亂估大市,但有時間就必須要做下功課,研究下圖表,以免跑輸大市太多。

2014年7月14日星期一

恭喜德國奪得世界杯冠軍

這個 weekend 都很懶,尋晚又湊女又睇波,基本上無訓過,今朝要補眠,所以下午很忙。留言區爆 200,我也沒時間回覆留言,簡短出篇新文先 ^^''。

這個 weekend 是體育大週,先有 NBA 重磅交易,再有世界杯決賽。占士終於離開熱火,回歸騎士,雖然坊間一早預料占士會在熱火和騎士之間二選一,但落實公佈離開熱火,仍然令不少熱火球迷失望。當年三巨頭降薪組隊,占士還承諾為熱火帶來 not one、not two、not three、not four、not five、not six.....的 N 座冠軍,結果只打了四年又離隊,估計是看熱火的潛力已盡,球員老化,占士如果續一張頂薪長約,熱火根本沒有空間再簽其他實力球員,估計再奪冠軍機會好微,而另一邊騎士選中狀元,加上之前的狀元艾榮,又可以再組三巨頭,於是占士又回去了。

令人意外是保殊拒絕火箭合同,最終留低在熱火陪伴韋迪,可見保殊和韋迪是才真兄弟。不過保殊可能等這機會好耐了,以往保殊要改變自己打法,完全無球權在手,淪為一個定點射手。如今可以做球隊大佬,估計下季他會爆發了。

但原來占士也只和騎士簽了一份兩年合約,第二年仲要係球員選項,即占士打一年唔滿意就可以走人。最初講到好感人,話終於回家了,我還以為簽一份長約安心留低呢,原來也只是短約,占士下年可能又要轉隊了? >_<

另外一些交易:
1. 加素離開湖人加盟公牛,與逽亞組成雙塔
2. 安東尼最終留在 New York 力克,但我估計佢與冠軍無緣了
3. 皮雅斯大約 500 萬年薪加盟巫師兩年,這才是我真心不懂,為何他不回 Boston,或者過去快艇和里華斯教練一齊?可能 Boston 沒有向他報價,唉!我真心希望佢能夠回歸 Boston 在那裡退役的 >_<

----------------------------------------------------------

世界杯終於完結,本以為巴西知恥近乎勇,季軍戰一定搏老命去打,結果真是搏命,但實力就係咁....差!無辦法,其實巴西入到四強已有點幸氣 >.<。尋晚我支持阿根廷,真心想美斯能帶領阿根廷奪冠,以報 24 年前馬勒當拿之恨。全場阿根廷都算打得非常好,尤其是後防以及守門員,表現真的讚。

可惜是前鋒太弱,開賽初段德國後防犯的唯一大錯,將球頂回後面,阿根廷前鋒有機會單刀,這樣的叉燒波竟然射唔中門!不過要讚德國的入波,真的是世界波,也是阿根廷後防唯一一次出現的大失誤,CCTVB 球評話應該是阿根廷體力已出現問題,才會出現這失誤。但這個射門確實是靚、超級靚!

也要一讚德國隊的球風,嚴守紀律,沒有個人英雄主意,打出團隊、無私、合理的足球,這和 NBA 今年冠軍馬刺有點相似。如果把這種紀律放在炒股上,也應該能夠成功的 ^_^

2014年7月10日星期四

澳門黑幕

下午可能好忙,今日趁早出篇文。港股昨日一個下跌裂口 + 陰燭大插,恒指跌近 400 點。筆者綜合網友指出的大市反轉指標如下:

1. 各方人士、財演一致唱好股市
2. 恒指圖表上出現大成交突破前高位
3. 內房、內保突然升得好靚仔
4. 底殘週期股也開始起動

當這些指標出現時,大市離頂不遠,係時候做出一個短線回調,回調有幾深無人知,所以做淡也難做好也難。這半年港股根本就是上落市,沒有明顯大趨勢,上落市格局就是多出現假突破,恒指真是一突破唔洗幾耐就大跌。而上方第 3 點更是明燈,以前我睇國內股市和港股,都以內房、內保作指標,近年卻變了反向指標 >_<

現時真係唔識睇大市,下半年唔知有無一個明顯趨勢,或者只是波幅好窄的悶局。但自己就覺得等出台的壞消息一羅羅,可以話有好多炸彈唔知幾時爆:佔中和政治危機、樓市週期、美國加息、限制自由行......但換個樂觀角度去睇,會唔會大家都期待會發生的危機,就沒有機會發生?最終佔中唔成、樓市照升、美國長期低息、自由行減少但對經濟影響不大?2017 年前順利傾掂數,普選成功!天下太平,大家 Happy?

哈哈,真係發夢就有得發!

自澳門特首安安爆出那單離補方案,引起市民廣大迴響後,澳門也開始有政治危機,好似一浪接一浪。近日又爆出澳門政府之前批地,可能有黑幕,前任特首可能都要被拉返出黎調查云云。

講真,筆者一直聽香港市民點樣不滿香港政府,但筆者就一直認為澳門政府只有更差,只有更多黑幕,官商勾結絕對比香港更加嚴重好多倍!只不過之前賭業大過天,人人賺到盤滿砵滿,誰有心機理會甚麼黑幕?但隨着賭業有可能見頂,中央決心打貪,通脹升溫,貧富懸殊,市民開始對政府不滿,種種黑幕就開始浮面。

引用力報的文章:
https://docs.google.com/document/d/1H0fbzawpZp17lZkaM3vUqNBIfTF9ThE6B1_uR_Pro4A/mobilebasic?pli=1&from=timeline&isappinstalled=0

2013 年政府公佈人均年收入是 53 萬澳門幣,如果除除十二個月,即係人均應該月薪 MOP44,000?但人民收入中位數只得 MOP15,000。澳門的貧富懸殊是非常嚴重!政策向賭業、做自由行生意的嚴重傾斜,其實其他行業的中小企業,是十分難以生存的。

澳門可能比香港更快變天, 大家穿定救生衣,有備無患 ^_^

2014年7月8日星期二

變形金剛之反轉香港

星期日下午終於去睇了 <變形金剛:殲滅世紀>,又無傳聞中咁差,唔知點解 D 人劣評如潮,相反我認為娛樂性十足!睇這類大製作機械人片,真係唔好太講究劇情,莫非大家期望劇情應該局中有局、錯綜複雜?這類大片只要劇情不是膠得太離譜,主要都是去享受觀感上的刺激,入場睇特技、睇大場面死人冧樓的吧?

講真場面真係好鬼大,鐘意睇死人冧樓的人一定過足戲癮,特技無可挑剔,又有美女、又有靚車睇,唔單止機械人打打打,人類也有大量動作,有飛車驚險鏡頭,講真已交足功課。今集金髮美女係 sell Model 身型,身材平均、長腿、金髮,唔錯!李冰冰個角色唔太重要,但有足夠對白,又有動作,又索,OK 啦!王敏德出得太少,無端端講句英文真係唔知做乜,反而呂良偉比較搶戲,但最正係有中國拳王鄒市明演出,仲有機會表演身手,有驚喜!

有些地方的確係膠得過份咗:

1. 本身「禁閉」這個邪惡大佬角色幾型,但係比幾條人類、幾個博派上咗佢隻飛船,攪到天返地覆又救走埋柯柏文,佢竟然唔知仲開飛船上太空,真的有 D 離譜咗。講到佢哋咁高科技,但隻飛船完全無 security 的系統,話入侵就入侵

2. 隻飛船 D 機械人護衛,包括果幾隻機械狗,真係廢得可憐,禁閉完全似係孤軍作戰,D 手下有等於無,仲廢過人類平民。主角無意中得到支外星人槍又勁得太過份,無限子彈

3. 勉強把個戰場拖到中國,其實係想 sell 中國、香港,我 buy!但由北京間工廠搭私家車落香港,這點太離譜!一個堂堂超級企業 CEO,點解無私人飛機?點解班神通廣大的 CIA 又唔出動飛機或直升機去追佢哋?要陪佢哋癲一齊渣車落香港?由北京渣車落香港拍到好似過渡橋咁近......

4. Again!堂堂大企業 CEO 連貼身保鑣都無一個?雖然 D 戲通常講 D 保鑣好廢、行先死先果隻,但都唔該是但整返幾件保鑣出黎,擋下子彈都得掛?

5. 勉強要復活麥加登,唔明死極都有得復活,但每次復活都好廢!點解唔決心創造一個新角色,要麥加登死唔斷氣咁出現?但係又唔比麥加登坐正做邪惡大佬,能力又咁廢?講真無論做型和實力,「禁閉」勁和型過麥加登好多倍

這套戲後半段擺到明 hard sell 中國,D 飲品都要用中國貨,係香港打打下都穿插中國背景的深山,加入中國特色的建築物,也有大量簡體字出現。中央那一句:我哋會全力支持香港特區政府,更加抵死!

好多香港人可能因此唔爽,最唔爽的可能係美國佬眼中,原來香港終需靠中國保護。不過這套好似合拍片,無論美國佬真正點樣諗都好,總之美國佬拍片 (或者全世界都係咁) 就係為咗打入大陸市場,而唔係滿足香港需要。為咗賺取龐大的人仔,基本上全世界都係咁,一邊鼓勵你香港拒絕大陸入境,佢哋一邊就自動去吸人仔,港澳同胞真係要睇開 D  ^^

但美國佬點會咁順攤去 sell 中國,當中就加插了一段,我認為是諷刺中央的手法:

柯柏文同那三隻恐龍機械人講,只要我哋團結才有出路,這點好似中央對香港講我哋要容合一樣。但柯柏文又大大聲講:我會比你哋自由,但你哋必須和我合作,如果唔合作就只有死!然後柯柏文打咗隻恐龍幾獲,打到佢聽話為止。在美國佬眼中,中央管治香港手法是否也如此?一路打夠你,一路話保護你   ^_^

-----------------------------------------------------
另外我之前講過美國管治技巧遠高明過中共,美國係擺到明邪惡,雖然佢講到自己好正義,但經常侵略人地國家奪取人地資源,世界霸權 (霸道個霸) 就已經係全世界都知。但美國佬有一樣嘢好,就係邪還邪,佢任得你講任得你寫,甚至任得電影商將佢的衰嘢搬上銀幕。

唔少電影已經把美國過去的黑暗史 (例如白人屠殺印地安人、黑奴時代、南北戰爭等等) 搬上大銀幕,給觀眾可以作反思,我個人認為美國那段時間的黑暗、邪惡程度,不下於中國文草和六四,但人哋就係有這個胸襟去公開。中共就係缺少這個胸襟囉,如果有朝一日,你肯讓文革、六四等拍成寫實電影,好與壞的都毫無保留咁講出黎,我相信世人對你的態度都會有轉變。

------------------------------------------------------

老婆尋日投訴我只 post 圖,無 post 出 link,今日補返數 ^^'''


www.in-modeshop.com
https://www.facebook.com/inmodemacau

2014年7月4日星期五

潮服



上篇留言差不多夠二百,近日市旺果然留言區也熱鬧起來,本來 weekend 甚少出文,但今日要幫老婆大人賣下廣告,老婆大人和朋友攪一點小生意,代理了一些外國潮 Tee,攪網上賣衫。

各位如有空閒請到以上網址瀏覽,或者上 facebook like 個專頁啦,多謝支持     ^_^

(遲 D 老婆唔知會唔會要求我,著住佢代理 D 衫影相 post 上黎 hard sell 呢? 塊面要打格仔先得 wor  ^^''')

---------------------------------------------------------

昨晚美股只有半日市,但道指已突破 17000 點,不過今日港股大市未見太好表現,恒指微升 14 點。不過個別板塊繼續熱炒,內房今日表現非常搶眼,不少內房已經連升了三四日,短線走勢好似 90度垂直上升咁。

筆者當然不懂分析整個行業是否轉勢啦,但正如網友 Ivan 兄所言,內房股超級低殘,當大家一致睇死內房時,就有可能 turnaround,情況就如濠賭在壞消息下不跌反升一樣,濠賭也連升幾日了。

筆者已經懶得去預測大市以及個別板塊是否真的轉勢,因為凡是預測都是十次有九次唔中,總之跟隨短線走勢,有價有量地上升,就跟一轉短炒。到有一定水位的帳面利潤就減持 take profit。

早前幾隻新股上升都潛水,但今次筆者抄 Capmo 大哥功課,抽的 #6136 和 #1446 今日都有好表現,今日是過早沽了 #1446 @1.50,留下環保概念的 #6136,但也不敢在今天加注。今日買入 #1112 這隻低殘股,好似和目前大市咁旺的主勢有點唔 match,是純系統測試而已  ^^





2014年7月3日星期四

袋鼠尾


再分享筆者近日的三個 「袋鼠尾」例子:

袋鼠尾條件:
1. 股價之前有加速下跌之勢,最好是大成交量的連續大陰燭
2. 某一日盤中價再試低位,然後來一個單日轉向,下影線部分在圖表中好搶眼,完全凸出早前的交易區間之外,好似一條尾巴
3. 尾巴的隨後一天,要開陽燭才算合格。如果尾巴當天是有實體陽燭身,則隨後天有一支短少陰燭,或者是十字星,收在前一天實體陽燭之內,都勉強算合格吧!(好似 Inside Day)

不過筆者會選擇在尾巴當天,即是 (2) 就開始買入,而不是等到 (3),UTEK 由於尾巴當天錯過了,我是買在 (3) 的陽燭當天的

ATNM 尾巴之後大裂口下跌,因為突然公佈供股壞消息,所以虧損超過當初的 1R 風險上限。其餘兩隻 BTH、UTEK 都是成功的袋鼠尾反彈,能夠止賺離場。

美股倉 6 月份只計已完全了結的交易 (因為有些股沽出了一半還有餘貨),共 7 筆交易中有兩筆止蝕、5 筆止賺,命中率 71.43%,放在 NBA 這算是好高的入球命中率 ^^

但由於實戰案例太少,7 筆交易不算甚麼,好似走去球場亂射 7 球入 5 球,代表唔到咩。有可能之後連炒 5 球都未定,最重要係六月美股是大牛市,其實買股命中率高係同市況有關,要試交易系統 work 唔 work,要等到橫向市或者調整市才睇到。

--------------------------------------------------------------------

剛睇到火箭隊在球館門口掛上安東尼穿 7 號火箭球衣的大 poster,火箭想追明星球員無可厚非,但現役 7 號林書豪一日未交易到出去,仍然是火箭球員。咁樣做法火箭實在太過份,話無歧視我真係唔信囉!

而林書豪的 facebook 也寫了:
路加福音 6:29 耶稣說 “有人打你這邊的臉,連那邊的臉也由他打。有人奪你的外衣,連裏衣也由他拿去”

火箭這支爛球隊真的不值得你留低,希望林書豪能被成功交易出去,到一支識得用你的球隊吧!

2014年7月1日星期二

2014-7-1

近日真係好忙,老婆和朋友攪點小生意,所以連日開夜工 (因為日間還有正職),好彩岳母大人幫我睇住個細女,我就負責照顧大仔,但已經無空餘時間睇世界杯,也忙到無時間認真寫文。今晚要照顧細女,3:00 起床睇美股,點知細女同時又起身,立即怱忙哋換片、餵奶,好彩佢立即訓返,爸爸還有半個小時空閒可以趁尾市做做功課 ^^。

近日筆者繼續玩短線,美股有三筆交易:ATNM、BTH、UTEK

通常筆者都在尾巴出現的當天買入,而不是等隨後一天出現陽燭時才買,這一點之後會檢討,因為其實出現陽燭開始才算是合格的袋鼠尾,但有時會在尾巴後的一天就爆升,以至錯過買入時機。筆者會一直觀察尾巴當天買入的命中率如何。

ATNM 一買即插,原因是突然宣佈供股壞消息,pre-market 已經大裂口插,超出預設止蝕價,沒辦法在開市後才止蝕,一下重挫 17%,拖累組口回報跌了約 2%。美股就是有 after-market,又有 pre-market 的交易,導致股價大上大落,郁 D 就裂口高開或者大插,波動較大。但壞消息是咁啱遇着,不代表玩法有問題,一切要講求命中率。

Van K Tharp 都強調,做交易每一筆預設風險是 1R,但即使預早設了到價止蝕盤,都會總會遇到超出 1R,甚至是 2R 的虧損。這是交易的一部分,我們必須要承受。

之後買了 BTH、UTEK。前者買入後升得不錯,今晚開市後在 50 天線附近沽出一半獲利,但衰在太貪心,沒有設下一個沽出獲利的下限,諗住 3:00 起身才決定。但起床時股價已倒跌收場,50 天線明顯有阻力。以低價沽出餘下的,賺少好多。

UTEK 暫時有微利,但反彈到 10 天線有一定阻力,也在 10 天線附近先沽一半。

------------------------------------------------------

因為想嘗試新的系統,所以今個月除了 THRM 是追勢外,大部分時間都是集中玩袋鼠尾等的反向系統,今晚才買入另一隻追勢的 RLD。

現時採用近似 Elder 和 Van K Tharp 的風險管理方式,下多少注碼?滿倉、半倉、6 成持貨?等等問題我已不再關心,只會設定整個組合承受的風險上限,然後在不超過此上限的情況下進行交易。

一般同時做的交易不會超過 4 筆,持股較集中,而且甚少坐貨,到價就快速止蝕,以及到目標價就先吃掉部分鎖定利潤,當然如果一筆交易,由最初止蝕點成功上調了沽出價到止賺的情況時,這一筆交易基本上是 risk-free (但要留意可能會出現裂口大跌情況),每出現一筆 risk-free 交易,即是我可以再做多另一筆新的交易,而不會超出最初的風險上限。

筆者用的反向系統,不會分析任何基本因素,甚至可以連間公司做咩生意都不理,總之技術形態 + 成交量才是重點。一切賭在命中率和風險管理上。

不計今晚才買的 RLD,美股倉六月共做了 9 筆交易:
THRN、NGVC、ATTU、CLVS、LULU、KORS、ATNM、BTH、UTEK

當中只有 KORS、ATNM 止蝕,其餘的都止賺離場,不過 ATNM 是重挫,超出 1R 的預期止蝕,所以大大影響到回報。美股倉單月回報 3.60%。要再玩落去才知道此買法是否可行,一兩個月睇唔到成效。

-----------------------------------------------------------

七一是香港回歸假期,但提起 "回歸" 二個字,我諗好多人都頭痛。七一更是遊行的大日子,明天會有幾多人上街,我諗人數分分鐘鐘創新高,被港股更早破頂  ^^

-----------------------------------------------------------

澳門近日某地產貼出來,一個車位可以叫價 350 萬。有網友計過,就算架車迫街一日抄一張牛肉乾,每一張 $300 x 365 = $109500。要抄足 32 年才抵得上一個 350 萬的車位。如果有人真的以 350 萬買入一個車位投資,以月租 $3000 租出去,要租足 98 年才回到本。以上仍未扣管理費,如果扣除業主包的管理費,回本期超過 100 年,真的學日本以前一個車位供三代嗎? ^^'''

筆者在南灣區市中心的一個車位,以及黑沙灣的一個車位,計平 D 每個只售 300 萬,有意者盡快 send Email 給我,自售免經紀傭金,好化算!如果一次個兩個買晒,再平 5 萬又點話!手快有手慢無! ^_^

2014年6月26日星期四

2014-6-26


今晚好忙,爸爸比小魚 BB 攪到無覺好訓,留言區就爆都無時間寫文,唯有用小魚 BB 張相頂住先。

小魚 BB 求先終於訓咗,但爸爸卻到現在都未訓到哦,現在時間係清晨 4 點半   >__<

2014年6月24日星期二

港股大跌

恒指 23300 左右的阻力位屢攻不破,在附近拉鋸了近兩週,今日又回落到 50 天線附近。今日恒指大跌近 400 點。國內股市今日沒有大跌,但這段期間其實國內股市都是悶局,有好消費也只是升一兩日貨仔。可見現時大市欠缺上升的催化劑,阿爺就算放寬銀根、放寬樓壓等,也只是「揤牙膏」形式,而不是開行水喉去馬,所以對這類放水的好消息,投資者反應冷淡。

不過之前滬港通卻有唔少股票升了一大段,當時有網友話偉哥炒錯的 #1057,當時偉哥雖然炒即日,但都有講過如果在當天低位買貨的,其實可以留一留不用急於沽貨,因為之後好可能炒返佢。結果 #1057 比宣佈滬港通當日的高位,還要升了許多,今日再升 14%。

有網友指出近半年,在港股市場用技術分析,很難搵食,相反價值投資法更好用。我個人是同意的,因為港股沒有明顯上升趨勢,對於運用追勢系統有一定難度,相反大部分股票跟從大市大跌時,有些股的投資價值就浮現,由股價「殘到唔合理」開始炒,炒到股價「升返到較合理」時沽出,食這段波幅都很和味。

不過話又說回來,筆者自己在港股難搵食,不代表技術分析一定唔 work,相反有些高手其實只用追勢系統,這半年一樣可以在港股市場搵到唔少回報。筆者只能怪自己學藝不精吧 ^^'''

今個月自己在美股市場反而做得算合格,暫時三週回報 >4%。美股市場龐大,用技術篩選較易找到心水股票,港股市場就算找到一些走勢靚的細價股,由於日均成交不足,搵到都唔敢買。今日把自己一個空着的港股私人倉,轉做美股,希望下半年可以做多一點交易。

睇返世界杯精華,葡萄牙先入一球,都比美國連入兩球追凸,好彩臨完場再入一球追平,迫和美國。但我諗都係出唔到線,因為加納必定同葡萄牙死過。而德國和美國各有 4 分在手,只要雙方和波都可齊齊出線,加上美國教練係奇連士文,咁德國和美國就真係 「有商有量」喇 ^^

2014年6月20日星期五

香港一日遊

昨天去了香港一日遊 shopping,完全無睇大市,無得上網與外界隔絕,突然間無咗 whatsapp 那些提示音煩擾,耳根都清淨咗。不過始終唔慣香港生活,大街小道都太多人,車反而唔算多,因為全世界按城市大小比例,汽車密度最高應該是澳門 >_<。

朋友中午帶咗我去銅鑼灣食一蘭拉麵,嗯,格局唔錯好有日本 feel,但是百幾蚊一個拉麵,老實講,我食兩碗都未必飽 ^^'''。之後去 Ikea 行,傢俬及屋企 design 那一 part 的 show room,椅子、梳化、床、飯枱.....全部坐晒人!一家人坐係度,認真度下買咩傢俬那些 OK 啦。但係見到唔少情侶坐下張梳化度談情,見到成班學生霸佔了整間房,係度上網打機、吹水、猜拳都有!真係當咗果度係自己屋企嗎?見到這個現象,我更加肯定我哋和中國人是同一個種、同一個根性,真係賴都賴唔甩 ^^。

說回股市,港股我真係無乜心機睇,炒的股票好飄忽,同一個板塊又唔係同時炒起,有時有價有量哋上升,以為會借機炒上,點知是一兩日貨仔就沒戲了。港股連日窄幅波動的悶局,唔知會唔會和世界杯有關。講真夜晚要睇波,朝早邊有精神炒股呢。我有時夜晚要炒美股,朝早 7 點幾要同個仔返學,八點幾車個女去外婆度,到我返工......夜晚又湊女、3 點又要起身睇美股,就黎人都癲。現在連世界杯都無精神去睇了 >_<

不過十六強開始點都要抽些時間睇,如果唔係又要等四年喇......

尋晚 Face book 見到一段短片,「星巴叔」 兜巴星港獨男,真係好激。我唔鼓吹暴力,但有 D 人比人打就係唔值得同情。話雖如此,「星巴叔」雖然係為民請命,但始終要付上法律責任,何必呢?

2014年6月17日星期二

馬刺奪得 2014 年 NBA 總冠軍

今日都係掛住睇波無心炒股,今朝好怕馬刺係主場攪唔掂熱火,比熱火追返兩場的話,始終有變數。尤其是第一節 James 進入發癲模式,單節獨取 17 分,睇到我有點緊張。但睇黎是我過慮了,今場繼續係馬刺開啓 SM 模式鞭打熱火,下半場幾乎無還手之力,第三節已進入垃圾時間。

總決賽 MVP,其實我個人主觀願望係給贊路比利,因為 GPD 三巨頭當中,只有贊路比利未攞過 FMVP。這個被高比曾經評為當時地上最強的兩大 SG (另一個當然係高比自己),一直都留係馬刺做後備,論實力佢去邊一隊都可以打正選,甚至我認為頂薪都有人比得出。但佢為配合教練普波域治套系統,甘願做後備,放棄個人榮譽,真係好難得。

而我最初估最大機會係鄧肯,因為聽聞要參考埋整個季後賽的表現,鄧肯一如既往係穩定!剛破了 NBA 季後賽唔少紀錄。但最終給了年青的 Leonard,頭兩場佢表現一般,但之後兩場就是大爆發,這兩場好關鍵,因為成功限制 James 得分之餘,還可以自己係 James 面前狂斬分,最重要係在熱火作客連取兩場,FMVP 也是當之無愧。

其實由 Leonard 這個後生仔得獎,對馬刺未來是有好正面的作用。其一是佢信心大增,有可能一舉成為明星球員,其二是佢係馬刺攞到 FMVP 這個最高榮譽,將來留隊的可能性就大大增強。我諗馬刺未來都會以 Leonard 和 Green 這兩個人為核心,不要小看 Green,今年雖然無上年那樣破三分紀錄,佢今年轉打防守,防死了韋迪,有好多偷球,貢獻也十分大的。

柏加仔就不用我多說,今年佢的作用反而無咁大,因為馬刺整體太強了 ^^'''。反而一定要提 Diaw,佢真係勁到無朋友,存在感太強了!可以在高位策應,可以射三分,而且更加有突破分波,又可以睇準 match up 自己落 post 爆入內線,幾乎五個位佢都可以打晒。

今年 Wade 狀態差唔在講,James 防守能力也大幅倒退,竟然讓和他對位的 Leonard 打出 MVP 級水準。不過總決賽連續三場輸到無影,我諗係時候要重新估計 James 作為追趕 Michael Jordan 之後,想成為球神的可能性了。James 球迷可能不認同我,但我覺得莫講話 Michael Jordan,癲峰 Kobe 的 level,James 都未必能達到。

今晚葡萄牙比德國佬強暴,真係無眼睇。如果唔係打假波果 D 陰謀論,我認為葡萄牙這一屆水準真的好低,成隊波好似未甲好就出戰咁。睇到一個球員快速控球向前,另一個隊友竟然自己撞埋去,阻住自己人。又見到唔少應射唔射,反而去傳。應傳佢又唔傳,自己硬來等等。成隊波無默契,C 朗再強十倍都唔掂 >_<

最癲線係隻 比比,打完人見球証唔吹,佢走返轉頭用頭再撞多人一下,驚死球証唔趕佢出場咁,喂!你係咪重注買咗德國架其實?-__-'''

世界杯明燈 LuLu 終於破魔咒,而我好彩也買了隻美股 #LULU,今晚美股倉回報微創新高。但我是港股的 LuLu 呢 >_<!!

2014年6月14日星期六

美股真不錯

今晚又夠鐘起身睇波,skip 咗墨西哥那場,先一訓訓,然後才起身睇荷蘭大戰西班牙,順便睇美股有咩好的交易可以做。今日港股反彈,不過自己的持股嘛嘛哋,#6881、#371 一買即坐,偏偏止蝕放到最寬注碼壓到最細的 #1661 卻表現最好。

以為美股會大回,點知暫時又頂得住,個股繼續升,持股 THRM (只得一半貨)、NGVC 都有得升,之前沽了 ATTU 可能無錯,但錯在太快沽出 CLVS。美股倉六月回報暫時有 3.6% 算是不錯的。可惜自己太懶,如果每天晚上在美股臨收市前一小時,堅持起床積極尋找交易對象,回報應該會更好。


 今日澳門信德公司的船,罕有哋炒上海邊近岸的長提,好似有多人受傷。是否船長及船員夜晚掛住睇波唔夠訓? >_<

2014年6月12日星期四

世界開鑼

今晚是萬眾期待的世界杯掲幕戰,但有傳話球場以及配套設施都未完整起好,感覺上今屆世界杯會攪得甩甩漏漏 ^^'''。由於半夜摸起身,所以今晚要盡早訓,今日中午先出一篇文。

大市無乜嘢講,港股主要睇阿爺點走,這兩天的確是看到有不錯的抗跌力。美股開始回吐,但未見散水跡象。筆者暫時仍然以短炒為主,前日開始留意賭股的反彈點,#2282 下降通道底大約是 $23 左右,但當日下午已見跌幅收窄,不過下影線不算長,當時筆者還在懷疑是否袋鼠尾巴,但昨日已經強力反彈升近 4%,賭股普遍已反彈,筆者現價就不太敢追了。

昨日大家搶住黎買水股,#371 筆者改了三次價才搶到,今早半日微升 0.9% 暫時算沒有搶錯 >_<。過去一個多月,由於完全沒有時間睇港股各板塊的圖表,對大市炒甚麼完全無頭緒,其實當時高息股 (如 823、8)、內銀股等已悄悄炒上。

近日多了睇港股圖表,希望能找回對港股的感覺。不過之後個多月,預咗港股都會好淡靜,夜晚掛住睇波,朝早真係好難有精神炒股 >_<

2014年6月11日星期三

袋鼠尾例子


上圖是另一個袋鼠尾例子,美股 #CLVS。筆者在圖中紫色下跌裂口的當天找到此股,由於當天是巨量成交做出下跌裂口,在 screener 尋找成交異動股不難找得到。但不是巨量裂口下跌就必定是淡的嗎?

如果在高位又或者在剛失守 50 天線的附近,做出巨量下跌裂口,走勢就會好不利。但若果股價已由高位下跌了一大段,然後再做出巨量下跌裂口,或者任何巨量大跌的陰燭,都有可能加速見底 (至少是短期底)。傳統智慧:大成交做頭,小成交不是頭。意思是在股價上升了一段後,在高位突然出現巨量成交加速向前衝的話,股價可能很快就見頂。在底部出現大成交是同樣道理,可能很快見底。例子有 #TSLA,五月在低位做出大量下跌裂口,立即見短期底,反彈了一大段。

講返 #CLVS,圖中睇到藍色箭咀位置,曾出現過類似袋鼠尾的走勢,但有兩個問題:尾巴出現後隨一天是開陰燭,以及成交沒有明顯放量。現在回看藍色箭咀的那次不是合格的袋鼠尾 (當然看回放永遠很清楚,但當時卻會看不清大局,所以任何技術分析的買入法,必須配以止蝕點)

睇返今次走勢,筆者在紫色的巨量下跌裂口開始留意 CLVS,但在隨後一天出現袋鼠尾時沒有買入,因為它是在大市後半段才有買盤托返上去,而筆者當晚唔知醒起身 ^^'''

尾巴的隨後一天股價急升 6%,證明是有效的尾巴。筆者在隔天股價下跌 2% 左右買入,當時下跌成交縮量,如設目標價向上反彈至 10 天線,或者是下跌裂口附近,仍然有一些水位。

持貨兩天,今晚在 44.X 的附近沽出,獲利約 10%。暫時今晚股價好強,已急升到 45.X。筆者對於設立目標價、何時食糊等,仍然未有掌握。如果 CLVS 之後再急升甚至向上挑戰 50 天線,筆者一點也不奇怪,但問題是筆者沒有把握。希望以後多一點留意這類圖表走勢,獲得多一點經驗。

2014年6月9日星期一

短線反向指標

Weekend 偷懶無出文,今朝要睇埋 NBA 總決賽 Game 2 先得閒,馬刺可惜輸 2 分失了主場之利,但好似今年總決賽改制,把 2-3-2 改成 2-2-1-1-1,筆者一直認為前者對失了主場之利的球隊好不利,甚至就算開頭連取 2 場,之後要 3 個作客,也不是很化算。現時改做 2-2-1-1-1,對先失一場主場的馬刺來講,都無咁傷,只要之後兩個作客中取回一場,仍然有得打。

近幾個月港股大市都是上落市,無明顯趨勢,用追突破的追勢系統可能有點難度。美股大市不錯,連創新高,也有不少一直 keep 住強烈上升趨勢的股票。筆者開始轉去研究一些反向系統,希望能夠捕捉一些短線的 turnaround 走勢,以補追突破系統的不足。

暫時主要學習緊:袋鼠尾、下降通道、底背馳

袋鼠尾

簡介:短線出現下跌走勢, 失守 50 天線後還繼續跌,然後開始出現大成交追跌的情況,可能連開兩三支大陰燭,到某一天突然在低位出現買盤支持,即日跌幅收窄,成交放量,出現一條尾巴

條件:由三支燭身組成,第一支應該是陰燭,中間那支是有頗長下影線的 (可以陰燭或陽燭),第三支 (即尾巴出現後的一天) 必須是陽燭




#384 和 #178 袋鼠尾的成交量好高,美股#AAL 的成交沒有明顯放量。Elder 沒有詳細講解究竟袋鼠尾的成交量要幾高才算合格,可能他是重注形態本身多過成交量。但在低位成交量有不尋常異動通常都是轉勢訊號。

不過袋鼠尾只能用來捕捉短線反彈走勢,如 #178 這樣的明顯下降趨勢的股票,更加不能期望過高,幾日內上升 6-8% 已算不錯。但好似 #384 和 #AAL 本身是上期上升趨勢,而一段時間內跟從大市大跌,出現大成交洗盤,然後再袋鼠尾上升。那麼可以懷疑之前的下跌只是受大市拖累,或者是大戶借勢震倉,如能再突破 50 天線,可以期望高一點。

下降通道

簡介:顧名思義是以波段方式做出短線的下降趨勢,適合 range trading

條件:在接近通道底部買入,升到通道一半至通道頂部時沽出



#816 和 #JKS 都出現下降通道,要兩個低點和兩個高點才可劃出通道,所以只能等第三次下試通道底部才可以交易,以上兩個例子如果在第三次下試通道底時買貨,幾日內有非常不錯的回報。

不過如 Elder所講,通道線就像一個用鐵線網做的圍欄,而不是玻璃做的圍欄,後者一撞穿就會破掉,前者則有彈性。有時股價是會穿越通道線的,所以只能在大約位置買貨,而止蝕位可能要放寬少少。另外當股價上升時,未必一定會升到通道頂,如何設立目標價則要花一點心思了。

底背馳

簡介:走勢出現兩個短線低點,第二個低點股價低於第一個低點,即創了新低。但擺動指標如 RSI、MACD 等卻相反地出現第二個低點高於第一個低點,形成背馳

條件:指標的走勢要和股價兩個低點程完全相反的走勢,即股價一底低於底時,指標要一底高於一底。若果指標只是兩個底部成水平線,則背馳情況不算強烈


Elder 慣用 MACD 作指標,而筆者卻喜歡 RSI,以往筆者睇中期走勢只看 RSI(14),現時要捕捉短線走勢會改看 RSI(9),至於如何設目標價,筆者還在研究中

----------------------------------------------------------------------

這些只能用來捕捉短線走勢,不能用來看大趨勢,甚至 Elder 不建議在下降通道底部入貨,而是主將在下降通道頂部沽空,在上升通道底部才入貨的。筆者未有足夠的數據可以睇到成功率有幾高,但若果要大量成交配合才買,成功率可能會高一點。這些買入法在上落市就較適合。因為當時追突破的買入法失敗率好高。