美股業績期

最近自問真係好懶，錯過咗唔好賴市場，睇返納指早前已有見底訊號，以及一眾早前跌到扒街的市場領導股，好多都出現袋鼠尾，只是自己懶無做功課，無留意，無睇圖，以致錯過了最佳入市機會。有袋鼠尾出現未必是真正見底，但至少見短期底的機會較高，而且止蝕位容易設，只要股價再回頭跌落去自己條尾巴的下半部時，失敗的機會就高，可以微蝕走人。但如果買中，袋鼠尾之後可以升得幾快，兩三日有時可以有 1 成以上回報，對於短線炒家來講，是一種低風險、易搵食的訊號。

現時是美股業績期，公佈業績的股票會好波動，業績也無得估，先前的股價走勢未必有先兆可以睇到。

今日恒指跌 221 點，最近五個交易內開了兩支大陰燭，早前炒港股通以及 AH 折讓的股票，普遍已經回吐了很多，最終升唔起？還是當天市場太興奮，大戶有心壓低股價一排以便洗走部份散戶，然後才升？

近幾天殘股無動力，但早前被洗得好勁的環保類股份，走勢有所改善，筆者一直都有把數隻自己較喜愛的環保股放在 watch list，以便認為合適時就買回。今日買入 #371，可能買早了一點，今日未算是有效的突破。

----------------------------------------------------------------

在 StockTwits 見到有人 share 這幅散戶心態圖，就借來用此 share 一下：
1-2       上升趨勢明顯，但唔買等下先
3          不斷升，自己無貨咪好蝕？衝入去買！
4          覺得自己係天才，都話咗有排升架啦
5-6       開始跌？加碼！
7          等升返再賣都未遲
8-9       可麻醉自己，跌咪當長線投資囉
10-11   有無攪狠錯！應該仲有排跌，賣！
12        都話有排跌架啦！
13-15   見底？無夢無咁早，實跌返落去架
16-17   乜真係升返？ -_-'''

我自己套入今次樓市的週期：

1 = 2005-2007
2 = 2008-2009
3 = 2010-2011
4 = 2012-2013  (上一個週期高峰係 1996-1997)
5 = 2014-2015
6......................................

4-5  這段時期是最多專家，我感覺上 2012-2014 都係，個個都好似化身樓市專家咁，個個朋友出黎食飯都話：我都話樓價會不斷升，點會跌架？你睇依家個個幾好景？唔買樓就傻仔！

從過去我都有在朋友間發表一下對樓市的睇法，到這一年我真係聽別人發表偉論算數，但我個心諗：我 06 年買工廈掃車位時，又唔見你地係樓市專家？ ^^

明天復市

過了一個長假期，忙於湊仔和看 NBA 季後賽，以及昨天回鄉拜山，這個假期過得好忙碌。今晚美股復市，明天港股復市。美股看似已經暫時回穩，上週四晚筆者做了一些功課，也入了兩隻股：THRM、EXH。自己早前懶 update watch list，根據舊有的 watch list，主要都是納指之前的領導股，這一浪跌到體無完膚，所以自己覺得大市特別差，其實美股仍然有不少股票最近升得不錯，一直保持住上升趨勢的。

我成日話香港議員廢，其實澳門議員一樣，最近在討論賭場應否禁煙時，澳門有議員話做荷官返工時無得食煙，賭場唔禁煙，比佢地吸多 D 二手煙都算好事 wor。更有議員話，吸煙唔係壞習慣，唔吸煙先係壞習慣。真係痴痴地線 ^^'''

近年澳門沙梨頭善豐樓變危樓事件，讓大家發現原來好多以前的工程，都是偷工減料，更加發現原來建築商起好幢樓出售開始計，如果超過五年才發現幢樓有問題，業主就不能追討建築商，因為過了追討期限。

善豐樓業主是絕對值得同情，大佬現時樓價咁貴，好多業主是剛以高價買入，點知就變危樓，分分鐘鐘血本無歸。但係澳門地少人也少，大家關係密切，雖然過了追討期，但大家嘈得兩嘈，就有團體出來認頭話重建條數佢地包。澳門就是如此與眾不同，如果發生係香港必定無得追。試問有無團體真心肯花咁多錢去幫人重建？又唔係開善堂。條數係邊個出，大家心裡有數，總之搵人出面攪掂佢，大家 happy ^_^

不過建議澳門讀者，買樓盡量唔好選擇買太舊的，尤其是舊城區一排過的舊式大廈，因為這些樓好多都是減工減料，是借隔離幢樓來借力，一幢借一幢的力，如果成排樓中間有一層重建，地盤一打地基其他樓真係好容易震到變危樓。

最好買獨立屋苑，因為現時澳門無論新樓舊樓，新區、中區、舊區、北區，都係新一色：咁貴！！橫掂尺價都係貴到痴線，真係選幢新一點的獨立屋苑較安全。當然我自己就堅信，未來數年必定有一個樓價低潮期啦，到時渣住錢任君選擇，好過現時比業主吊高黎賣谷鬼氣。不過澳門人十個有九個半都唔會相信樓價有跌的一日呢 ^^

調整

近排股市難搵食，筆者都要鋌而走險玩短線，希望搵餐苦飯食吓。但有條友仔就好食好住，變得好肥美，講緊就係下圖既小魚 BB，你哋睇佢嘆到呢 ^^'''

今日恒指跌 367 點，講真指數跌我唔多意外，畢竟由低位上升了一大段，RSI(14) 之前升到 70，短線極有調整壓力，今日雖然大陰燭，但只是微微跌穿 10 天線，成交 636 億也不算高。

但今日好多二三線股都跌到反吐，尤其是中資股，早前熱炒 AH 折讓的今日唔少都下跌，#1988 好彩早前以短線超買為理由主動沽出獲利，本想等佢回落近突破點再買入，但今日大跌 8% 一支大陰燭插落去，也暫 hold 不心急買回。

現時市況有點青黃不接，上年強勢股今年跌唔停，落後殘股由低位反彈唔少，但係做底時間太短，未算是扎實的底部突破，能否強勢 turnaround 暫時未知。新一批市場領導股暫未出現。

今晚美股輕微調整，納指又是表現最差跌 >1%，唔少科技股又大跌。不過筆者 check 到有些股票又真是 keep 住唔錯的上升趨勢，以往自己的 watch list 集中於納指動力股，所以最近才覺得完全無交易對象。明天有時間真要 check check 資金現在炒緊哪一個板塊。

美股反彈

今日港股指數表現不錯，但唔少二三線股跌得幾甘，環保類股票今日是災區之一，手機配件如 #732、#2382 都大跌。AH 折讓股以及唔少內地券商大多調整，但 #717 和 #227 繼續急升。

今晚美股有反彈，單看一日兩日不能知道是否已見底，加上是近業績期股價可能會好波動，自己又未有時間重新 check 一次究竟有哪些板塊轉強 (有可能和港股一樣，是資金換板塊來炒)，所以暫未有意欲在美股市場交易。

自己暫時對港股的應對：
1. 睇緊大市
2. 睇低殘板塊中那些最先彈出的股票，在突破 50 天線能否企穩再升過
3. 留意上年升幅不大的板塊，有些今年有機會轉強
4. 短線避開如科網、環保類等走勢其差的板塊

-----------------------------------------------------------

長毛報名參加中國行，等我早前還有點期望，期待佢係開會時向中國官員掟蕉的歷史性一刻出現 tim，如果佢為民主真係去到咁盡，我諗我真係會改觀，就算始終唔 like 佢，我都會尊重佢，服佢 ^^

但係！好流囉，帶埋大量平反六四標語上去，咁你即係預咗去到海關止步，一早預咗打回頭啦，咁又可以收工 trip 都唔洗出，我都唔知講乜好。要整六四標語有幾難？你係有心平反，洗鬼由香港帶上去咩，你上到去即刻自制話咁易啦，再唔係都唔洗乜嘢標語，你係中國官員面前大聲粗口指住佢地黎小又得，攞台面 D 紙筆掟埋去又得，再唔係除隻鞋飛埋去都得，問題係：你無吉屎囉！

做得議員你份人工唔低，其實有好多工作應該做，作為反對派，我諗 buy 你哋既選民唔介意你哋行為過激，但要激得有道理，係真心為民爭取，要真心做好自己份工。好似開會就離場玩坑議散 band 直接收工走人，或者開會用 ipad 睇靚相，同中國一句無得傾就 trip 都唔洗出，你上去鬧下人都叫做交下功課丫。大佬八皮嘢一個月，立稅人出糧比你架   >_<
 

美股再插

恒指週五一度試過倒升，但其後也頂不住地心吸力下跌 183 點，成交近千億，國指這兩天跑輸恒指。相對美股最近港股真的很強，但要留意美股是否會演變成股災式下跌，以及 「港股通」能否帶領港股重回牛市。形態上恒指、國指已突破雙底頸線，的確是利好形態。

美股上週四納指大跌 >3%，昨晚又跌 >1%，過往高增長的納指領導股，基本因素未見有問題，但市場就係咁，有時股價走勢行先，壞消息才跟尾出台，等看這一輪業績期或者能有所啓示。炒股最重要還是尊重股價，當股價走勢出現重大利淡就要堅決撤走，否則到壞消息真正出台時才如夢初醒，回報已跌入深淵難以返身。

最近筆者在留言區多言，多說一些操作心得，其實自己一直自認是一個炒股的中學生，雖然由小學畢業，但畢竟和老手相距十萬八千里，自己仍有一大堆問題未能解決。老實講論炒股經驗、成績、帳戶 Size 均遠勝在下的讀者太多，所以筆者一直不敢自認老師去教人。在留言區志在分享和交流，歡迎各位讀者們給予筆者意見，可能我向你們學習的地方仲多。

 -----------------------------------------------------------

Weekend 又來吹吹水，最近 TBB 前 PA 出書鬧爆 TBB，引起全城熱話。當然作者選對時間來出書，迎合廣大讀者的口味，策略頗為成功。

但是佢原來只做了七個月，七個月......七個月就可以寫血淚史，咁我最敬愛的譚玉瑛姐姐做了三十二年，咪可以出一本百科全書？ ^^'''

其實莫講話 TBB，食得娛樂圈這行飯，有 D 嘢真係預咗，娛樂圈一直都唔係易做架。TBB 的確係刻薄，但當初入得去做是否一早預咗？做得唔開心其實就好心分手，有時無謂返轉頭數臭自己的前老闆。

現時那些已上岸的大明星，出身時的血和淚會少？某天王都話後生時試過比黑社會用槍指住迫佢拍戲啦，食娛樂圈依行飯不嬲都係咁辛苦，就算已貴為天王和天后級的偉仔和子怡，拍 <<一代宗師>> 都超辛苦，一個打斷手，一個係雪地凍到肺炎。

細心一諗，其實唔少大明星都是 TBB 出身，華仔、發哥、偉仔....。即使隔離台的 ATT 也唔少猛人架，哥哥、家輝都係 ATT 出身，連宇宙最強都拍過 ATT 兩部劇。佢地離台以及大紅大紫後其實都無數臭前老闆。

所以好似杜先生那些言論，我只會說一句：做人飲水要思源！

中港融合之股市篇

一提起中港融合相信大家都會媽媽聲，但兩地股市攪融合，唔理將來攪成點，總之今日就好多人賺到錢。其實我都唔知 「互聯互通」係乜東東，應該類似之前港股直通車掛，今日市場也像當年直通車一樣，炒 H 股對 A 股有大折讓的股票，相關股票今日大部分急升。

筆者手腳慢今日無炒到相關概念，但問心一句如果自己當時在電腦前面，都未必夠胆跟風炒。自問無跟消息炒股的本事，唯有依據自己買入系統，今日買入升得少少的 #1171，其他大折讓股暫時唔敢跟。

不過今日大市成交破千億，真係真金白銀有資金追落去，今日算是大成交升穿雙頂頸線，但短線升幅過急，RSI(14) 升到接近 70，近一年當 RSI(14) 升到接近 70 都差不多見短期頂，大市仍有機會再次回落。

美股方面，我覺得大市仍然未穩，今晚納指暫時又跌超過 1%，唔少股票又再大跌，最近美股倉一直空倉，自己完全找不到交易機會，watch list 中大多數是納指股票，近排都洗到面目全非。可能要搵返 D 傳統道指成份股？或者是金融股來買較穩陣？

--------------------------------------------------

我記得以前馬來西亞好太平，雖然是回教國家，但筆者好喜歡去，以前總共去過四五次旅遊 (包括沙巴)，但近排馬來西亞突然好似變晒咁。之前馬航失踪政府又好多隱瞞，今次武裝份子甚至直接衝入沙巴一間酒店內捉人，現在開出要求贖金七千萬人仔。

我自己就對馬來西亞警方以及所謂的談判專家完全無信心，今次睇下中國政府點樣救到個女仔，估計都係比咗贖金先。希望個女仔可以無事平安回家。但短期內我真係唔敢再去當地喇 >_<

好心分手

大家不要奇怪今日有這個標題，是因筆者近排上網睇新聞，唔知點解超多都是男女分手，卻攪出人命的負面新聞。有些人是自殺，有些甚至去殺人，其實拍拖分手也不是甚麼大不了的事，唔洗攪到咁大件事掛！不過真係要提醒朋友們，尤其是女性朋友，如果遇到分手問題，又發覺對方神色有異、情緒激動，真的不要再刺激對方，現今社會好似好危險.....-_-''''

另外也發現一個問題，我覺得有時睇網上新聞但唔似新聞，好似睇緊八掛雜誌或者小說多 D，部分寫新聞的，比給我的感覺佢地似作者多過似記者，寫嘢好有老作成份。首先作個誇張標題引你入去睇，有時入到去又唔係咁寫。更甚者把一些未經證實的小道消息當新聞，例如今日把某人寫成一個超級壞人，聽日又寫原來另有內情。都唔知邊條新聞係真，邊條新聞係假。

我記得以前社會上有句話："嗱！新聞都寫咗出黎！仲有假既！？"

這句話我細個都聽唔少，證明以前新聞登出前，係經過好審慎咁求證過，出錯的機會少，真係刊登出流料，報館係要好鄭重咁道歉。Sorry 我唔係想得罪現時新聞工作者，但我覺得以前工作認真好多。

---------------------------------------------------

講完廢話，美股今晚暫時微升，這兩天暫時回穩。恒指今日再升 246 點，今日更出現一個小型上升裂口，但目前日線圖 50 天線未明顯向上彎，而週線圖 50 週線是水平橫向，即是沒有明顯趨勢。

近日唔少網友可能頭都痕，究竟繼續死守強勢板塊？甚至趁強勢回調時應該加注？還是轉至落後低殘板塊？筆者近日只從短線角度去睇，的確落後板塊短線值博率較高，但由於今次資金轉向係急速，好多看似升得不錯的落後殘股，其實打底未夠扎實，真的不要期望過高。

以內銀為例，大多是做高低腳雙底回升，但這個底部維持時間只得兩個月。如果再放遠一點，放出三年週線，這類走勢曾經試過，但長線內銀仍是一個大型上落格局，升得多自然會跌返落去。無謂看得太長遠。

筆者 watch list 大部分是落後股而有機會短線 turnaround 的股票，但早前的強勢股也留了一部分在 watch list，以便觀察其走勢。如果有跡象止跌回升，仍然可以入市一博。

Van K. Tharp 強調買入位置不太重要，甚至選甚麼股票來買也不重要，重要的是出場點以及計好風險與回報比例。筆者近日也覺得在港股這個大型上落市，有時太在意想捕捉到大牛股，反而令自己操作不順。筆者正在嘗試放開，不會太在意去選誰是股王，反而集中學習怎樣去「操作」一筆交易。

如果真正學懂了 「操作」，一隻平平無奇，有上落但無趨勢的股票，如果識走位炒幾轉，可能比千挑萬選想選出一隻股王，更加有效率。

美股又跌

美股早段曾經微升，但不久再次下跌，又是納指跌得較甘 >1%，watch list 股票普遍跌 >3-4%，太陽能股普遍跌 >6%，單睇走勢，太陽能、生化藥股、科網等好多板塊已現熊走勢，過往是納指先調整，強勢股 follow 短線調整，但 keep 住中長線上升趨勢又再升過。今次是強勢股先暴跌，表現遠跑輸指數。

今日恒指微跌 132 點已算不錯，國指還可以倒升。單論短線走勢近日港股反而強過美股，資金回流炒中港股市嗎？但目前不敢睇遠，以短炒為主打，先避開上年升幅過大的強勢股，轉吼一些今年才出現突破的股票，以及一些低殘有機會 turnaround 的中資股。上年越強的股票，近排跌得越勁，濠賭、科網、環保股今日表現都跑輸大市。

另外技術上宜留意，強勢股如果在年初做出最高點，其後調整再反彈時未能破頂，第二個頂部位置明顯低於第一個頂，真的要小心，如果之後再失守 50 天線，配合下跌成交放量，基本上要預了會開始熊走勢。甚至不用等再向下跌穿前一個週線圖的調整低位，已經可以提早沽出。

因為現時太多上年的強勢股，在今年出現同一個走勢，可能資金是有規模地以同一個形式操作，在高位以至第二個反彈浪時，貨可能已由強者手中轉入散戶手中。總之如果強勢股之前趨勢是明顯一浪高於一浪的，到今年做出一個脫離上升軌道很遠的急升，之後打破一浪高於一浪格局未能再破頂的，真的要開始小心留意。

過往兩年環球低息環境、美股強爆、香港樓市升天、自由行資金湧港、失業率低企，但港股是上落市而沒有出現牛爆市況。今後美國退市、加息預期、美股調整、樓市見頂、中港矛盾等問題，港股想牛爆其實好難。我甚至覺得不單止股市，港澳經濟未來幾年難再有突破，過去十年美好的時光有機會暫告一段落。

----------------------------------------------------------

在此再次祝美女 Blog 友 Ginger 妹妹生日快樂！ ^O^

炒股 Blog 較少美女讀者，就算有都好少留言，Ginger 妹是我們留言區中罕見的美女，為我們苦悶的炒股生活添加了一點色彩 ^^

納指大跌

上週五晚美股納指大跌 2.6%，不少股票又再洗白白。#700 再大跌 4% 穿前裂口低點，估唔到今次是先來一個補回裂口再跌過，今次買 PUT 做淡輸時間值不宜死守，所以於補回裂口時止蝕，但如果有下次出現巨量下跌裂口，一樣是十次出現十次都會看淡。不過要分清是在高位做出的下跌裂口，或者是一個大裂口跌穿 50 天線才算淡。如果是在一段頗大幅度跌勢之後，再出現一個巨量下跌裂口，則有可能是消耗性裂口，反而有機會加速見底。

這兩天筆者觀望居多，一來恒指由低位回升了一大段，短線向下調整的壓力越來越大。其次是可以炒的板塊太窄，首先要避開科網股，短期內不宜撈底。其次是今次升市主力是低殘中資股，但對於這類股，我會先看能否炒短線，要作中線收集，除非把止蝕定得好寬，否則可能會被震走 N 次。

中線要確認 turnaround，最好睇返週線圖，看看打底過程是否扎實，是否有強者在收集股票的跡象，最終還要等有效的向上突破底部區上限才算。

美股回升

美股標普 500 又重上新高，早前一直崖打的納指也重上 50 天線上，美股的指數仍然強過中港股市九條街。但筆者最近和美股脫了節，keep 開的 watch list 並沒有合適的股票可以回補，太耐無更新 watch list，各位如有好嘢可以在留言區推介一下，借來抄功課 ^_^

港股方面，國指升到雙底的頸線附近，今日回吐。恒指雖已升穿 50 天線，但 50 天線仍然向下，過往幾年在 50 線仍然向下的情況下，恒指升穿 50 天線後好多時都不能一次過企穩，等多一個調整出現，看看是否又跌不下去，可能要等條 50 天線回升，才真正展開較長的升浪。

近日資金流入低殘中資股，我個人暫時打算在內房、鐵路、內銀、內券這些板塊中尋寶，另一方面也會留意強勢的環保股以及燃氣股，而手機配件股也好似不錯。

有網友問起 Van K. Tharp 的書，我只睇了兩本：

<Trade Your Way to Financial Freedom>   <交易 - 創造自己的聖杯>
< Super Trader - Make Consistent Profits in Good and Bad Markets>  <想法對了，錢就進來了>

第一本在交易系統、風險和注碼分配上解釋得較詳盡，Pok Pok 兄推介必定要看第二版 (和初版有分別)。第二本較多講交易者在心態和信念上的準備。

大家有興趣可以一看。但看 Van K. Tharp 的書前，最好有一些交易系統的簡單概念，尤其是必須尊重 「止蝕」這一個重點。若果閣下是買股從來都堅持隨心而動，又堅持永遠不設止蝕的話，那麼這兩本書對閣下是毫無意義的。

看過這兩本書，再和 <Trading in The Zone> 以及 <Come into My Trading Room> 互相引證以及互補長短，希望能改善自己的交易績效。

-------------------------------------------------------------------

好耐無吹水，近日見有人 (仁) 興玩 「接力絕食」，話用絕食爭取普選 wor，你地班嘢咁高智商，真係唔夠你地玩喇，絕食都可以接力，好嘢！我認輸 ^^'''

其實好心做下 D 實際又有建設性既嘢得唔得？今次中央邀請你地上去直接對話，真係要把握今次機會，有咩想爭取就直接面對面講，試下中央底線，探一下敵情，遠勝於係香港做十場這類無聊 show 啦。

但唔係一直主張政治要有透明度？要公開公正？中央本來安排公開會談，點解你地今次反而要求單獨會面？

大市不差？

今天以為大市會倒跌，但最終恒指升 85 點，暫時仍受制 50 天線，今天仍有不少股票跌超過 5%，但也有不少早前陪跌的強勢股有不錯的反彈，個人感覺大市現時不差。不過技術上向下彎的 50 天線仍是重要阻力，現時如果恒指再出現任何下跌裂口都是強烈利淡訊號。

今晚美股回升，但自己觀察開的強勢股反彈力仍是一般，美股暫時沒有入市心水。

香港樓市吹淡風，新盤不斷低價推出，衝擊二手市場，二手市場業主一改之前企硬或者反價的態度，議價空間較大，甚至有趕住出貨者以低於市價出售。但另一邊廂的澳門，樓價卻停不了，好似無止境地上升，不過澳門市場不嬲都是滯後，我認為若果香港樓價真正進入跌市週期的話，澳門樓價是沒可能反週期再升多一大段，調整只是時間問題。

李超人近年比人 「問候」唔少，但就算日鬧夜鬧，他仍然是香港首富。除了鬧之外，其實有無站在他的角度去看大勢？他近年大部分動作都是賣、賣、賣，賣酒店、賣屈臣氏、賣百佳、拆港燈上市......一早部署好套現減債大行動，為仍然未到的加息週期做好準備。

相反近年市民都是買、買、買，澳門人更甚，買樓、買車、買車位，同時供緊幾樣嘢，個人消費以及債務上升，好似和李超人站對家 wor，咁究竟誰對誰錯呢？未來自有答案 ^^