指數追跌

今晚又去練波，未得閒睇發生咩事，不想亂 up 當秘笈，出一篇短文算數。日股大插水，單日暴跌 7.32%，我都未知發生咩事。港股連續兩日細價股洗白白，今日到指數追跌，恒指全日大跌 591 點，成交明顯放量至 836 億。

老實講前日無端端電力股大跌，一連中四隻股票止蝕，我已經開始提高警覺，當天沽貨後有人奇怪點解我唔立即補返其他強股，根據我自己經歷，因為持股較分散，好少機會出現單日連中幾隻洗倉股，如果出現這種情況好可能大市有問題。昨天繼續洗，洗到不同板塊，跌幅全面，但仍然有一些強勢股逆市上升，雖然我又要止蝕兩隻，但手多多又買入中國動向 (3818)。

今日指數終於追跌，好多昨天不跌的，今日大跌，始終大市是輪住來洗倉，真的很難避免，最好就少做少錯。恒指這幾天走勢，其實有點似今年 1 月尾至 2 月頭，首先同樣是恒指做出一個小型上升裂口，形勢看似大好，連殘股都開始被炒起，跟住立即連跌兩日補回上升裂口，然後突然來一個下跌裂口再加一支大陰燭，成交放量。

如果真的 copy 這個走勢，後市當然不妙，可能是大跌市的開始。但短線恒指已跌到 50天線附近，可能有一定支持力，作出一個小型反彈，但今早的下跌裂口就是致命阻力，如果不能回補裂口又再跌過，真的危危危。

如果成功回補裂口，以及重上 5 月高位，筆者才會開始看好，這段不上不落的期間，我的策略是放鬆心情，少動作多觀察，旁觀者清好過入場拼殺當局者迷。一方面我會拆開收息股作另一個組合，作長線持有不止蝕，因為目的是長線收息。另一方面玩走勢的持股，目前只餘下幾隻，我會按每一隻的止蝕位行事，到價就打，打一隻少一隻。

環球開始出現一些不尋常動作，先是黃金大插，日股大升。這次又輪到日股大插。筆者不知有甚麼啓示，只是感到不安，不安就減少操作，專心睇埋 NBA 季後賽 ^_^