2014-6-26

 

今晚好忙，爸爸比小魚 BB 攪到無覺好訓，留言區就爆都無時間寫文，唯有用小魚 BB 張相頂住先。

小魚 BB 求先終於訓咗，但爸爸卻到現在都未訓到哦，現在時間係清晨 4 點半   >__<

港股大跌

恒指 23300 左右的阻力位屢攻不破，在附近拉鋸了近兩週，今日又回落到 50 天線附近。今日恒指大跌近 400 點。國內股市今日沒有大跌，但這段期間其實國內股市都是悶局，有好消費也只是升一兩日貨仔。可見現時大市欠缺上升的催化劑，阿爺就算放寬銀根、放寬樓壓等，也只是「揤牙膏」形式，而不是開行水喉去馬，所以對這類放水的好消息，投資者反應冷淡。

不過之前滬港通卻有唔少股票升了一大段，當時有網友話偉哥炒錯的 #1057，當時偉哥雖然炒即日，但都有講過如果在當天低位買貨的，其實可以留一留不用急於沽貨，因為之後好可能炒返佢。結果 #1057 比宣佈滬港通當日的高位，還要升了許多，今日再升 14%。

有網友指出近半年，在港股市場用技術分析，很難搵食，相反價值投資法更好用。我個人是同意的，因為港股沒有明顯上升趨勢，對於運用追勢系統有一定難度，相反大部分股票跟從大市大跌時，有些股的投資價值就浮現，由股價「殘到唔合理」開始炒，炒到股價「升返到較合理」時沽出，食這段波幅都很和味。

不過話又說回來，筆者自己在港股難搵食，不代表技術分析一定唔 work，相反有些高手其實只用追勢系統，這半年一樣可以在港股市場搵到唔少回報。筆者只能怪自己學藝不精吧 ^^'''

今個月自己在美股市場反而做得算合格，暫時三週回報 >4%。美股市場龐大，用技術篩選較易找到心水股票，港股市場就算找到一些走勢靚的細價股，由於日均成交不足，搵到都唔敢買。今日把自己一個空着的港股私人倉，轉做美股，希望下半年可以做多一點交易。

睇返世界杯精華，葡萄牙先入一球，都比美國連入兩球追凸，好彩臨完場再入一球追平，迫和美國。但我諗都係出唔到線，因為加納必定同葡萄牙死過。而德國和美國各有 4 分在手，只要雙方和波都可齊齊出線，加上美國教練係奇連士文，咁德國和美國就真係 「有商有量」喇 ^^

香港一日遊

昨天去了香港一日遊 shopping，完全無睇大市，無得上網與外界隔絕，突然間無咗 whatsapp 那些提示音煩擾，耳根都清淨咗。不過始終唔慣香港生活，大街小道都太多人，車反而唔算多，因為全世界按城市大小比例，汽車密度最高應該是澳門 >_<。

朋友中午帶咗我去銅鑼灣食一蘭拉麵，嗯，格局唔錯好有日本 feel，但是百幾蚊一個拉麵，老實講，我食兩碗都未必飽 ^^'''。之後去 Ikea 行，傢俬及屋企 design 那一 part 的 show room，椅子、梳化、床、飯枱.....全部坐晒人！一家人坐係度，認真度下買咩傢俬那些 OK 啦。但係見到唔少情侶坐下張梳化度談情，見到成班學生霸佔了整間房，係度上網打機、吹水、猜拳都有！真係當咗果度係自己屋企嗎？見到這個現象，我更加肯定我哋和中國人是同一個種、同一個根性，真係賴都賴唔甩 ^^。

說回股市，港股我真係無乜心機睇，炒的股票好飄忽，同一個板塊又唔係同時炒起，有時有價有量哋上升，以為會借機炒上，點知是一兩日貨仔就沒戲了。港股連日窄幅波動的悶局，唔知會唔會和世界杯有關。講真夜晚要睇波，朝早邊有精神炒股呢。我有時夜晚要炒美股，朝早 7 點幾要同個仔返學，八點幾車個女去外婆度，到我返工......夜晚又湊女、3 點又要起身睇美股，就黎人都癲。現在連世界杯都無精神去睇了 >_<

不過十六強開始點都要抽些時間睇，如果唔係又要等四年喇......

尋晚 Face book 見到一段短片，「星巴叔」 兜巴星港獨男，真係好激。我唔鼓吹暴力，但有 D 人比人打就係唔值得同情。話雖如此，「星巴叔」雖然係為民請命，但始終要付上法律責任，何必呢？

馬刺奪得 2014 年 NBA 總冠軍

今日都係掛住睇波無心炒股，今朝好怕馬刺係主場攪唔掂熱火，比熱火追返兩場的話，始終有變數。尤其是第一節 James 進入發癲模式，單節獨取 17 分，睇到我有點緊張。但睇黎是我過慮了，今場繼續係馬刺開啓 SM 模式鞭打熱火，下半場幾乎無還手之力，第三節已進入垃圾時間。

總決賽 MVP，其實我個人主觀願望係給贊路比利，因為 GPD 三巨頭當中，只有贊路比利未攞過 FMVP。這個被高比曾經評為當時地上最強的兩大 SG (另一個當然係高比自己)，一直都留係馬刺做後備，論實力佢去邊一隊都可以打正選，甚至我認為頂薪都有人比得出。但佢為配合教練普波域治套系統，甘願做後備，放棄個人榮譽，真係好難得。

而我最初估最大機會係鄧肯，因為聽聞要參考埋整個季後賽的表現，鄧肯一如既往係穩定！剛破了 NBA 季後賽唔少紀錄。但最終給了年青的 Leonard，頭兩場佢表現一般，但之後兩場就是大爆發，這兩場好關鍵，因為成功限制 James 得分之餘，還可以自己係 James 面前狂斬分，最重要係在熱火作客連取兩場，FMVP 也是當之無愧。

其實由 Leonard 這個後生仔得獎，對馬刺未來是有好正面的作用。其一是佢信心大增，有可能一舉成為明星球員，其二是佢係馬刺攞到 FMVP 這個最高榮譽，將來留隊的可能性就大大增強。我諗馬刺未來都會以 Leonard 和 Green 這兩個人為核心，不要小看 Green，今年雖然無上年那樣破三分紀錄，佢今年轉打防守，防死了韋迪，有好多偷球，貢獻也十分大的。

柏加仔就不用我多說，今年佢的作用反而無咁大，因為馬刺整體太強了 ^^'''。反而一定要提 Diaw，佢真係勁到無朋友，存在感太強了！可以在高位策應，可以射三分，而且更加有突破分波，又可以睇準 match up 自己落 post 爆入內線，幾乎五個位佢都可以打晒。

今年 Wade 狀態差唔在講，James 防守能力也大幅倒退，竟然讓和他對位的 Leonard 打出 MVP 級水準。不過總決賽連續三場輸到無影，我諗係時候要重新估計 James 作為追趕 Michael Jordan 之後，想成為球神的可能性了。James 球迷可能不認同我，但我覺得莫講話 Michael Jordan，癲峰 Kobe 的 level，James 都未必能達到。

今晚葡萄牙比德國佬強暴，真係無眼睇。如果唔係打假波果 D 陰謀論，我認為葡萄牙這一屆水準真的好低，成隊波好似未甲好就出戰咁。睇到一個球員快速控球向前，另一個隊友竟然自己撞埋去，阻住自己人。又見到唔少應射唔射，反而去傳。應傳佢又唔傳，自己硬來等等。成隊波無默契，C 朗再強十倍都唔掂 >_<

最癲線係隻 比比，打完人見球証唔吹，佢走返轉頭用頭再撞多人一下，驚死球証唔趕佢出場咁，喂！你係咪重注買咗德國架其實？-__-'''

世界杯明燈 LuLu 終於破魔咒，而我好彩也買了隻美股 #LULU，今晚美股倉回報微創新高。但我是港股的 LuLu 呢 >_<！！

美股真不錯

今晚又夠鐘起身睇波，skip 咗墨西哥那場，先一訓訓，然後才起身睇荷蘭大戰西班牙，順便睇美股有咩好的交易可以做。今日港股反彈，不過自己的持股嘛嘛哋，#6881、#371 一買即坐，偏偏止蝕放到最寬注碼壓到最細的 #1661 卻表現最好。

以為美股會大回，點知暫時又頂得住，個股繼續升，持股 THRM (只得一半貨)、NGVC 都有得升，之前沽了 ATTU 可能無錯，但錯在太快沽出 CLVS。美股倉六月回報暫時有 3.6% 算是不錯的。可惜自己太懶，如果每天晚上在美股臨收市前一小時，堅持起床積極尋找交易對象，回報應該會更好。

 

 今日澳門信德公司的船，罕有哋炒上海邊近岸的長提，好似有多人受傷。是否船長及船員夜晚掛住睇波唔夠訓？ >_<

世界開鑼

今晚是萬眾期待的世界杯掲幕戰，但有傳話球場以及配套設施都未完整起好，感覺上今屆世界杯會攪得甩甩漏漏 ^^'''。由於半夜摸起身，所以今晚要盡早訓，今日中午先出一篇文。

大市無乜嘢講，港股主要睇阿爺點走，這兩天的確是看到有不錯的抗跌力。美股開始回吐，但未見散水跡象。筆者暫時仍然以短炒為主，前日開始留意賭股的反彈點，#2282 下降通道底大約是 $23 左右，但當日下午已見跌幅收窄，不過下影線不算長，當時筆者還在懷疑是否袋鼠尾巴，但昨日已經強力反彈升近 4%，賭股普遍已反彈，筆者現價就不太敢追了。

昨日大家搶住黎買水股，#371 筆者改了三次價才搶到，今早半日微升 0.9% 暫時算沒有搶錯 >_<。過去一個多月，由於完全沒有時間睇港股各板塊的圖表，對大市炒甚麼完全無頭緒，其實當時高息股 (如 823、8)、內銀股等已悄悄炒上。

近日多了睇港股圖表，希望能找回對港股的感覺。不過之後個多月，預咗港股都會好淡靜，夜晚掛住睇波，朝早真係好難有精神炒股 >_<

袋鼠尾例子

上圖是另一個袋鼠尾例子，美股 #CLVS。筆者在圖中紫色下跌裂口的當天找到此股，由於當天是巨量成交做出下跌裂口，在 screener 尋找成交異動股不難找得到。但不是巨量裂口下跌就必定是淡的嗎？

如果在高位又或者在剛失守 50 天線的附近，做出巨量下跌裂口，走勢就會好不利。但若果股價已由高位下跌了一大段，然後再做出巨量下跌裂口，或者任何巨量大跌的陰燭，都有可能加速見底 (至少是短期底)。傳統智慧：大成交做頭，小成交不是頭。意思是在股價上升了一段後，在高位突然出現巨量成交加速向前衝的話，股價可能很快就見頂。在底部出現大成交是同樣道理，可能很快見底。例子有 #TSLA，五月在低位做出大量下跌裂口，立即見短期底，反彈了一大段。

講返 #CLVS，圖中睇到藍色箭咀位置，曾出現過類似袋鼠尾的走勢，但有兩個問題：尾巴出現後隨一天是開陰燭，以及成交沒有明顯放量。現在回看藍色箭咀的那次不是合格的袋鼠尾 (當然看回放永遠很清楚，但當時卻會看不清大局，所以任何技術分析的買入法，必須配以止蝕點)

睇返今次走勢，筆者在紫色的巨量下跌裂口開始留意 CLVS，但在隨後一天出現袋鼠尾時沒有買入，因為它是在大市後半段才有買盤托返上去，而筆者當晚唔知醒起身 ^^'''

尾巴的隨後一天股價急升 6%，證明是有效的尾巴。筆者在隔天股價下跌 2% 左右買入，當時下跌成交縮量，如設目標價向上反彈至 10 天線，或者是下跌裂口附近，仍然有一些水位。

持貨兩天，今晚在 44.X 的附近沽出，獲利約 10%。暫時今晚股價好強，已急升到 45.X。筆者對於設立目標價、何時食糊等，仍然未有掌握。如果 CLVS 之後再急升甚至向上挑戰 50 天線，筆者一點也不奇怪，但問題是筆者沒有把握。希望以後多一點留意這類圖表走勢，獲得多一點經驗。

短線反向指標

Weekend 偷懶無出文，今朝要睇埋 NBA 總決賽 Game 2 先得閒，馬刺可惜輸 2 分失了主場之利，但好似今年總決賽改制，把 2-3-2 改成 2-2-1-1-1，筆者一直認為前者對失了主場之利的球隊好不利，甚至就算開頭連取 2 場，之後要 3 個作客，也不是很化算。現時改做 2-2-1-1-1，對先失一場主場的馬刺來講，都無咁傷，只要之後兩個作客中取回一場，仍然有得打。

近幾個月港股大市都是上落市，無明顯趨勢，用追突破的追勢系統可能有點難度。美股大市不錯，連創新高，也有不少一直 keep 住強烈上升趨勢的股票。筆者開始轉去研究一些反向系統，希望能夠捕捉一些短線的 turnaround 走勢，以補追突破系統的不足。

暫時主要學習緊：袋鼠尾、下降通道、底背馳

袋鼠尾

簡介：短線出現下跌走勢， 失守 50 天線後還繼續跌，然後開始出現大成交追跌的情況，可能連開兩三支大陰燭，到某一天突然在低位出現買盤支持，即日跌幅收窄，成交放量，出現一條尾巴

條件：由三支燭身組成，第一支應該是陰燭，中間那支是有頗長下影線的 (可以陰燭或陽燭)，第三支 (即尾巴出現後的一天) 必須是陽燭

#384 和 #178 袋鼠尾的成交量好高，美股#AAL 的成交沒有明顯放量。Elder 沒有詳細講解究竟袋鼠尾的成交量要幾高才算合格，可能他是重注形態本身多過成交量。但在低位成交量有不尋常異動通常都是轉勢訊號。

不過袋鼠尾只能用來捕捉短線反彈走勢，如 #178 這樣的明顯下降趨勢的股票，更加不能期望過高，幾日內上升 6-8% 已算不錯。但好似 #384 和 #AAL 本身是上期上升趨勢，而一段時間內跟從大市大跌，出現大成交洗盤，然後再袋鼠尾上升。那麼可以懷疑之前的下跌只是受大市拖累，或者是大戶借勢震倉，如能再突破 50 天線，可以期望高一點。

下降通道

簡介：顧名思義是以波段方式做出短線的下降趨勢，適合 range trading

條件：在接近通道底部買入，升到通道一半至通道頂部時沽出

 

#816 和 #JKS 都出現下降通道，要兩個低點和兩個高點才可劃出通道，所以只能等第三次下試通道底部才可以交易，以上兩個例子如果在第三次下試通道底時買貨，幾日內有非常不錯的回報。

不過如 Elder所講，通道線就像一個用鐵線網做的圍欄，而不是玻璃做的圍欄，後者一撞穿就會破掉，前者則有彈性。有時股價是會穿越通道線的，所以只能在大約位置買貨，而止蝕位可能要放寬少少。另外當股價上升時，未必一定會升到通道頂，如何設立目標價則要花一點心思了。

底背馳

簡介：走勢出現兩個短線低點，第二個低點股價低於第一個低點，即創了新低。但擺動指標如 RSI、MACD 等卻相反地出現第二個低點高於第一個低點，形成背馳

條件：指標的走勢要和股價兩個低點程完全相反的走勢，即股價一底低於底時，指標要一底高於一底。若果指標只是兩個底部成水平線，則背馳情況不算強烈

Elder 慣用 MACD 作指標，而筆者卻喜歡 RSI，以往筆者睇中期走勢只看 RSI(14)，現時要捕捉短線走勢會改看 RSI(9)，至於如何設目標價，筆者還在研究中

----------------------------------------------------------------------

這些只能用來捕捉短線走勢，不能用來看大趨勢，甚至 Elder 不建議在下降通道底部入貨，而是主將在下降通道頂部沽空，在上升通道底部才入貨的。筆者未有足夠的數據可以睇到成功率有幾高，但若果要大量成交配合才買，成功率可能會高一點。這些買入法在上落市就較適合。因為當時追突破的買入法失敗率好高。

民主系統

Long Weekend 偷懶無出文，又無做研究。不過 NBA 已進入總決賽階段，不是每天都有賽事，接近下半年港股可能有更明顯趨勢出現，所以筆者六月都要開始勤力一點去炒股 ^_^

明天就是六四，每年都有不少團體舉辦悼念活動，不過筆者只會以自己方式去悼念以及反思。現時無論正反兩面，有唔少團體都給予筆者「抽水」、「搵食」的印象，近年不少所謂六四 「真相」暴光，有些好明顯為撐而撐的勉強言論，筆者堅持保持自己的思維，以中立角度去看待事件。

六四發生時筆者還是小朋友，但當時卻有好清晰的思維，就是我自己從來就不會當那幾位學生領袖是英雄，為何那麼多學生死，他們完好無缺？有事走先？所謂流亡外國，但卻食到肚滿腸肥，這些年他們對中國民主進程有何貢獻呢？

我只悼念那些為理想而死的學生們，他們所做的事，寫下中國歷史的重要一頁，永遠不會被人遺忘。當然那些學生領袖所講的真不能盡信，有些甚至已承認自己有講過大話。不知實況有沒有去到 「屠殺」咁嚴重，但中共有向學生武力震壓該是事實，如果沒有，又何需消息封鎖那麼多年？六四成為中共的最大禁忌，但中共一日不主動平反六四，這個傷痕就永遠留着，對國家和人民都無好處。

其實當年政府班子已經全部換掉，如果作為一個負責任的新一代政府，應該勇於承認前任政府的錯，而不是一味逃避，這只會令人懷疑：現任政府是同意上一代政府的做法嗎？認為無錯？正如日本政府不肯為以前罪行認錯，還要不斷參拜靖國神社一樣，受世人指罵。

除了悼念六四之外，我們更應該反思何謂民主，我作為炒股人，粗俗點作一個比喻，民主就如一套炒股系統，經過反覆測試後選出一套適合自己 (適合國家) 的系統後，就要跟從系統而行，必須時刻尊重系統，系統高於個人情感和意願。

民主只代表人民有權去按規則選出國家元首，但無法保證這位當選人必定可以完美地執行職務，這和一套炒股系統一樣，永遠不會有 100% 的命中率，但這樣不是大問題，因為有獨立的法律體系，可以一定程度地限制了元首「亂來」， 而系統也規定元首有一個任期，做得不好下一屆人民可以用選票去令他無法連任。

這和炒股系統有止蝕機制一樣，無法保證一定不會有虧損，但卻可以大大限制了虧損程度。但如果有系統卻經常不執行呢？炒股高手都教你，這樣必定會導致滅亡。現時眼見不少國家的人民，自己走去破壞國家的 「民主系統」，如泰國、埃及.....

民主不代表民權力量是無限大，大家都是系統的一部分。破壞系統，由外部勢力去推返系統 (比如軍方接手掌管國家政權)，必定招致惡果。