投資如過馬路 (1)

筆者近年發現，馬路上的行人和駕駛者，他們的行為 (他們當然也包括了我自己) 和股場上投資者極其相似，我是否應該話人性本是如此？

等綠燈過馬路

過車多的馬路，通常大家都要守規則等綠燈才過，但對於一些不是經常有車的轉彎位，卻有不少人喜歡紅燈就衝過去。筆者也經常紅燈衝過馬路，但前題是必須確定 "沒有車"，要確保自己過時不會比車撞到。

所以當過有轉彎位的路口時，不單要看直路有沒車來，還要看轉彎位有沒有車過，如果轉彎位視線看不清楚，就唯有觀察行車用的紅綠燈，比如說大直路行車是綠燈時，即是轉彎位的車是紅燈，如果看通大直路好遠都沒有車過來，代表自己過馬路時較安全，因為有車急轉彎而撞倒我的可能性較低，除非它是衝紅燈。但有些十字路口有多條行車線，紅綠燈系統太複習，自己看不明白時，我就唯有乖乖的等綠燈時才過，否則多條命都唔夠死。

簡而言之，行人要偷雞紅燈衝過馬路，必定要偷雞得有辦法，做足一定功夫以保自己安全。但現時好多人過馬路，都是亂來 (以澳門情況為例)，筆者每日開車返工放工，真是見盡人生百態。有些人紅燈過馬路完全唔睇車，直行直過，甚至離譜到是漫步而行。有些人只留意直路無車，原來轉彎的車是綠燈，結果過到一半時有車急轉彎殺過來，險象環生。更有些人超攪笑，明明馬路的車是從他的右手邊來，但他一邊過馬路一邊 keep 住睇左手邊，以為無車就好安心過，怎料我的車從他右手邊殺過來，他才如夢初醒，嚇了一大跳的表情令我不禁好笑 (玩咩 jack，條路明明只是單行線，連行車的方向是左是右都分唔清就過路...  ^^''')。

投資王道以及投機

其實股場參與者和過馬路的行人好相似，有些保守的行人必定要等到綠燈出現，才安心過馬路，做多一層保險一邊過一邊看馬路有沒有車突然衝燈殺過來，就更加安全，這類人投資大多數成功，就算不賺大錢，起碼不會輸身家。相似於大家認為是投資王道的價值投資者，等心目中的價值出現時才出手，而且還需求多一個 "護城河" 保護，以確保勝算更高。

但投機者也未嘗不能成功，只要 "偷雞有法"，不用等到綠燈，就算是紅燈過馬路一樣可以安全，最緊要睇清楚投資環境，以及了解自己過馬路是高風險，一看見無車就急急腳衝過去，而不是漫步絲絲然咁過。就像短線投機者用有效系統快速追脹殺跌，一樣可以成功獲利。

玫瑰再次凋謝

今日港股再跌，已經連續多日陰燭，樂觀點看只是橫向整固，始終仍然在 10 天線之上，不能說走勢轉壞，是大升前的存力？還是無力再上？暫時真不敢評論。但妨間財演和大行早已 25000、26000、28000 推高恒指目標價。

今天下午沒有睇市，設好 #566 跌穿 1.20 就自動沽出，佢今日就跌到 1.19 剛好中槍的位置，然後升返上前收市價，真係過癮 ^^'''。目前有幾隻股票都是試水的下了第一注，證明買對了再加注。早前博大霧的 #1680 今日原來尾市有異動，股價短時間曾經抽高，最終留下長上影線收市，暫時未知咩事。

大市悶局無乜好講，原來 NBA 東岸球隊也是悶局。今年筆者本以為東岸是風起雲湧，先有溜馬去年已經掘起，今年有史高拿 (以前打過火箭) 加盟更加如虎添翼。公牛則有羅斯復出，籃網更加組成超豪華的正選全明星陣容，而其後備陣容也是非常牛迫，大有威嚇熱火冠軍地位之勢。

開季前筆者甚至認為，一直是西岸強東岸弱的局面有可能改變。怎料籃網變了 "爛籃"，超豪華陣容的戰績是幾乎東岸墊底，比上一年湖人的 4 條煙更差，這令筆者大跌眼鏡。而同區的競爭對手 New York Knicks 也好不到那裡，組成 New York "雙熊"  >_<

筆者一直不看好羅斯 (Derek Rose)，我認為他打法有問題，雖然突破能力好強，但他身體條件不夠好，論身體他強不過雷霆的 Westbrook，論中投或遠射 Westbrook 更加準。當 Rose 復出時話自己比以前跳高了 12cm，爆發力和入樽更勁！我聽到時差點暈低，相信好多公牛球迷 (我不再是公牛球迷) 只想 Rose 健健康康出場打波，大佬傷完一獲金，休息咗年幾，你復出話仲要比以前更加打爆發力？無病丫嘛，找屎嗎？

結果.....打了十場波，膝頭半月板撕裂又要做手術，今個季賽都應該報銷了，公牛雖然未致於玩完，但應該直接由冠軍爭奪者的行列中退出了。今年 Westbrook 復出，我都睇到他盡量減少強力突破入籃底，增加了中距離 jump shoot。改變打法是必須要的，不是每個人都像占士般有野獸身驅的呀。

要成為超級巨星，怎樣保養好自己身體是非常重要的，能夠落場打波才能有所發揮，否則比你有佐敦的球技，打幾場又傷停一年有鬼用咩。球員和股市炒家其實好似，球員要保住自己能夠落場，而股市炒家則要保住本金，不要讓自己一舖輸清，有本金才能留在股場內繼續拼搏。

存力 還是 無力？

恒指自週一裂口 + 大成交突破後，雖然斷斷續續都有升市，都已經連續四天開陰燭，看似無力再上？但週線圖仍然靚仔，本週突破的單週成交量，是一年以來升市中最高的，這樣真金白銀推出來的突破，做假的機會可能較微。

但無可否認美國股市，表現遠勝中港股市，目前港股連本年 2 月高位仍未突破，莫說 07 年高位，所以財演說牛三來了，我當 "狼來了" 的故事來聽 ^^。但目前個股是較容易搵食的時候，只要大市不是假突破然後大跌，就算指數上升動力減慢，炒個股仍然搵到啖食。

週五 (昨日) 下午去牙醫度洗牙，好記性的讀者應該記得，筆者最怕是洗牙的，不明白為何人家說洗牙不痛，鑽咀一下一下鑽落去牙罅度，真係人都癲。整牙時頭頂有個螢幕，睇牙前可以選定睇電影還是睇演唱會，原意是等你瞓係度整牙時，可以睇些甚麼娛樂一下，分散注意力。

但我整牙無可能仲有心情欣賞電影 lor  >_<|||，今次特登選歌神張學友演唱會，睇唔到都希望聽到 D 唱聲可以舒緩一下 (因為我會緊張到合埋眼 >_<)。但最終幫助不大，我仍然係痛到癲、緊張到傻。洗完牙好似經歷了一場生與死搏鬥咁，成身流晒汗，洗完牙個胃超痛.......我再次 confirm，我情願上擂台打幾場拳，做人肉沙包比人打十幾廿拳，我都唔想睇牙醫。

不過洗牙前用手機 check 股價，見 #703 升得咁靚仔，於是用手機落盤買了一點 #1680 搏大霧。漁人碼頭新酒店已經平了頂，唔知仲有無炒作空間呢？ ^^

恐懼摧毀績效

技術形態其實來來去去得幾個是實用的，投資績效有問題，有時是投資心態影響，多過技術分析未到家，所以筆者近日找一些投資心理的書來看。近日看到一書本，作者話恐懼是導致投資績效不佳的其中一個重要原因。

筆者回顧過去記錄，發現作者講得好啱。筆者一直採用止蝕機制，除了遇到好似之前美股 LITB 業績後的大裂口大跌外 (開市 gap down 40%)，都好少單一筆交易出現重大損失。但投資績效未如理想，更多是出於買中好股卻輕易被震走。回顧過去記錄，沽出的股票有好多之後都回升，當然其中有不少後來證實是勁牛股 (例如近月沽出 1661 後股價大升)。

過早沽出有三大原因：
1. 止蝕、止賺訂得大緊，比小波動震走
2. 受大市影響，怕大市之後大插，所以預先連未到止賺/止蝕的股票都提早沽出
3. 以整體回報來看，有時遇到回報在短短兩日間大跌，於是心生恐懼而大手減持股票

除了過早沽出外，另一個受恐懼影響的是入市意欲，在剛經歷了一次回報大跌的低潮期後，就算大市出現曙光，個股出現非常有效的技術突破，但自己都會以 "睇定 d" 為理由，暫避不入市 (如之前筆者試過 LITB 重挫後，都有一段時間不敢掂美股)。

平日以平常心訂下的投資策略、定下的信念，有時在恐懼時會立即煙消雲散，This time is different 會立即搬出來。要訓練至回報跌時都保持平常心，通常講就容易，做就真難 >_<

大成交突破

上星期四才出 title 失守支持位，話等升穿 range 才看好，點知破 range 只需兩天時間，今日千億成交突破。今早 check 了兩三個板塊找了一些心水股，但下午太忙沒時間睇市，今日完全沒有入貨，希望明天有機會補返一些。

太冷門細價股不敢買，或者如網友所言應該買返兩三隻大價股旁身，近排最貼市是 A 股相關的板塊，內險、內券、內房、內銀等等，而炒好消息的莫過於放寬一孩政策的相關股，不過筆者持有的輝記奶粉今日跑輸同行九條街，之前都有睇過孩子用品股，但已經好少選擇，因為老千的已經停晒牌，但原來自己睇漏了紙巾尿片這一個行，#1044 和 #3331 原來也是受惠股。炒消息及政策可能需要一點想像力，這條消息可以引伸至好長，例如零食 (食品股) 是否也受惠呢？教育、醫藥....bababa......  (玩具如彩星一早已爆上，仍有炒作空間嗎？)

今次筆者特別提醒自己，不要又心思思想追落後，應該首先選擇明顯有資金流入、已經炒起的板塊，不要買板塊內特別弱的股票。先以週線圖看技術型態，再以日線圖找買點，盡量選 50 天線向上的股票。例如之前如果選了岩頁氣中的 宏華或安東，和選海隆也有好大分別，技術上是海隆明顯較強，強的股票通常都會越強，太過落後的好難追上來。

失守支持

留言區留言唔經唔覺又快破 200，想偷下懶都唔得 ^^'''。最近美股升得好靚仔，相反港股唔掂檔，最近兩次反彈一次弱過一次 (參考藍色箭咀)，尋日以大量成交 (綠色箭咀) 跌破 10 月低位，以及一早已失守 50 天線，加上尋日是裂口下跌，利淡力度更強。

大市弱但部分個股都 keep 住強勢，如果大市只是假跌穿又好快重上頸線當然無問題，但如果大市進一步大插，則多強的股票最終都會跟跌，設定止賺位可保住先前利潤。

市場訊息混亂，一時講明話退市，一時又話有排都未退，好消息出台大市跌，壞消息時大市可能又升。暫時睇唔通，唯有當睇戲咁睇。現時 range 的波幅不大，向上突破 10 月高位開始看好都未遲。

國內股市是長期痛苦期，跌得多又會彈一些，反彈得不錯給人可能牛三的希望時，佢又跌返落去。估值已低了幾年，仍然未見到一個強勢的中長線升勢。不過高手們早已學會，炒股不炒市，每年當炒主題都不同，只要捕捉到現時資金愛咩板塊，跟炒一轉話知佢牛市熊市。

(BUT 我是低手，經常捉唔到市場想炒些甚麼，嗚 >_<)

十級重案

TBB 高清台星期日晚十一點播出的 <十級重案>，真心超好睇！好耐未追過劇，但自從睇第一集開始已經着迷，筆者本身對推理探案有強烈興趣，但睇過之前 J2 幾套探案日劇，睇了兩三集都不想再追落去。但這套 <十級重案> 真係拍到非常好，拍出電影水準。

故事在第一集開始，已經由單一件案件，把三個完全不認識的主角拉在一起，之後再加上一個傻傻地的後生仔，組成專門查奇案的小隊，在破了幾單大 case 後，其實整個故事又回到原點，是多年前發生的仍然未破的 F 案件 (即膠紙殺人案)。今晚又講返幾個主角的從前的一套經歷，原來每個人都和這件 F 案件有一點交集，當然第一男主角仍然是整個謎團的重心人物。

今晚睇時我個心仲諗，套嘢拍得咁好，會唔會好似外國劇咁拍成個系列呢？點知真係，今晚是第一季大結局，吊住我條癮真係攞命 >_<

女主角南藝莉，第一集成個男人婆咁，之後越變越靚，我越睇越鐘意 ^.^。原來真人叫 趙安，真係人靚但個名超普通 ^^''''。我以為會接住做落去，點知下星期做韓版仁醫，救命！還我南藝莉呀.......

科網洗倉

 

BB 在此和各位叔叔、伯伯、哥哥、姐姐 say hello 先 ^_^

講返股市，恒指上月低位仍然是關鍵，失守就大檸樂，國指走勢比恒指更加 ugly。之前美股連創新高，但港股比阿爺拖住不升。昨晚美股開始跌，S&P 500 成交放量以一支陰燭失守短線支持位。上月仲講緊美國有排都未退市，但今朝為跌市解話，又話驚美國提早退市。咁即係點？？總之信佢一成就雙目失明 -_-'''

科網股大部分都轉弱，最強的金山阿伯 #3888 和 QQ 騰訊 #700 都失守 50 天線，科網股可能真是小碰為妙，插到咁上下小注博反彈就另計。大市嘛嘛地，但仍然有不少個股出現突破，有些就 keep 住一直良好的升勢，暫時除科網股外，好似未見到有資金要錢唔要貨大舉撤離的跡象。

歐洲減息想谷起經濟，英國全面支持樓市，香港醒目的舖王、炒樓專家也已一早把部分資金轉戰英國，近月在澳門也有幾場投資英國樓市的演講會，不過筆者沒空出席。近日仍然聽到不少朋友話澳門樓價繼續升，應該不會跌了，無樓的想上車，有樓的想買多層。其實作為散戶有無可能預早知道樓市跌定升，以及跌的原因？連茶餐室阿姨都話睇唔到有任何樓市會跌的原因，但他們的意見有幾多參考價值？

樓價未來一年升定跌就無人知，但如果要列出跌市原因，我隨便一諗都可以列出十個八個，風險正在不斷升溫，見頂訊號出得七七八八，話睇唔到樓價會跌的人，只不過是以耳代目 (或以耳代腦)，人云亦云而已。澳門賭業無錯是好旺，但始終單一靠賭支撐經濟的風險不低，另外賭業幾乎全靠外來資金，外來資金中大部分又來自中國，可以話澳門人無得話事。外界有甚麼風吹草動只有硬食。做好風險管理始終是必須的。

今日屍捷 (330) 再突破而上，歐洲概念股是否當炒？筆者未有時間全部 check 一次歐洲概念股，有做功課的網友可以借功課來抄嗎？ ^_^

炒股不炒市

近排這句 "炒股不炒市" 又可以搬出來用，事關港股大市表現一般，但好多板塊相繼被炒起，表現強於大市。近日筆者少觀察港股市場，美股甚至完全沒有看，我只知新能源類如風電、太陽能，水務股、環保股、頁岩氣等都升得不錯，航運股聽講也不錯，其他板塊就要抄留言區師兄們功課了。

濠賭、科網好似有轉弱跡象，早前自己撈了一注金山阿伯 #3888，今早曾跌 4% 好彩下午絕地反擊微升收場，但最近已有不少高手先後指出，科網股估值過高，遲早爆破玩完。而上年的股王級別的手機配件，今年卻最早轉弱，已經淪為熊走勢板塊。

筆者今次為老婆請了陪月，我自己都輕鬆 D，多了時間看 NBA 賽事以及打機，今次 BB 女好似乖過佢哥哥，不會成日喊，瞓覺時間多，筆者耳根清淨 D  ^^。可能第二胎有經驗，今次無咁緊張，回想返之前第一胎，簡直人都癲，第一次老婆是開刀 (今次是順產)，開刀後要好長時間復元，要瞓床不能亂動。所以BB 出世後，基本上夜晚都是我湊，我和老婆分房瞓，以免 BB 喊噪住老婆。夜晚獨自一人做湊仔公 T_T。

好彩外母有時過來瞓幫手頂一頂，但當時都湊到自己經常病，發燒要帶口罩湊 BB，又驚傳染佢。而且那時新婚後不久就有 BB，BB 出生後其實都算新婚夫婦，不免為了 BB 兩公婆有些爭拗。真是由細到大，讀書、考試、出黎做嘢，都未試過咁辛苦。

不過苦中有樂，崖過了就舒服，小朋友到兩三歲基本上是不同光景，雖然那時會比較頑皮週圍走、週圍攪嘢，但點都好過 BB 時瞓係度剩係識喊，至少你會知道佢想點。所以好多朋友第一個小朋友甩身後，都怕怕不生第二個。

其實第二個會無咁辛苦，一個小朋友長大好悶的，我個人認為兩個就夠晒數，第三個咪攪喇！ ^^''''

爹地

筆者終於又做爹地，女兒已經在星期六凌晨兩點十八分出世。筆者在一點幾收到老婆 message 入產房就趕過去，在澳門男人不能進產房，所以我只能在產房外等。當時只有我一個人，四周都好靜，甚至聽到產房內的聲音，包括我老婆的慘叫聲 -_-'''。

坐了一會兒聽到 BB 喊聲，之後護士推 BB 出來，但不是我的女兒。繼續等，之後終於又聽到 BB 喊聲，立即看鐘是兩點十九分，我心諗這個是我的女兒喇掛。之後聽到有水聲，應該是幫 BB 洗身，大約十五至二十分鐘後護士推 BB 出來，果然是我的，叫我認清楚 BB 性別，之後就推入 BB 房。當晚都無法見到老婆，不過佢由產房打電話出來，叫我幫佢買碗粥 (生完好鬼肚餓 ^^)，買完後都要由護士攞入去。

兩母女明天就可以出院，筆者漫長的 "湊女" 之路又正式開始，之後幾個星期都必定無心戀戰股場。希望各位戰友賺多 D ^_^