2014年5月27日星期二

離補太離譜



今日係澳門立法會最黑暗的一天,今天下午方案在澳門立法院審議,有議員動議「撤回」方案,給議員們高票數否決,以下是投票的結果:


一直反對的高天賜,唔好以為佢係臨時變節,其實佢係中途離場抗議,我知道有唔少澳門人插佢,話佢點解唔投埋果票,但佢離場抗議唔係想收工,係動員大家包圍立法會抗議,睇到佢發言時係搵咗好多資料,做足功課,真係為民發聲的。投棄權票的其實澳門人已經把你們當成投咗反對票,同投反對票那班議員一樣臭晒,走唔甩的。

今日下午大批市民到立法院門外集會,一直到夜晚才散去,以下是借 「愛瞞日報」的照片來分享:






最終一如大家所料,立法會先否決「撤回」方案,然後用拖字訣,等日後修訂一些細節後,估計會再靜雞雞擺上架再審議,又想靜雞雞地通過。當然今次澳門人一定會昅到實。

有人開始討論 吹特首 連任問題,話無理由任期就滿要攪連任之際,推出此惡法倒自己米?但我個人開始懷疑 吹特首 連任的意願,如果此法通過,只要做夠五年一個任期,就可以食長糧,每月享有本來薪金的 70%。唔洗做有 70%,要做都係得 100%。

另外下一屆都要開始着手處理普選問題,雖然澳門無明確的普選時間表,但香港攪得澳門都一定要攪。係人都知這對政府來講係一個大難題,下一屆特首未必好似以往咁好做。現時急推此等自肥方案,比我感覺反而是無心戀戰,任期內盡地一煲搵盡佢 (搵銀個搵 >_<)。

而澳門市民當然痛恨這班贊成法案的商家議員啦,其中某議員今日仲講咗一推廢話,我見到網上開始有人發起罷食佢餐飲集團旗下的餐廳,唔知佢隻股票有無影響呢?

2014年5月26日星期一

防守失誤

NBA 東、西岸決戰打到 GAME 3,熱火、馬刺均領先對手 2-1。的確熱火和馬刺的戰術層面是勝對手幾籌。


先講雷霆,進攻太單調,一係 KD#35 單打,一係 Westbrook#0 單打,完全無團體戰術可言。今早 GAME 3 雷霆的確打得比之前好咗,但係我個人認為球証 「主場雞」吹得好勁,第三節一輪亂吹,雷霆得到 22 個罰球,馬刺 0 個罰球,直接把馬刺吹死了 -_-'''

而溜馬,我可以幫佢改名叫 「流馬」,先不論進攻上各種飄忽,每一場都大起大落,有時打到神一樣,有時打到連中學聯賽都不如。就論防守,東岸冠軍應該以防守見稱,但係流馬防守老實講真係好流!這未必是實力問題,如果無實力上一年就不會和熱火戰到七場。這是心態問題,成隊波無乜 heart,無爭勝心,防守自然唔落力。




上圖一次熱火的攻勢,已經把流馬的防守漏洞顯露無遺。

圖一:熱火只是搶了個防守籃板球,有一位流馬球員在前場跌低了。其實占士只是一路運球過半場,這一球絕對不算甚麼快攻,否則 James#6 向右快傳,經手再轉比 Wade#3 已經在籃底空晒,點解流馬球員回防咁慢?

跟住防守漏洞來了,流馬的 G.Hill#3 見到熱火的 Ray Allen#34 向底線跑,佢竟然向後指!What the FUXX!你指乜鬼呢?後面無隊友喇 wor!你身邊只有中鋒 Hibbert#55,前面跑緊熱火的中鋒 Bosh#1,Hibbert#55 好應該收落去罰球線附近,等 Bosh 過來才 mark 佢。那麼身為 Point Guard 的 G.Hill #3 你係應該落去封 Ray Allen  射三分

P.S. 佢向後指,可能忘記了自己打緊 NBA,佢可能當自己打緊聯防 (Zone Defense),因為打聯防後衛只會防守固定的前線位置,後方是交比隊友去防 (基本上打 2-3,前 2 後 3 的防守方式) ^^

圖二:好清楚見到 G.Hill #3 的失誤,佢竟然指望中鋒跑出去封 Ray Allen 三分球!而 Ribbert#55 也有責任的,佢經過 G.Hill#3 身邊時,就應該推佢落去底線 mark Ray Allen,這才是隊友間的防守默契。

這種防守上失誤真係好低級,熱火這個攻勢甚至不需做拆擋,射手 Ray Allen 直接跑落底線已經大空位可以射三分。咁樣打落去,流馬不如自己認輸算數啦!有無心打波架! >_<!!

------------------------------------------------------------------------

一如所料流馬繼續沉淪:






流馬繼續夢遊,圖一睇到計埋在三分線的 Chalmers#15 都只是三打三而已,左手邊白色箭咀是 P.George#24,右手邊白色箭咀是 Stephenson#1,這兩條友仔真係連打街波都不如,P.Georger#24 就咁企係中間,又無主動出去向前封 Wade#3 射波,又唔係收入去防 James#6 上籃,咁你企到度做緊乜?

其實係應該 P.George#24 立即衝上前封 Wade#3 射波,而在身邊的 Stephenson#1 跟住 James#6 收落去籃底的,其實只要兩個人其中一個有做嘢,已經可以阻到這個攻勢。P.George#24 上前就算封唔到 Wade#3 射波,或者可以阻到佢唔可以輕易傳波。

這一類絕對不算是熱火甚麼精彩的攻擊,當然熱火有好多精彩的拆擋進攻,但我只想講如果連這些低級的防守失誤都可以犯,熱火也根本不用花心思諗甚麼進攻啦,直接當你街場小朋友咁打爆你就得!

今日我睇到好多次 James#6 由後場攞到籃板,直接 Coast to Coast 帶波到流馬的籃框然後入樽,這不算快攻囉,快攻是快速傳球向前面才算,這只是普通運球。而是流馬退防腳步慢過公公婆婆,James#6 睇到有條私家路仲唔上前爆死你咩。

尤其是隊中明星 P.Geroge#24,你真係夢遊完未?

2014年5月23日星期五

灰心

近排落雨落到個人心情都灰灰哋,加上亞洲地區好多天災人禍,越南排華、泰國政變、新彊又恐怖襲擊、台灣有癲仔斬人........真係灰上加灰,在此對任何國家、任何民族的死者講聲 RIP,傷者但願快點康復。

澳門又鬧大單攪笑趣聞,可能好多香港人近年話澳門管治得好,但身為澳門人的在下,就一直未讚過政府一句,相反我不斷強調澳門黑幕遠比香港多。我真心覺得香港政府係為香港好,但能力有限又要聽命中央真係無辦法,加上好多腦殘反對黨阻礙施政也是一大問題。

我個人好贊成有反對黨存在,但我要強調香港某些反對黨是「腦殘」,為反而反毫無建樹。相反澳門就唔同,根本上反對黨勢力好薄弱,政府當然施政無難度,建設和社會發展得可以好快,但缺點是政府玩晒,想點就點。

現在以特首為首的高官,推出一個法例,話高官任期滿後可以食長糧,以及特首任期內可免刑事責任等等,而議會幾乎一致通過,只得小貓三四隻投反對票。借用少林足球謝賢的台詞:球証、旁証、主辦、協辦所有單位,全部都是我的人,你點同我鬥?

有朋友話奇怪,一心諗住自己當初投票的議員,今次會企出黎反對,點知佢哋都投贊成票。我就呵呵了,這是我堅決不投票的原因,成個 GAME 是不公平的,不是選甚麼人的問題,而是整個 GAME 都不值得參與。

特區政府竟然無恥到,可以攞返以前葡國政府那一套 「食長糧」出來用, 咁真係你哋玩晒囉!食糧食到死個日,我哋立稅人要養你一世。另外筆者隱隱覺得中央打貪,可能遲早打到落黎,如果唔係無理由高官們要急推這個免死金牌條例,為咗自保?隱隱覺得澳門之後會有大獲嘢,既然我無力阻止這條硬膠條例推出,我唯有又買定花生等睇戲 ^^

補圖:


本來想樹埋隻中指,不過算啦,哈哈 ^^

2014年5月20日星期二

趣聞

尋日篇文相信有好多人有同感,也有更多人唔認同。今日只講一些攪笑趣聞輕鬆一下:

一、香港財政懸崖
議員玩拉布,我自己就好衰格,買定花生當睇戲,睇下今次玩成點。香港政府想學美國咁財政懸崖?講笑姐,香港政府無負債當然唔會有違約,只不過最終玩到政府官員、議員都無糧出,我諗有唔少市民都心涼 tim。但最慘係會唔會有 D 政府部門要臨時關閉,或者某些緊急服務要暫停,影響到有需要的人就唔知。如果有,請向尊貴的議員投訴

二、世紀大買賣
俄羅斯特務之王普京到訪中國,好似要簽一張世紀大同約,向中國提供 30 年天然氣。中國現時有經濟能力,俄羅斯有天然資源,互相合作都係好事,總好過比美國佬玩晒

三、竊聽風雲 4
美國政府告中國官員網侵美國公司,我最初仲以為我聽錯!美國佬網侵全世界,竊聽全世界的電話等等侵權行為,一早已揚開晒。今日仲好意思告人哋網侵?面皮之厚我要寫個服字!強烈建議 <<竊聽風雲 4>> 可以用美國做題材,是為 竊聽系列 的終極篇,保證可以進軍荷里活 ^^

四、厚多士身世可憐?
點解往往犯咗事的人,之後都話自己身世可憐?點解今時今日失業率咁低,都有咁多人攞綜緩?攞綜緩係咪證明生活基本需要都有問題?但點解有錢染髮?無論身世係點,無論你攞綜緩又好、你係李嘉誠又好、特首又好,總之係地鐵食嘢就係唔啱。相信好多人都試過係地鐵偷食嘢,我自己都試過口乾偷飲兩啖可樂,或者肚餓攞個包出黎快速咬一啖 ^^'',但係會偷偷地做,而且人哋話你,我會即刻認錯講 sorry,唔會少返人哋轉頭囉,自己身有屎仲咁大聲,抵你做網絡紅人喇  =.=''''

-----------------------------------------------

港股和美股回勇,不過港股未有明顯趨勢,筆者近日專心睇 NBA,以及有其他事忙,好少睇股市,昨天彩票股急升,不過 #82 下午已經超出我的買入點好遠,不高追了。中國向俄羅斯買入天然氣,不知對中國的天然氣公司是好是壞?我不懂分析 >.<

2014年5月17日星期六

槍口對內

近排好少講股市,今日心情好沉重,我不嬲都唔係一個咩國家、咩民族大義的人,但今日真係忍唔住要發聲,可能好多人會唔鐘意我的文章,就算鬧我又好、以後罷睇又好,我都忍唔住要出文講返幾句。

近日越南「排華」暴動,好多華人傷亡,但筆者在網上見到唔少港澳同胞的留言,Sorry 我唔係嬲,而係覺得好悲哀。點解凡是有中國人 (其實今次好多只是華人而唔係中國公民) 有甚麼天災人禍,總會有人出來抽水,話抵 Q 佢哋死、最好全世界支那人死清晒.....等等。如果有一兩則這類留言,可以當係有少部分傻仔 9 up 吹水,但這類留言數量唔少,這已經形成咗一個社會風氣,證明社會上有相當部分的人,是真的好憎中國人,甚至把矛頭指向「華人」, 但佢哋唔知,佢哋可以唔認係中國人,但「華人」這個稱呼真係點都走唔甩。

這究竟是咩心理?有好多人咀上說是反對共產黨、反對一黨專政、反對政權貪污腐敗,這我絕對可以接受,甚至是同意、支持。但試問掌權者的腐敗,和人民有咩關係?點解因為討厭共產黨,而要想全中國人都死清才安樂?

全中國人都是共產黨員嗎?不是吧!佢地只是生活在一個由共產黨掌權的國家而已,文化水平低是因為教育做得不夠好,這些都不是原罪吧?如果中國人真有原罪,那就是好多中國人都喜歡 「槍口對內」,這是真的。

另有唔少人指責中國點解唔強硬出兵制裁越南,問題係和中國接鄰的幾個國家,近年都和中國有邊境爭議,而背後攪事的正是民主大國,這個世界「善霸」有明確的圍堵中國的策略,這已是公開的秘密,如果中國和東南國家有任何戰爭,日本也可以順利取消自衛隊,立即重新建立軍隊。

問題是中國和越南開戰,而美國最終又神聖地參戰的話,中國 VS 美國,那些咀上支持中國出兵的人,到時又會幫邊個先?那些大叫中國人抵死的人,會唔會調轉槍頭打返自己人?

一個政黨的腐敗和人民絕無關係,尤其是這個政黨根本不是人民所選出來的!人民也是受害人不是嗎?如果話政權和人民有關,那些民主大國倒是真的有關係,因為政府是人民選出來的,政府腐敗人民不是也有責任嗎?

如果因為一個腐敗的政權,而可以大條道理話人民抵死,甚至幫外國人打返自己人都叫正義,咁我想問問今日中國的政權,和晚清政權相比如何?晚清政府不是更加腐敗無能嗎?如果讓那些大叫中國人應該死光的人,生在晚清年代,八國聯軍侵華,佢地真係要幫鬼佬手一齊殺中國人呢!

身為華人竟然有人去拜靖國神社,仲要 post 相出黎好威咁,但竟然有唔少人支持,這個社會是否病了?不是!病的應該只是我自己,我夠鐘去睇醫生,係咁先      T__T

--------------------------------------------------------------

近日網上熱傳的詩:

What Do You Really Want from us?
When we were the Sick Man of Asia, we were called The Yellow Peril.
When we are billed to be the next Superpower, we are called The Threat.
When we closed our doors, you smuggled drugs to open markets.
When we embrace Free Trade, You blame us for taking away your jobs.
When we were falling apart, You marched in your troops and wanted your fair share.
When we tried to put the broken pieces back together again, Free Tibet you screamed, It Was an Invasion!
When tried Communism, you hated us for being Communist.
When we embrace Capitalism, you hate us for being Capitalist.
When we have a billion people, you said we were destroying the planet.
When we tried limiting our numbers, you said we abused human rights.
When we were poor, you thought we were dogs.
When we loan you cash, you blame us for your national debts.
When we build our industries, you call us Polluters.
When we sell you goods, you blame us for global warming.
When we buy oil, you call it exploitation and genocide.
When you go to war for oil, you call it liberation.
When we were lost in chaos and rampage, you demanded rules of law.
When we uphold law and order against violence, you call it violating human rights.
When we were silent, you said you wanted us to have free speech.
When we are silent no more, you say we are brainwashed-xenophobes.
“Why do you hate us so much﹖”we asked.
“No,” you answered, “we don't hate you.”
We don't hate you either, But, do you understand us?
“Of course we do, ”you said, “We have AFP, CNN and BBC's ······”
What do you really want from us?
Think hard first, then answer ······ Because you only get so many chances.
Enough is Enough, Enough Hypocrisy for This One World.
We want One World, One Dream, and Peace on Earth.
This Big Blue Earth is Big Enough for all of us.

2014年5月15日星期四

文化水平

近日專注睇 NBA 無心炒股,恒指連升六日氣勢如虹,有唔少股票在低位都出現支持,不過筆者無時間尋找熱門板塊,偶然見到形態上有 「袋鼠尾」出現就炒一轉短線。美股持有 NBR、HOG、TRN 三隻,暫時也未有時間尋找美股的熱門板塊,總之會全力避開業績股。



近月澳門交通出了明確規例,要求司機跟足地線 (劃在地下的方向指示) 行車,假設十字路口前紅綠燈,左線只準直行或轉左,右線只準轉右,兩線是分開不同燈的。排在右線的不能直行,否則會當衝燈論。

其實這等交通規則一直都有,只不過澳門人就是喜歡無視。如上圖那樣的「占隊」情況,在澳門眾多路口都不斷出現。我前晚經由新馬路直出十六蒲,一直 keep 住右線行車,因為最終要轉右,這個是交通黑點,就算新例出了都一樣!我在右線排了足足十七分鐘隊,但眼見左線的車不斷行,但左線是只準轉左,但行在左線的車十架有八架最終都強行轉右!

不守規舉的,行車就如流水,我這等守規舉的,就排超耐隊都未到我,最終我轉右時,左邊有幾架車一齊轉,頂住我,我連十六蒲都幾乎入唔到!

在澳門可以常見以下情況:
1. 司機不跟地線行車,例如明明只有一條線轉左,但右線的車竟然也來轉左,在轉彎時迫埋你身邊
2. 好似上圖那樣左線只準直行,右線轉右的車在排隊,中間甚至是一條實線,但有大量車仍會利用左線,駛到最前面然後強行插入去「占隊」
3. 好多高速兩線行車的馬路,如友誼馬路,上有行人天橋、地下有行人通道,竟然有大量人直接由路面橫過馬路
4. 明明是行人紅燈,行人應該企在行人路上等,但卻有唔少人一早企出馬路邊
5. 電單車在行人的班馬線 U-Turn
6. 有好多個巴士大站都設有一個位置給巴士埋去停站,但巴士卻只停在馬路中心上落客 (無人阻的情況下)
7. 等巴士的人應該企係行人路上的巴士站等吧?但好多人一早企晒落去巴士停車位,讓巴士根本埋唔到站
8. 十字路口中間通常都劃有黃色格線,講明唔可係中間停車,但當前方塞車時,好多車在綠燈的情況下衝出十字路口,以致十字路口停滿車塞住了。到另一邊綠燈時,所有車都無法通過十字路口了。大佬!黃色格線不能停車的,見到前面塞車,就算是綠燈都唔應該過,這是常識吧?但如果你唔過,後方車會響按罵你,做對的事都要比人罵?因為你唔過去,另一邊車就算塞車一樣會過,到時係人哋塞車你,咁應該你塞死人先? ^^''''




借用 facebook 上一個群組的照片,上圖就是澳門等巴士的情況,有需要一早企出去馬路嗎?企定出去會快 D 嗎?就算快得幾秒又如何?要爭先恐後衝上車嗎?

以不跟地線行車為例,竟然有唔少澳門司機話:如果跟足地線行車,會等多好耐時間!咁我想問一句,這和大陸旅客話因為厠所排長龍,而迫住當街大小二便,有咩分別呢?以上幾點我見到好多澳門人犯 (當然也包括大陸人)。

近日 「厚多士」事件熱爆網路,我有朋友嘆:強國人幾時才會有文化呢?

但我只想講:包括我自己在內,有時看見別人眼中的木屑,卻看不見自己眼中的大樑。我們自己文化水平真的好高?可能在外國人眼中,我們也同樣是一個笑話

2014年5月12日星期一

難搵食




近日港股弱到連小魚 BB 都無晒心機 >_<,恒指失守 50 天線後未見有強力反彈,指數上上落落其實變幅不算大,但上年的領導股卻紛紛現熊走勢,#27 三個波幅由高位 $80.45 跌到最低 $54.25,跌幅有 48%;#700 三個波幅由 $646 跌到最低 $465 有 28%。二三線股也紛紛出現下跌走勢,總之下跌三部曲有:

1. 先前有一大段升幅,然後由最高位回落到 50 天線
2. 由調整低點開始反彈,但這次無力再破頂,甚至明顯第二個頂遠低於第一個頂,以之前調整低點 (即反彈起點) 橫成水平線,是下降三角形
3. 最終跌穿上次調整低點,失守 50 天線,一浪頂低於一浪頂向下行

對順勢交易來講,現時真係好難搵食,因為仍保持上升趨勢的板塊及股票已經少之有少,但假設今年不是熊市大跌的話,往往一雞死一雞鳴,一批股票走下坡,會有另一批新的領導股出現,往住下半年才有明顯趨勢,現階段宜忍手,睇 NBA 季後賽好過炒股 ^_^

 -------------------------------------------------------------------

今日下午大市升返,小魚 BB:





2014年5月6日星期二

抽水

今日港股休假,昨晚美股跌不下去,筆者順勢加大美股倉位,設好止蝕位。港股昨天又跌近 300 點,恒指在失守 50 天線進一步下跌,但現時看淡又太早,有可能在 50 天線下有一次反彈,看彈上 50 天線時能否成功突破,若果突破不了再跌過,大市真係有點危,50 天線亦在向下彎。今次筆者自認太過看輕早前大成交假突破,上年 11 月份就出現過一次大成交裂口上升的突破,結果短期內反覆向下跌穿突破點,之後急轉直下大跌。今次又出現這種大成交假突破,連滬港股的好消息都未能令港股開始上升趨勢,形勢看來有點危。

目前主要是國內股市升不起,大家把目光放在不好的中國經濟數據上,另外人行又收水,中國又實行反貪,以及中港澳矛盾日深等等,都是不利因素。五一黃金周,香港相關概念股升唔起,訪港旅客人數同年下跌 1.7%,其實只是下跌很少,有分析指自由行其實對香港 GDP 只佔好少比例,就算立即停晒自由行,對香港經濟影響不大 (但我相信會有連鎖效應 ^^''')。

不過旅遊業對澳門黎講就好重要,有報道話今個五一黃金周,澳門酒店空置率有 3 成,不知是真是假,因為以往長假期澳門酒店好爆,澳門酒店房租近年急速上升,連一些兩三星級的酒店,房租都過千蚊一晚,貴到嚇死人。

http://orientaldaily.on.cc/cnt/news/20140503/00176_096.html

------------------------------------------------------------------------------------------------

近日香港藍田發生警員開槍事件,事後有議員即刻出黎抽水,質疑警方是否需要開槍。當然這類案件應該交給警方按程序去判斷,但這位議員就唔理三七二十一出黎抽咗水先。表面證據睇,有一個完全失去理智的男人,手持攻擊性武器,不怕在場的警員,也不理警員的警告,還想意圖去攻擊人,警員開槍又看似無錯。

當然有人質疑,除了兇徒本身,現場無一個人受傷,開槍是否合理?但保護市民安全不正是警察的職責嗎?在場無人受傷不是應該表揚警察,反而是以此作論點去質疑?另外也有人認為點解唔打兇徒下半身,但現場有女警和那位太太訓在地上,打下半身會唔會射到佢地?可能有人認為警察要 "槍王" 上身,個個都應該是射擊冠軍?人家是軍裝警員,唔係 James Bond 囉 ^^'''。在電光火石的情況下,是否應該保障被害人性命安全,優先於兇徒本身?

相信警方會按程序作公平判斷,但我就是睇唔慣那些只會抽水,卻毫無建設性提議的議員大人,更甚是他們總會雙重標準,如果警員當時不開槍,而有任何一個受害人被鎅刀所傷,相信那位議員又會作另一番偉論。

2014年5月2日星期五

膠劇西遊記

近排懶好耐無出文,今日出篇文吹下水。股市無乜好講,港股暫時睇唔通走勢,週二大升三百幾點夾淡倉,週三立即大跌三百幾點,下跌的成交量較高,50 天線開始彎頭向下,若果短期內未能回升有點麻煩。目前最麻煩是新一批領導股未出現,落後中資殘股升唔起,舊的領導股如科網、濠賭出現熊走勢,看龍頭 #700 和 #27 就知道,走勢的確不太妙。

反而我覺得美股已經見底,早前納指出現大成交袋鼠尾,近日試過回調但有點跌不去的感覺,當然我自己對科網仍有戒心,暫時好似能源股表現不錯,近日業績期也不敢太博,昨晚買入已出業績的 NBR。

------------------------------------------------------------------------






這星期 TBB 夜晚播出的國內劇 <<西遊記>>,被網民鬧爆,包括在下 ^^。這套劇傳聞還花費巨資拍攝,但特技假到無朋友,人物造型真心唔掂,拍攝手法好有問題,說故事技巧差勁,濫用特技完全無實景,莫講話特技假,就算拍得好真,等於睇緊動畫,好無癮 >_<

有網友立即取出 TBB 舊劇,張偉健版的西遊記出來比較,這套無疑係好攪笑,但由於太不忠於原著,和周星星的西遊記,都可以當作原創故事來看,不宜和原著比較。更有朋友指出,國內電視劇一直水平低,只不過國內人無得選擇,要迫住睇。

這一點我自己絕不同意,唔係幫中國講好說話,而係近年中國電視劇水準已大大提高,我認為好多國內劇水平已大大超越 TBB 某些膠劇。如好多年前的 <<三國演義>>、<<康熙王朝>>、<<雍正王朝>> 等,近年有 <<美人心計>>、<<傾世皇妃>> 等,以致現代劇 <<蝸居>>,水準一點也不低。

這一套西遊記拍得膠,其實和大陸水平無關,似乎是自身問題。如果要睇最接近原著的西遊記,必定要睇三十年前拍攝的,六小齡童做孫悟空的版本。這套西遊記我個人認為是神作!無得突破!六小齡童是史上做得最好的孫悟空,沒有之一!

人家三十年前拍攝,特技係當時中國黎講算是高水平 (其實用咗外國好落後的剪接技術),現時睇返當然會覺得好假,但點都假唔過 TBB 播緊套囉 -__-''''。此片除了天官和少數場景是用剪接外,幾乎全部實地取景,走遍中國大江南北,遠赴內蒙、東北、新彊外景不在話下,更加出國到泰國取景,以當時黎講算是落重本制作。

前前後後拍咗十幾年,而整套劇在中國各省電視台,傳播了超過二千次,連香港亞視和澳門電視都傳播過。真是一套神作!可能較年青的讀者都唔知係咩東東,但如果熱愛西遊記這部小說,不妨睇睇這套劇,保證唔會失望! ^_^