「又」股災？

這兩天真的忙到嘔血，完全沒空睇大市，夜晚湊女也沒時間睇美股，全部 set 低止蝕槍做嘢。今日借用網友 Eric 兄在留言區的留言做標題 ^^，莫非股災又來了？

之前港股指數死死吓，但個股各自各精彩，簡直是細價股牛三，求其買幾隻，總會中兩三隻痴漢股，單日動不動急升 >10%。筆者早前覺得今次調整市真奇怪，過往如果指數失守 50 天線，細價股洗倉潮可能已經來臨，但今次竟然是細股牛三狂潮？所以筆者一早已自言不懂得看這段市況。

炒了幾轉短線痴漢股，到有一天科網老大騰訊急升，但科網四大美女卻唔跟上，自己當時出文話有點風雨欲來的感覺，當時清走了科網股。雖然自己一直不敢高追濠賭股，但見 #242 和 #163 成交急增明顯有資金追入，以及見 #1680 配股後反升，於是又手多追入。

到濠賭老大 #27 高位做出巨量下跌裂口，才知濠賭又玩完，不過 #242 其實不算濠賭，#163 跌幅不大，已近止蝕位就沒有提早沽貨，結果昨天也自動槍打出了。連同之前 #1680，一口氣又三隻止蝕股。

#27 大跌雖然代表濠賭可能告一段落，但未見其他股票有散水跡象，又手多多選中三隻 #656、#3777、#921，除了走勢靚仔外，#656 也爸爸概念，#921 盈喜 50 天線反彈，#3777 同行 #877 發盈喜裂口急升。最終三選二沒有買 #921，結果昨天 #3777 大跌，#921 急升，吹脹 >.<

昨天港股倉大部分中止蝕 \ 止賺位沽出，之前買中痴漢股的回報近乎打回原形，持股仍然有：#656、#2688 兩隻。自己個買賣系統和指數掛鉤，以恒指近日表現，自己持倉一直 keep 住極低水平，但仍然忍不住細注細注的試水，買賣次數仍然過多，導致月尾止蝕次數增加。是自己問題  >_<

美股倉昨天自動槍打了 JKS 止賺、打了 WYY 止蝕，其餘仍然 keep 住。

恒指自 12 月以來是一浪低於一浪，雖然仍未有效跌穿 11 月低位，但調整風險仍然高。不過跌市不等於世界末日，反而是觀察有那些是強勢股的機會。每一年都會出現新股王，上一年升得太火熱的濠賭，我唔係好 sure 今年是否仍然能成為股王，至於新股王有可能在跌市結束後才出現，事前無謂亂估，唯有「牛咁眼」昅實各大板塊。如 #1165 都是 2013 年 7 月才起步。

-----------------------------------------------------------------------------------------

昨晚沒空認真 check 股價和回報，不過初步已知好多股票大跌，雖然一早已預了最壞情況發生會怎樣，但難免有點唔開心，不過見到小魚 BB 望住爸爸時果種微笑，爸爸又開心返晒 ^O^