2014-2-26

早排凍時，姑姐 (即我個妹) 幫小魚 BB 帶耳套，佢好似唔 enjoy wor ^^''''

恒指仍受制 50 天線，可能是短暫整固，但始終 50 天線向下，後市可能要調整或橫行一段時間才有明顯向上趨勢，總之就是悶悶地 >_<。筆者暫時也找不到心水個股來炒，之前買了 3888、921 等也在坐貨中。

美股表現不錯，追入大成交突破股票的方法，用在美股上勝算較高，因為始終仍是大牛市。業績期雖然有驚嚇，但也有不少驚喜。在業績期前買股，事前無得估市場對業績的反應如何，所以預了股價會波動。如果不想組合回報大幅波動，反而可留意業績後有好表現的股票。

如 FB，業績後以大成交裂口突破 Cup with Handle，筆者當時也不敢高追，但現時股價又已再升超過 10%。ACT、UA 等業績後也是大成交上升裂口，現價又比當時高出不少。

筆者績後才買入的股票有：AAL、MTW、FLT、VAL 等
仍待公佈業績的有：WDAY、VRX

PANW 公佈業績後裂口上升，今天仍 keep 住 10 天線運行。TOL 昨晚公佈業績股價沒有甚麼反應，今日暫升近 2%，但連續四日成交放量，可能是存力突破？睇位想再加注。不過要睇埋明天 WDAY 和 VRX 業績表現如何。

今晚買入另一隻已出業績的股票 SCTY，之前震走了太陽能 CSIQ，本想在今日買回 (因為成交明顯放量上升)，但兩者選一我選已破頂的 SCTY。今年錯過了 TSLA 這架電動車，跟草根兄玩另一隻 Elon Musk 的 SCTY  ^^

----------------------------------------------------------------------------

財爺公佈財政預算案時，仁哥竟然公然係立法會用平板電腦睇靚模性感照，所以唔係我針對佢地班議員，但佢地每月收納稅人成十皮嘢，開會睇下咸濕相，有時拉下布，有時一句話離場抗議就咁走咗去，提早收工去 happy。大佬，如果鬧下、反下就叫做議員，我都識做。

之前插煲呔受富豪款待坐免費遊艇，又針住 CY 話佢僭建講大話，OK！ 佢地做錯事插佢地係啱，咁你自己又點？受國泰款待去免費旅行又得，賣假畫又得，開會睇女又得，都係輕輕道句歉就算。寬己律人真係雙重標準，比你做咗特首.........    >_<


P.S. 有網民已經找到仁哥睇的是何人，全部都是美女，仁哥識貨！

大成功！

筆者昨天終於考車，全日當然唔得閒睇市啦，好彩最終考車大成功！從此可以開無限制 cc 的大型電單車，YEAH！！上圖是筆者考車成功後留影，當然筆者用小畫家後加工，加上黑超以及白色面罩，以免自己個醜樣失禮街坊啦 ^^''''

第一幅是筆者學車及考車用的戰車，650cc，MG 車牌.....好舊呢 >_<。第二幅圖是澳門的考車場，主要是先在這斜路上打八字，即以一個 8 字型在斜路行車：

1. 250cc 以下不能掂到條白線，650cc 不能掂到黃色線
2. 中間有一個格仔，起步第一下要在中間格仔停車，然後在斜波起步。打完 3 圈 8 字 last 也要在格仔內停車，再起步然後就落返黎
3. 行車途中絕對不能落腳，在格仔停車時只準落左腳

完成第一 part 斜路八字後，考生就集合起來出街，考路面。由考官開一架電單車帶頭，考生一個跟一個咁行，後面有一個考官跟尾，如果多人考就中間還有一個考官在旁邊。主要考你出街時停班馬線讓人、讓先或 STOP 線前停車讓車，或轉 roundabout 時怎樣讓車、切線、轉彎等等。當然後方的考官會捉你有無打燈，另外全程都不可以落右腳，因為右腳是踩住 brake，永遠不能放開右腳，停車只可以落左腳，否則肥佬。

 

筆者睇中 Kawasaki 的 VN900 Custom 炭黑版！真係型到爆呀！以 900cc 電單車黎講，車價十萬左右真心不貴，但咁大架車，貴在要買多個車位黎泊佢！另加車位二百萬  T__T

所以都係發住夢先 ^^'''，希望三十五前可以買到，四十幾就可以升呢買 Harley 喇，入門版都好似要廿幾萬呢 >_<。或者各位師兄推介些好股給筆者，買中一兩隻絕世股王的話，夢想可以快些實現 ^_^

股市無乜嘢講，因為未有時間睇。美股太多強股，美女太多買唔切，港股暫時無乜 target，仍然留意住科網美女以及環保股。

2014-2-20

近日好忙少出文及上留言區，希望下星期可以回復正常 ^^。港股甚少睇，只是間中 check 自己睇開的股票以及大市，恒指今日跌近 300 點，成交放量，剛升到 50 天線就回調，50 天線是向下彎，有可能會再調整多一段。至於是一底高於一底然後再突破 (即之前已見底)，或者是今次再破底 (即未調整完)，則要事後才知道。

美股強過港股好多，納指直接由 50 天線之下連升 N 日再破頂，標普 500 也已企在 50 天線上，道指則最弱，昨晚回調又失守 50 天線。

港股持倉目前有：656、3888、921、1045、2319
美股持倉目前有：BIIB、WDAY、PANW、MTW、VAL、FLT、VRX

全部持倉都不重，小注分散投資，得閒看懂大勢才加碼出擊。

-----------------------------------------------------

近日香港出現 「驅蝗行動」，筆者當然覺得可笑、無眼睇啦 >_<。但筆者自己就同意，政府是絕對應該檢討自由行政策，包括香港、澳門以及中央都要一齊檢討，港澳的遊客又真係迫爆，已經超出負荷。

現時不單止香港市民，反中國自由行的風，已吹到澳門。筆者身邊好多朋友也都超級討厭中國自由行旅客，當然這不代表我們可以隨便找一批旅客來出氣，但這股怨氣越積越重，遲早會出現大獲嘢。

當然澳門對自由行的依賴，遠超過香港。如果落實 cut 自由行，我諗影響可以好大、好大。但問題是越來越多澳門人認為，即使賺少點錢，也不願再忍受過量自由行所帶來的不便。當然如果落實減少自由行，我認為在賭場企業工作以及做自由行生意的人士，或每月要供車、供樓的人士，他們所受的影響最大。

筆者是零負債以及有不少現金在手的人士，所以我......是絕對、絕對希望可以減少自由行   ^_^

和平地犯法

近日好忙少睇股市，港股要確認見底需要一點時間，也不用每天睇住走勢上上落落迫自己做決定。空閒時反而多睇睇新聞，近日「名咀」事件又攪到政治化。其實一間公司決定炒一個員工，背後不一定有甚麼重大政治原因，一個 「打工仔」首要任務係打好自己份工。公司炒員工理由，也可以是該員工做不到公司對她工作上的要求，或者認為她不再適合在這個岡位上工作。等於一隻股票發盈警或者業績倒退，股價就大跌一樣，不需每次都話大戶做市，不需要凡事都陰謀論。

今日純吹水。某政黨的 「誓師大會」給自己友攪破壞，大姐給人掟嘢「中頭獎」後，曾上港台節目左右紅藍綠，好勞氣地指責那班攪破壞人士，又堅信香港係一個 「法治」社會  (請 highlight "法治" 這兩個字！)，不容許有人暴力行為攪亂檔咁話。

其實這已是一個笑話，一個準備集體 「犯法」的誓師大會給人攪亂，而帶頭大姐話堅信香港有 「法治」？誓師大會上他們最終需要警方保護 ^^'''。我本身對「佔領行動」持中立意見，公民抗民、集體挑戰政府法律，本來就是對付「暴政」的其中一個方法，如果發動戰爭叫做「大革命」，那麼公民抗命誇張點講句就是一場「小革命」。

佔領行動無非是想癱瘓香港的金融中心，是對這個城市、這個社會做成一定頗有程度的破壞，目的是迫政府和中央就範，如果無破壞，和遊行做 show 有何分別？中央會當你 R 痕。我本身雖然不認同現時政府是 「暴政」那麼誇張，但發動佔領的人士你們認為是的話，這只是政見不同，無問題。如果你們認為公民抗命是必須的話，請盡力去做。

但問題是：攪公民抗命但講 「和平」，攪集體犯法但講「法治」？好似不合邏輯囉？ ^^''''

假設我對澳門某賭場好不滿，我發起一班人攪佔領行動，「和平地」用人海塞住各賭場入口，不給賭客們出入，我們好和平架，只是站或坐係各出入口，完全沒有任何暴力行為。但後果係點？不難想像掛！當然係賭場保安或警方清場行動啦，又或者和心急賭錢的賭客發生衝突啦，場面還會「和平」嗎？

斷人衣食尤如殺人父母，佔領金融中心目的就是斷好多人的衣食，到時就算你地自己友唔踩場，場面還會和平嗎？ 到時場面有幾混亂，甚至會演變成流血事件，事前不難想像得到吧？你們現在還以 「和平」作口號，我覺得有點呃人成份。有事又需要在場警方保護，犯法者最終要依賴法治，我覺得又會輪為一場 show =.= 

要攪公民抗命，其實帶頭人士有沒有不達目的誓不罷手的 「決心」？以及會引致流血事件，當然是包括你們自己會流血的 「覺悟」？帶頭者千萬唔好到時有事就走人先囉，又或者比人 「掂」下你就話要告人囉 (犯法者再告人犯法真係好攪笑)。你們真係做得到先好，否則很難令人信服。

美股 Uptrend？

美股納指和標普 500 重回 50 天線上，這一輪調整雖然未有出現 follow through day，但 William O'Neil 的 Investors.com 就話大市已經 confirm uptrend，原因是納指強勢連升，以及領導股最近有好表現，唔少股票破頂。

見底未我真係唔識睇，尤其是港股更加無可能 V 型直接由低位大幅抽高，如果一直未有袋鼠尾或者 follow through day 出現，那麼我就要等大市一個小回檔，未有再次穿底，而又再向上突破的那一刻才算數。

目前形勢仍然是：美股強過中港股市

--------------------------------------------------------------------

近日中午睇港台節目左右紅藍綠 (因為中午返屋企食飯 ^^)，日月報一位記者上去，就換總編一事發表意見，解釋點解要反對換新總編。佢話新總係來自馬來西亞，而馬來西亞在全球新聞自由排名過百，遠低於香港，話擔心影響新聞自由咁話。又話馬來西亞人對香港唔熟識，點做香港報館的總編。

我就覺得有 「標籤 」成份，人都未上班，未正式做嘢，咁快就比人 「標籤」。馬來西亞人一定不適合做香港報館？惠理基金的謝清海也是馬國人，他來到香港後不成功嗎？馬國的排名和個人有甚麼關係？香港幾多大企業高層，都是由外國空降下來的，有問題嗎？

其實有無諗過，打好自己份工先？點解香港報章接連出現，消息未經審證就出街做新聞？日月報把網民惡攪圖當新聞，老屈 TBB 用錯旗代表香港。這類事件生果報都是慣犯，經常以 「消息人士」提供的料當新聞，消息人士姓甚名誰呢我地又唔知，有時流料當新聞又得。好似最近話東莞掃黃，有香港警察比人拉咗，但事後香港警方已查證沒有，又係一單流料。

攪咩？這就是你們口中的新聞價值嗎？

我們追求自由、普選，係偉大的理想，但卻被某些人用來做借口，咩都攪到政治化，一有員工被炒就話政治打壓，點解就一定唔係「你自己做得唔好，所以比公司炒」？

幾乎同一個劇本，只是不同場地、不同演員，卻不斷在香港上演。「員工揀老闆」、「學生揀校長」，這些真是香港的核心價值嗎？這真是一個健康的社會現象嗎？

2014-2-11

今天港股急升近 400 點，成交金額 666 億，未算是有量支持的 follow through day。美股納指暫時已連續三天企在 50 天線上 (今天仍未完)，標普 500 剛升到 50 天線下方，不過今輪反彈成交量很弱，大市有可能仍未見底。

美股倉今日又中一隻止蝕，QLYS 昨天美股收市後公佈業績，場外交易跌 >7%，今日一開市裂口大跌，一早設下的止蝕盤要到 24.06 才沽出，蝕  6% 離場。今日最低價沽到落去 21.X，相比昨日收市價下跌 28%，而現在股價暫時又回升到 24.30，波幅真係得人驚。BLOX 今日更裂口大跌近 50%，真係嚇死人。

筆者看過好多幅圖，發現業績前的走勢是無跡可尋，大升和大跌之前毫無先兆。好似 KORS 業績前一日股價大跌 + 成交放量 + 跌在 50 天線以上，但業績後股價裂口大升。UA、YELP 等業績前股價也是跌，同樣業績後裂口大升。今次 QLYS 業績前連升兩日，成交算是放量，但業績就裂口大跌。

難度美股真的沒有春江鴨？就算不能準確預測業績，至少不會和市場預期落差如此巨大，以至動不動就 >20% 的大裂口掛？？如果連美國本地投資者在業績前心中都無譜，我們海外投資者要事前分析業績，更加是離晒譜 ^^'''''

小陽春

美股已經回升兩天，納指更加連續兩天升超過 1%，雖然成交量沒有出現 follow through day，但已重回 50 天線上。美股之前跌幅不算中期調整 (暫時未 confirm)，所以不一定能夠出現 follow through day，只要今次企穩 50 天線上，之後再破頂而上，走勢上轉為 uptrend，仍然是十分之牛。

筆者也一直較專注玩美股，近排甚少看港股。因為港股中長線走勢遠比美股差，短線走勢港股則 confirm 是次級調整，幾個下跌裂口以及失守了大位，要短期內重回上升趨勢難度較高，需要等待明確的見底訊號出現，筆者才有意欲入市。

美股正值業績期，正如 Blog 友草根兄所言，業績無得估。 FB、YELP 等業績後裂口大升，TWTR 裂口大插。又例如 NFLX、UA、KORS 等，業績前先失守 50 天線，有貨的好可能已被震走，業績後卻又裂口大升。

筆者之前有 YELP，近日有 CSIQ 都被震走了，因為一早設定自動到價沽出，正值調整市沽出後見到股價守得住 50 天線，也不敢反手買回，怕做多錯多。一直 keep 住 WDAY、QLYS、BIIB 不算太牛，近排買入的 AAL 則較強勢。上週五買入 PANW，今晚睇睇 QLYS 業績如何 (驚驚地 ^^'''')

國內股市算是紅盤高開，計及今日港股暫時也回升了三天，但仍在 10 天線之下，未見有大成交的急升，暫時未見明確轉勢。但有些強勢股票卻逆市破頂，如 #921、743。#921 一直都是強勢股，而水泥板塊真的有望 turnaround，每年都會出現新股王 (或者是強力 turnaround 的股票)，水泥股有望今年跑出？

中期調整

本以為港股今日可以乘接昨晚美股升勢而反彈，但最終都是高開低收倒跌收場，濠賭股是重災區。現時是否熊市來臨？言之尚早，由 2008 年金融海潚底部開始，基本上每一次大調整都是一底高於一底，如果這個趨勢延續，估計今年的底部應該高於上一年六月尾的底部，林少陽話港股跌到這個區域，下跌空間已經有限，跌到 20000 點已經十分值博。如果跌到 20000 點，也配合先前一底高於一底的趨勢，再加上到時週線圖已經好超賣，那時撈底值博率可能較高。

不過先不論何時撈底，玩技術分析最緊要不預先設定立場，或者 20000 點永遠跌不到，又或者跌到 20000 點就進入熊市大跌，無人知。總之留意大市見底訊號，有大量資金入場總會有一些蛛絲馬跡。有時不求買在最低位，只求買得安全、安心。如果高位做出大量成交 + 下跌裂口是散水格局，那麼在股市反彈的過程中出現大量成交 + 上升裂口，就是較強烈的利好形態。

昨晚美股反彈，今晚再跌，尤其是之前最強的納指，近日好似有追跌的走勢。美股仍然有四隻股票未到價止蝕：AAL、BIIB、QLYS、WDAY。今晚只有半注的 CSIQ 也中槍沽出了 (因為之前錯過突破點，事後高追，所以只敢半注)。一早已預設了最大虧損應是組合的 2.X% 左右，除非撞正某隻股票大裂口下跌，否則最終是中期調整也好，是熊市也罷，對組合影響不大。

港股早早已多隻股票中止蝕、止賺位沽出，過年前只餘下半注 #656 未到價沽出，以及抽中的新股 #2638。昨天 watch list 有 #743 突破，但今次要堅持跌市中不要追突破股了。現時市況遠遠未及上年六月尾時的恐慌程度，或者今次未有恐慌就可見底，又或者會反彈後又再大插，事前無人能知，就無謂亂估 >.<

-----------------------------------------------------------------------------------

新年過後又吹下水：

教育局 「法定語言」單嘢攪到民怨四起，又比人乘機入佢位、抽佢水。其實佢段文真係無錯，廣東話的確係方言 (正確是否應該叫廣州話？)，這和中共無半點關係，解放前廣東話都一樣係方言。錯就錯在佢地政治智慧低，明知這個風頭火勢出這段嘢，必定比人插梗啦，傻的嗎？  ^^'''

某政黨佔中誓師大會比「自己人」踩場，某阿姐聲稱比示威者掟嘢掟中個頭，阿仁哥指責該行為屬「無賴」及「不文明」，又指警方執法不力。我睇到這段新聞真係忍唔住 "咭" 一聲笑咗出黎，真係由個心度笑出黎個隻，效果好過睇賀歲喜劇 ^_^。之前官員比人掟嘢時，仁哥你又係邊樹？多謝再次演繹完美的雙重標準，你地掟人嘢時，人亦掟返你地。好正常，學下財爺，睇開 D  ^^

乜乜申議員又出招，要求政府在樓市辣招問題上，無論「加辣減辣」都需要得到立法會過半數議員支持，即是要「先審議，後訂立」。又係你個黨？乜又咁啱呀 ^^'''。依家市民怨買唔到樓，想樓價跌 wor，你地又咁攪法，分分鐘鐘辣招通過唔到，究竟你地幫邊面架？ >.<""

馬年開市

筆者休息了多天，其實假日湊仔有時比返工還要累 ^^'''，筆者公司是年初九才開市，但港股明天就復市，是馬年第一個交易日，是紅盤還是黑盤呢？看今晚美股情況就不太樂觀。蛇年港股全年是下跌，國指更誇張跌 15%，不知馬年運程又如何。

港股恒指和國指之前講過，已失短線大位，不再多說。看看美股標普 500 和納指，都已失守 50 天線，標普 500 之前都多次失守過 50 天線，而納指較強，只有上年 6 月失守過一次，但均很快又重上 50 天線之上。但由於 keep 住 50 天線上升，已運行了一段頗長時間，好耐未試過一次中期的較深調整，不知今次中期調整會否來臨？

上兩圖分別是澳元和黃金走勢，兩者都類似，均已進入熊走勢，之前的重要支持線，在失守後就變成重大阻力，黃金是裂口失守頸線，所以淡勢更明顯。澳元和亞洲經濟以及息口有關，由於美元零息，澳元多年來屬高息貨幣。而黃金也和息口有關，長期低息導致通脹預期，沒有利息的黃金作為抗通脹投資工具，經歷了差不多十年升勢。兩者進入熊走勢，已指出了市場的新預期。

上圖是美元指數，雖然沒有上升趨勢，但大底部是一底比一底高，現時只是橫行走勢，等息口真正上升時，美元有機會轉強。不利新興市場股市。

--------------------------------------------------------------------------------------------

筆者對經濟大局沒有研究，但簡單看幾幅圖，看得出近年市場預期的轉變，正正是美國退市的影響力。所以市場對美國退市其實是一早有預備，A 股近年熊到不得了，港股也是大型橫行市。大方向是：資金撤離新興市場，轉投成熟市場？

當然炒股不炒市，選股高手這幾年回報一樣可以好驚人。但筆者選股方面實在差勁，跟趨勢炒股始終要大市配合。目前港股真是 "危危地"，筆者一直 keep 住極低持倉水平。而美股持倉也從未超過 50%，不過美股今次調整，奇怪的是強勢股沒有出現洗倉潮，筆者 watch list 中的強勢股，走勢大多數仍然平穩，是大跌的時辰未到？或是今次只屬一般調整？

筆者當然希望是後者啦。明天復市，祝各位戰友賺多 D，最後又要出動小魚 BB，爸爸覺得小魚 BB 最近有點似 Monchhichi   ^^''''