港股直插無水花

昨晚道指大跌兩舊，今日港股果然有槓桿效應，恒指跌夠 604 點或 2.88%，成交放量至 753 億，遠超過去那兩天反彈的成交量，日線圖又做出一個下跌裂口。上圖紅色線是短期明確的強大阻力，因為前浪底、第一個下跌裂口頂部、10 天線都集中於差不多水平，發揮強大阻力作用。

過往恒指週線圖跌穿大位後，都會插多一大段，今次會否這樣？但走大單邊直插反而易攪，進入大直路就一獲過插夠佢，然後見底回升，因為恒指預測 PE 已在 8-9 倍左右，再跌下去可能加速見底。

但也有可能先來一個後抽，好似 2011 年那一轉咁，失守大位後，後抽升到重返其上，但最終受制 50 週線再跌過。這就較難攪，因為回升又會給人希望，以為是已見底，重新大舉入市又賴野。

不過無謂睇得咁遠，集中睇短線有無博反彈機會，以及留意有沒有強者出手收集股票的手影，以目前來睇暫時是無，大家密切留意每週的週線成交量。

今天股市大跌，但好多個股跌幅相對很小。不過悲觀點睇，我之前都出過文，有三個板塊可能是國指 (以及大市) 的陰晴表：內銀、內房、內保。其中前兩者的重要性較強，內保已經是大市的藍燈爖。

睇一睇內銀走勢真係嚇屎人，今輪係完全無反彈過，表現衰過大市，工行 (1398) RSI(9) 跌到個位數 8  -__-'''。而今天網友 post 出消息，中央推二套房產稅，筆者無留意有關消息，但龍頭中國海外 (688) 和 華潤置地 (1109) 就大插超過 6%，688 已經大成交穿前低位。

如要推高國指以及大市，可能要睇到內銀和內房回升才可以 >_<