美股插水

昨晚道指大插 250 點或 1.96%，拖累今天港股下跌，但講真跌幅不算過份。恒指全日跌 269點或 1.40%，國指下跌 159 點或 1.65%，總成交縮至 379 億。今天國內股市休息。

昨天恒指在 50天線遇阻而回，今天繼續下跌，國指表現近排都差於恒指。本來今天想加多一隻國指熊證，但國指熊無乜選擇，唯有小注買多一隻恒指熊 (62664)，回收價 20500 點，兩隻熊證加埋只佔組合 1.2% 左右。今天組合回報 -0.15%。

現時全世界都知道的事：

1. 恒指估值低，放長線值博；
2. 等終極一跌 16000 點買貨。

咁事態可能向三方面發展：

1. 咁多人等終極一跌，有可能就係唔跌，做多一隻短腳就見底，好多人見升返更不敢買，繼續等下跌，等了又等得個吉

2. 又或者一插插到你暈，大插同時附帶着大量壞消息，令到本來一直等終極一跌買貨的人，跌到位又臨時決定等下先。又或者大插的幅度超出大家想像，令到好多人恐慌，又搬出世界末日論。連原來話等終極一跌的專家，也轉呔話 this time is different 時，大市才真見底

3. 陰跌跌唔到位，但上升動力又不足，維持上落市，大盤估值游走於偏低以及合理之間，跌又未跌到超值，升又升唔上樂觀位，唔知玩到幾時。

第 1 和 第 2 較易攪，首先如果現時就此見底，終會向上升穿大位突破，到時再把餘下資金投入。如果大插出現時，跌到低殘位分段吸納，留一部分資金等真的見底回升，向上突破時再投入，那樣較安全。

最怕是維持上上落落........